Սոցփաթեթով հանգստանալու պայմանագիր եք կնքել կամ պատրաստվում եք կնքել. մինչև տարեվերջ կնքվածը կկատարվի այսօրվա կանոններով. ի՞նչ է փոխվում 2027 թ.-ի հունվարի 1-ից

Սոցփաթեթի դադարեցման նախագծերի փաթեթում ներառված է նաև «Զբոսաշրջության մասին» օրենքում փոփոխությունների նախագիծ. այդ օրենքից նախատեսվում է հանել սոցփաթեթի հանգստի ապահովման ծառայությունում ընդգրկվող զբոսաշրջային օպերատորների հաշվառմանը վերաբերող դրույթները, սակայն մինչև 2027 թվականի հունվարի 1-ը զբոսաշրջային օպերատորի հետ կնքված պայմանագրով սոցփաթեթի շահառուի հանգստի ապահովման ծառայությունը նախագծով կմատուցվի մինչ այդ գործող կարգավորումներով։ 2027 թվականից հաշվին մնացած (սոցիալական վճար կատարողների դեպքում՝ միանվագ կանխիկացումից հետո մնացած) գումարն օգտագործելու նոր կարգը սահմանելու է Կառավարությունը, և այն, ըստ հիմնավորման, պետք է ընդունվի մինչև 2027 թվականի հունվարի 1-ը։

Ինչպես տեղեկացնում է Iravaban.net–ը, ««Զբոսաշրջության մասին» օրենքում փոփոխություններ կատարելու մասին» օրենքի նախագիծը ««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություն կատարելու մասին» օրենքի նախագծի հարակից նախագծերից է. փաթեթը դրված է հանրային քննարկման e-draft.am կայքում՝ մինչև 2026 թվականի նոյեմբերի 5-ը, և դեռ ընդունված չէ։

Ի՞նչ է նախատեսվում հանգստի պայմանագրերի համար

Նախագծի 1-ին և 2-րդ հոդվածներով «Զբոսաշրջության մասին» 2023 թվականի դեկտեմբերի 22-ի ՀՕ-4-Ն օրենքի 5-րդ հոդվածի 1-ին մասի 5-րդ կետը և 6-րդ հոդվածի 2-րդ մասի 15-րդ կետը նախատեսվում է ուժը կորցրած ճանաչել 2027 թվականի հունվարի 1-ից (3-րդ հոդվածի 1-ին մաս)։ Դրանցով պետական լիազոր մարմինը հաստատում է սոցփաթեթի հանգստի ծառայությունում ընդգրկվող զբոսաշրջային օպերատորների հաշվառման, էլեկտրոնային համակարգում ընդգրկման և հաշվառումից հանելու կարգը, իսկ Զբոսաշրջության կոմիտեն իրականացնում է հաշվառումը։ Նախագծի 3-րդ հոդվածի 2-րդ մասով նախատեսված է անցումային կանոն. սոցփաթեթի հանգստի ապահովման ծառայության շրջանակներում մինչև օրենքն ուժի մեջ մտնելը զբոսաշրջային օպերատորի հետ կնքված պայմանագրով շահառուի հանգստի ապահովման ծառայությունը մատուցվում է մինչև օրենքն ուժի մեջ մտնելը գործող կարգավորումներին համապատասխան։ Նախագծի տրամաբանությամբ՝ 2026 թվականի դեկտեմբերի 31-ը ներառյալ կնքված պայմանագրով ծառայությունը մինչ այդ գործող կարգավորումներով կմատուցվի նաև 2027 թվականի հունվարի 1-ից հետո. նախագիծը հանգստի ժամկետի սահմանափակում չի նախատեսում, սակայն այն սահմանված է գործող կարգով։

Ի՞նչ է գործող կարգը

Կառավարության 2012 թվականի դեկտեմբերի 27-ի N 1691-Ն որոշման N 2 հավելվածի N 4 ձևի համաձայն՝ հանգստի ապահովման ծառայությունը մատուցում են Հայաստանի Հանրապետությունում և Արցախի Հանրապետությունում գրանցված, Զբոսաշրջության կոմիտեի հաշվառած և հաշվետվական էլեկտրոնային համակարգում ընդգրկված զբոսաշրջային օպերատորները՝ զբոսաշրջային փաթեթների ու տուրերի կամ հյուրանոցային ծառայությունների իրացման միջոցով (1-ին և 3-րդ կետեր)։ Օպերատորի հետ պայմանագրում պարտադիր նշվում են ծառայությունից օգտվելու ամսաթիվը և վճարի չափը (4-րդ կետ), իսկ օպերատորին փոխանցված սոցփաթեթի գումարը շահառուն պետք է օգտագործի ոչ ուշ, քան այն օպերատորի հաշվեհամարին փոխանցվելուց հետո մեկ ամսվա ընթացքում (5-րդ կետ), և ծառայությունը ենթակա է պարտադիր մատուցման այդ ժամկետում (6-րդ կետ)։ Կեղծ գործարքների, ինչպես նաև ծառայությունը փաստացի չմատուցելու, բայց մատուցված ներկայացնելու և այդ եղանակով գումարը կանխիկացնելու համար օպերատորները կրում են օրենքով սահմանված պատասխանատվություն (7-րդ կետ)։ Հանգստից կարող են օգտվել շահառուն կամ նրա ընտանիքի անմիջական անդամները (N 2 հավելվածի 1-ին կետի 1-ին ենթակետ)։

Ի՞նչ է նախատեսվում 2027 թվականից

««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություն կատարելու մասին» և ««Կուտակային կենսաթոշակների մասին» օրենքում փոփոխություն կատարելու մասին» օրենքների նախագծերով մինչև 2027 թվականի հունվարի 1-ը սոցփաթեթի հաշիվներում կուտակված գումարները ենթակա են օգտագործման մինչև 2029 թվականի դեկտեմբերի 31-ը ներառյալ՝ Կառավարության սահմանած կարգով (վարձատրության օրենքի նախագծի 2-րդ հոդվածի 2-րդ մաս, «Կուտակային կենսաթոշակների մասին» օրենքի նախագծի 2-րդ հոդվածի 2-րդ մասի 2-րդ կետ). հիմնավորման համաձայն՝ այդ կարգը սահմանող Կառավարության որոշումը պետք է ընդունված լինի մինչև 2027 թվականի հունվարի 1-ը։ Ուղղությունները նախագծերում նշված չեն. հիմնավորման համաձայն՝ մնացորդը ծախսվելու է «Կառավարության որոշմամբ սահմանված ուղղություններով», իսկ N 1691-Ն որոշմամբ սահմանված կարգը նախատեսվում է ուժը կորցրած ճանաչել։ Չօգտագործված գումարները նախագծերով 2030 թվականի հունվարի 1-ից հետո երեք ամսվա ընթացքում բանկերը փոխանցելու են պետական բյուջե (2-րդ հոդվածի 3-րդ մաս)։

Օպերատորների միջոցով կանխիկացումների դեպքերը հիմնավորմամբ նշված են ծրագրի դադարեցման պատճառների թվում։

Ամփոփում

Ամփոփելով՝ նախագծով սոցփաթեթի հանգստի պայմանագիրը, որը կնքվել է մինչև 2027 թվականի հունվարի 1-ը, կատարվելու է մինչ այդ գործող կարգավորումներով, որոնցով գումարը պետք է օգտագործվի օպերատորի հաշվեհամարին փոխանցվելուց հետո մեկ ամսվա ընթացքում, իսկ այդ օրվանից մնացորդն օգտագործվելու է Կառավարության նոր կարգով՝ մինչև 2029 թվականի դեկտեմբերի 31-ը ներառյալ, – տեղեկացնում է Iravaban.net–ը։

Թե որքան կարող եք վերջին անգամ կանխիկացնել սոցփաթեթի մնացորդից, կարդացեք այս նյութում։

Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ 

Հետևեք մեզ՝ այստեղ