Գեւորգ Սաֆարյանի փաստաբանը բողոք է ներկայացրել Արդարադատության խորհուրդ

«Նոր Հայաստան» հանրային փրկության ճակատի անդամ, անազատության մեջ գտնվող ակտիվիստ Գեւորգ Սաֆարյանի փաստաբանը՝ Տիգրան Հայրապետյանը, դիմել է ՀՀ Արդարադատության խորհուրդ՝ դատավորներ Գագիկ Խանդանյանին, Մելիք Սարգսյանին, Գայանե Մազմանյանին եւ Դավիթ Գրիգորյանին պատասխանատվության ենթարկելու պահանջով:

Ըստ Տիգրան Հայրապետյանի՝ վերոհիշյալ դատավորները յուրացրել են դատական իշխանությունը, ակնհայտ անօրինական դատական ակտեր կայացրել եւ մի շարք խախտումներ իրականացրել: Մասնավորապես՝ ըստ փաստաբանի՝ դատավոր Դավիթ Գրիգորյանը չի պատճառաբանել դատական ակտը, օրենքով չնախատեսված հիմքով կիրառել է կալանք: Դատավոր Մելիք Սարգսյանն էլ, դատական ակտ կայացնելիս, գոնե մեկ նախադասությամբ չի պատճառաբանել իր որոշումը:

Տիգրան Հայրապետյանի համոզմամբ՝ դատավոր Գայանե Մազմանյանը գերազանցել է իր լիազորությունները և մերժել է գրավ կիրառել՝ դուրս գալով իր լիազորություններից: Բացի այդ՝ նա իր որոշումը պատճառաբանել է ուժը կորցրած սահմանադրական նորմով:

Ըստ փաստաբանի՝ դատավոր Գագիկ Խանդանյանը Սաֆարյանին կալանավորելիս հիմնվել է միջազգային պայմանագրի վրա՝ կեղծելով այդ պայմանագրի իրական իմաստը: Դատավորը, ըստ փաստաբանի, նաեւ իրենից նոր մտքեր է ավելացրել այդ պայմանագրին, որպեսզի կարողանա կալանավորել Գեւորգ Սաֆարյանին:

Փաստաբան Տիգրան Հայրապետյանին այս առնչությամբ մի քանի հարց ուղղեցինք:

Ի՞նչ պատիժ եք ակնկալում, որ Արդարադատության խորհուրդը կկիրառի դատավորների նկատմամբ, եւ որքանո՞վ դա կօգնի Գեւորգ Սաֆարյանի նկատմամբ արդարադատության կիրառմանն ընդհանրապես:

-Այստեղ կարեւորն այն չէ, թե ինչպիսի պատիժ կկիրառեն, այլ այն, որ դատական համակարգը եւ դատավորները պատասխանատվության ենթարկվելուց հետո կարող են սթափվել, ակնհայտ անհիմն դատական ակտեր չկայացնել: Հիմա մեր դատական համակարգը հասել է մի հանգրվանի, որտեղ դատավորները մտածում են ոչ թե պատճառաբանված դատական ակտ ներկայացնել, այլ այնպես անել, որ ավելի քիչ գլխացավ ունենան:

-Այդ չորս դատավորների գործողություններում միտո՞ւմ եք տեսնում, թե՞՝ պրոֆեսիոնալիզմի պակաս:

- Դատավոր Մելիք Սարգսյանը, Վերաքննիչ դատարանի փորձառու դատավոր լինելով, դատական ակտ ներկայացնելիս գոնե մեկ նախադասությամբ չի պատճառաբանել իր որոշումը: Դա դարձել է գործելակերպ ոչ միայն իր, այլ ամբողջ Վերաքնննիչ դատարանի համար: Այստեղ ասել, թե Մելիք Սարգսյանը փորձի պակաս ունի, այնքան էլ տեղին չի լինի: Նրա գործելակերպն է այդպես: Ինչ վերաբերում է Գայանե Մազմանյանին եւ Դավիթ Գրիգորյանին՝ նրանք ակնհայտ պրոֆեսիոնալիզմի խնդիր ունեն: Չի կարող քրեական գործեր քննող կամ կալանքի միջնորդություն քննող դատավորն այդքան կոպիտ սխալներ թույլ տալ: Գայանե Մազմանյանն ընդհանրապես չի պատկերացրել, թե ինչ միջնորդություն է քննում, Գագիկ Խանդանյանն էլ ակնհայտ գոյություն չունեցող նորմ է վկայակոչել: Մենք ունենք անպատասխանատվության, անպատժելիության գործոն: Այն տպավորությունն է, թե դատավորները կարծում են՝ միեւնույն է՝ ինչ նորմի վրա հղում կատարեն: Երբ միջազգային պայմանագրերի վրա են հղում կատարում, մտածում են, որ դա ավելի տպավորիչ կդարձնի իրենց դատական ակտը, եւ որեւիցե մեկը հետամուտ չի լինի հետեւել, կարդալ՝ արդյո՞ք այդպիսի նորմ կա, թե՞՝ ոչ: Իրենք մտածում են, թե ոչ մեկի մտքով չի անցնի, որ դատավորը կարող է սխալ նորմ հայտարարել:

- Այսինքն՝ պետք է հետեւողակա՞ն լինել դատավորի գործողություններին:

- Այն տպավորությունն է, թե իրենք թքած ունեն. իրենք իրենց գործը սվաղում են, լղոզում եւ մտածում են, որ անպատիժ կմնան:

- Որպես այս դիմումների հետեւանք՝ սպասելիքներ կա՞ն, որ Գեւորգ Սաֆարյանի նկատմամբ կիրառվող անարդար մոտեցումները որոշակիորեն կսահմանափակվեն:

- Ես այսուհետ փորձելու եմ դատավորների նման «խելացի» դատական ակտերը Արդարադատության խորհուրդ ներկայացնել, որպեսզի այդ դատավորներից հանրությունը վերջապես զգաստանա: Եթե իմ օրինակին հետեւեն ուրիշ փաստաբաններ, եւ նմանատիպ դատական ակտերը բարձրաձայնվեն, ինձ թվում է՝ դատավորները ավելի զգույշ կլինեն: Ինչ վերաբերում է Գեւորգ Սաֆարյանին, ես մտածում եմ, որ հաջորդ դատավորը այսպիսի մեծ հիմարություն անելուց առաջ գոնե պետք է երկար մտածի: Կարող են լինել պատճառաբանություններ, որոնք, այնքան էլ, հիմնավոր չեն, բայց դա դատավորի կարծիքն է, եւ դրա հետ պետք է հաշվի նստել, որովհետեւ դատավորն արդարադատությունը իրականացնում է՝ իր ներքին համոզմանը համաձայն: Կարող է ինձ համար այն պատճառաբանված չլինի, բայց մեկ ուրիշի համար հակառակը լինի: Սա ուրիշ խնդիր է: Մեր դատական համակարգում այս դատավորները հանգիստ շարունակում են պաշտոնավարել, որովհետեւ իրենց «խելացի» գաղափարներն ի ցույց չի դրվում հանրությանը, եւ հանրությունը չգիտի, թե ում հետ գործ ունի: Հրապարակայնացվելու դեպքում հանրությունն ինքը գնահատականներ կտա դատավորների այսպիսի գործելաոճին: Այս դեպքում դատավորը հեղինակազրկվում է թե՛ իր կոլեգաների, թե՛ հանրության առաջ:

Հիշեցնենք, որ Գեւորգ Սաֆարյանը կալանքի տակ է գտնվում հունվարի 3-ից: Նա մեղադրվում է  ոստիկան Գեղամ Խաչատրյանի նկատմամբ բռնություն գործադրելու մեջ:

Գագիկ Աղբալյան