Սփյուռքի նախարարությունը պայմանագրեր է կնքել մի շարք գիտահետազոտական հիմնարկների հետ

 ՀՀ սփյուռքի նախարարությունը և գիտական գործընկեր կազմակերպությունները փետրվարի 25-ին տեղի ունեցած հանդիսավոր արարողության շրջանակներում կնքել են 2016թ. թեմատիկ պատվերների իրականացման վերաբերյալ պայմանագրեր։ ՀՀ սփյուռքի նախարարությունը պայմանագրեր կնքել ՀՀ ԳԱԱ պատմության ինստիտուտի հետ՝ «Հայկական համայնքները խորհրդային հանրապետություններում 1941-1991 թթ.», Գրականության ինստիտուտի հետ՝ «Գրական Սփյուռք-2016», Լեզվի ինստիտուտի հետ՝  «Գրական արևմտահայերենի ուսումնասիրության պատմություն» և «Արևմտահայերենի և արևելահայերենի մերձեցման ուղիները», Ինֆորմատիկայի և ավտոմատացման պրոբլեմների ինստիտուտի հետ՝ «Գրաբարի ներկայացումը համընդհանուր ցանցային լեզվի բառարանային համակարգում», Փիլիսոփայության, սոցիոլոգիայի և իրավունքի ինստիտուտի գիտական քարտուղարի հետ՝ «Սիրիահայերի արդի իրավա-սոցիալական հիմնախնդիրները Հայաստանի Հանրապետությունում», ԵՊՀ արևելագիտության ֆակուլտետի հետ՝ «Լեռնային Ղարաբա ղի հիմնահարցը Թուրքիայի հասարակական-քաղաքական դիսկուրսում», Իրավագիտության ֆակուլտետի հետ՝ «Հայոց ցեղասպանության ճանաչման, դատապարտման և հետևանքների վերացման իրավական հիմնախնդիրները», Պատմության ֆակուլտետի հետ՝«Հայ կանայք 19-րդ դարի վերջի և 20-րդ դարի սկզբի հերոսամարտի տարիներին»,  «Նորավանք» ԳԿՀ-ի հետ՝ «Ներքին տեղաշարժերը Հայկական սփյուռքում 1950-1980-ական թթ.» թեմաներով հետազոտություններ իրականացնելու համար:

Ընդլայնելով համագործակցությունը գիտական կառույցների հետ՝ ՀՀ սփյուռքի նախարարությունը 2016թ. պայմանագրեր է կնքել նաև Արևմտահայոց հարցերի ուսումնասիրության կենտրոն գիտահետազոտական հիմնադրամի հետ՝ «Համշենը և համշենահայությունը. արդի հիմնախնդիրներ» և «ԵՊՀ հետազոտությունների և գործարարության կենտրոն» հիմնադրամի հետ՝ «Սփյուռքի ներդրումային ներուժի բարձրացման ուղիները ՀՀ տնտեսությունում» թեմաներով հետազոտությունները իրականացնելու համար:

Ինչպես «Արմենպրես»-ին տեղեկացրին ՀՀ սփյուռքի նախարարության մամուլի եւ հասարակայնության հետ կապերի վարչությունից, բացման խոսքով հանդես է եկել ՀՀ սփյուռքի նախարար Հրանուշ Հակոբյանը: Նա նշել է. «ՀՀ սփյուռքի նախարարությունն իր ստեղծման առաջին իսկ օրերից համագործակցել է Հայաստանի և Սփյուռքի գիտահետազոտական կենտրոնների հետ՝ պատվիրելով Հայաստան-Սփյուռք գործակցությանը և հայագիտության զարգացմանը նպաստող հետազոտություններ: Այդ կառույցներից առաջինը «Նորավանք» գիտակրթական հիմնադրամն էր: Ուրախ եմ, ո ր մենք միասին այսքան երկար ուղի ենք անցել: 2009-2015թթ. ընթացքում «Նորավանք» գիտակրթական հիմնադրամի և մյուս գործընկեր կազմակերպությունների հետ իրականացվել է 69 հետազոտություն, 2016թ.-ին նախատեսել ենք՝ ևս 12-ը»:

ՀՀ սփյուռքի նախարարն ընդգծել է, որ այս տարի պայմանագրերի կնքումը միասնաբար կազմակերպելու և հանդիսավոր պայմաններում անցկացնելու առիթը Հայաստանի Հանրապետության և Լեռնային Ղարաբաղի Հանրապետության անկախության 25-ամյակներն են, և իրականացվելիք հետազոտությունները նվիրվում են այդ բացառիկ տոներին: «Հայ գիտնականների միտքը  մենք ոչ միայն օգտագործում ենք մեր ծրագրերը կազմելիս և իրականացնելիս, այլև նրանց աշխատությունները տարածում Սփյուռքում»,- նշել է նախարարը՝ շնորհակալություն հայտնելով ՀՀ ԳԱԱ հայագիտության և հասարակական գիտ ությունների բաժանմունքի ակադեմիկոս քարտուղար Յուրի Սուվարյանին՝ ՀՀ սփյուռքի նախարարության գիտահետազոտական ծրագրերին մշտապես աջակցելու համար:

Այնուհետև ողջույնի խոսքով հանդես է եկել Յուրի Սուվարյանը. «Նախ թույլ տվեք շնորհավորել Ձեզ և ողջ աշխատակազմին՝ նոր մասնաշենք տեղափոխվելու և հարմարավետ պայմաններում աշխատելու հնարավորություն ստանալու առթիվ: Այս հետազոտությունների պատվերներով դուք նպաստում եք հայ գիտական մտքի զարգացմանը և, որ պակաս կարևոր չէ, գիտնականների ֆինանսավորմանը»:

ՀՀ ԳԱԱ պատմության ինստիտուտի տնօրեն Աշոտ Մելքոնյանն ընդգծել է, որ Սփյուռքում հայ գիտնականների աշխատանքները տարածելով՝ նախարարությունը նպաստում է, որ դրանք դարակներում չմնան և հասնեն իրենց ճիշտ հասցեատերերին: Ա.Մելքոնյանն իր հերթին ՀՀ սփյուռքի նախարարությանը նվիրել է «Հայոց պատմություն» նոր քառահատոր աշխատությունը:

Ելույթ են ունեցել ԵՊՀ պատմության ֆակուլտետի դեկան էդիկ Մինասյանը, արևելագիտության ֆակուլտետի թյուրքագիտության ամբիոնի վարիչ Ալեքսանդր Սաֆարյանը, իրավագիտության ֆակուլտետի դեկանի տեղակալ Կարեն Գևորգյանը, տնտեսագիտության և կառավարման ֆակուլտետի դեկան Հայկ Սարգսյանը, ՀՀ ԳԱԱ լեզվի ինստիտուտի տնօրեն Վիկտոր Կատվալյանը, գրականության ինստիտուտի տնօրեն Վարդան Դևրիկյանը, Ինֆորմատիկայի և ավտոմատացման պրոբլեմների ինստիտուտի տնօրեն Վլադիմիր Սահակյանը, «ԵՊՀ հետազոտությունների և գործարարության կենտրոն» հիմնադրամի տնօրեն Քրիստինե Անտոնյանը, «Նորավանք» ԳԿՀ տնօրեն Գագիկ Հարությունյանը:

Գիտական ոլորտների ղեկավարներն ու ներկայացուցիչները կարևորել են ՀՀ սփյուռքի նախարարության աջակցությունը հայ գիտական մտքի զարգացման ու մասնավորապես Սփյուռքի ներուժի հայտնաբերման և Հայաստանում այն օգտագործելու ուղղությամբ: Նշվել է, որ մեծ տեղ է հատկացվում արևմտահայերենի պահպանման և զարգացման խնդրին, իսկ «Գրական Սփյուռք» տարեգրքի ամենամյա հրատարակությամբ Սփյուռքում ապրող և ստեղծագործող ժամանակակից հայ գրողները Հայրենիքում դառնում են առավել ճանաչելի:

ՀՀ ԳԱԱ փիլիսոփայության, սոցիոլոգիայի և իրավունքի ինստիտուտի գիտական քարտուղար Լիլիթ Ղազանչյանն ուրախությամբ հավելել է, որ իրենց ինստիտուտը պետք է իրականացնի սիրիահայերի հիմնախնդիրներին վերաբերող հետազոտություն, և այդ աշխատանքներում ներառված են նաև սիրիահայեր: