Հայրապետյան եղբայրների ողբերգությունը. որդու մահվանը հանգեցրած վթարից մինչև եղբոր ինքնասպանություն

Yerkir.am-ը գրում է.

Երջանկությունը հարստության մեջ չէ: Այս ոսկե կանոնն արդիական է բոլոր ժամանակներում, բոլոր երկրներում: Թվում է, թե օլիգարխի կյանք վարողներն ազատված են հոգսերից, և նրանց դուռը միայն հաջողություններն են թակում, սակայն բազմաթիվ դեպքեր վկայում են, որ շատ հաճախ հենց նրանց է ճակատագիրը փորձությունների ենթարկում:

Հայաստանում նույնպես դժբախտացած հարուստներ կան: Օրինակը ազատամարտիկ, Մալաթիայի նախկին թաղապետ Վահան Զատիկյանի ընտանիքի ողբերգությունն է, երբ տարբեր ժամանակներում տարբեր պայմաններում մահացան ընտանիքի հայրը, հետո՝ որդիները…

Տակավին դժբախտ կարող են համարվել նաև երբեմնի հզոր և հարուստ Հայրապետյանները: «Հայրապետյան եղբայրներ» ընկերության սեփականատեր Փայլակ Հարապետյանի մի որդին ծանր հիվանդ է, մյուսը՝ Հովիկ Հայրապետյանը, 2002-ին վթարի զոհ դարձավ, իսկ դեպքից 10 տարի անց ինքնասպան եղավ Փայլակի եղբայրը՝ Միշա Քալանթարյանը (ազգանունն այլ է): Էլ չենք ասում` Հայրապետյանի ունեզրկումը, որը կապվում է նախկին վարչապետ Տիգրան Սարգսյանի, ադամանդագործ Աշոտ Սուքիասյանի և Նավասարդ արքեպիսկոպոս Կճոյանի անվան հետ:

Այս ընտանիքի` թերևս ամենամեծ ողբերգությանը՝ 40-ամյա Հովիկ Հայրապետյանի մահվանն անդրադառնալու կարիք չէր լինի, եթե վերջին շրջանում չշահարկվեր տարիներ առաջ տեղի ունեցած դեպքն ու այն չկապվեր պաշտոնյաներից մեկի կնոջ անվան հետ: Խոսքը Հովիկ Հայրապետյանի մահվան ելքով վթարի մասին է: Տակավին վերջերս մի կայք այս վթարի մեղավոր համարեց պաշտպանության նախարար Սեյրան Օհանյանի կնոջը՝ նշելով, որ հենց նա է եղել ղեկին, իսկ «Հրապարակ» թերթը, հղում անելով որոշ լրատվամիջոցների, հավանաբար` նկատի ունենալով հենց այդ կայքը, վերապատմել էր այն: Օրաթերթի այդ հրապարակումն էլ հիմք դարձավ, որպեսզի նախարարի կինը՝ Ռուզաննա Խաչատրյանը, դիմի դատարան և հրապարակված տեղեկությունների վերաբերյալ հերքում պահանջի:

Սա այն պատմությունն է, որի մասին ժամանակին խուսափում էին խոսել կամ այլ կերպ էին փորձում ներկայացնել վթարից մահացած 40-ամյա Հովիկ Հայրապետյանի հարազատները: Երևի թե պատճառն «ազնվական» ընտանիքի հեղինակությունն էր, որ ինչ-որ աղջկա անզգույշ քայլի պատճառով չէին ուզում վարկաբեկվել:

Ռուզաննա Խաչատրյանի փաստաբան Կարեն Մեջլումյանի խոսքով՝ 2003-ի ապրիլին այս գործով ազատազրկման է դատապարտվել Աննա անունով մի կին, որի պատիժն արդեն մարվել է: Սակայն ուշագրավ է, որ այն ժամանակվա մամուլի հրապարակումներում այդ կնոջ և նրա գործով նախաքննության կամ դատական քննության մասին որևէ տեղեկության չհանդիպեցինք: Մեզ հաջողվեց միայն պարզել, որ ավտովթարի գործով, այսպես ասած, դատաքննությունը տեղի է ունեցել Աշտարակում, քանի որ դեպքն էլ տեղի էր ունեցել Աշտարակի ճանապարհին և, ըստ ընդդատության, հենց այդ տարածքի դատարանին էլ բաժին էր ընկել:

Մահացած Հովիկ Հայրապետյանի հայրը՝ Փայլակ Հայրապետյանը, yerkir.am-ի հետ զույցում հավաստիացրեց, որ վթարի համար մեղավոր կինը դատապարտվել է, թեև անունը չի հիշում, նաև ասաց, որ դատական նիստերին երբևէ չի գնացել: Փոխարենը, նրա խոսքով, նիստերին մասնակցել է մյուս որդին: Իսկ դեպքն, ըստ նրա, եղել է այսպես. «Էդ կինը ժամանակին եղել ա Դուբայում, իմ տղան դրան ըտեղ ա տեսել, հետո եկել են, Երևանում հանդիպել են: Ըստ էդ կնոջ ցուցմունքի՝ դեպքի օրը գնացել են Հանրապետության հրապարակում սուրճ են խմել, հետո ընկերներով գնացել են Աշտարակ՝ խմելու: Հետդարձի ճանապարհին ղեկին էդ կինն ա նստել, տղաս՝ կողքը, էդ կինը քաշել ա ավտոբուսի դեմը ու հարվածը տղայիս կողմից ա եղել: Մինչև տարան հիվանդանոց՝ մահացավ»,-պատմեց Հայրապետյանը և հայտնեց դեպքի վերաբերյալ իր ունեցած կասկածները:

«Իմ կարծիքով` իրականում իմ տղուն Աշտարակում թույնել են ու դիտավորյալ էդ ավարյան կազմակերպել, որ իմանան դրանից ա մահացել. էդ ճանապարհին հնարավոր չէր ռազվառոտ անել, որ էդ կինն իբր փորձել էր անել: Իմ տղուն թույնեցին, տենց սպանեցին»,-հայտարարեց նա:

Փայլակ Հայրապետյանի խոսքով՝ որդու մահվան մեջ մեղավոր կինը դատապարտվել է 3 տարվա ազատազրկման, 2 տարի պատիժը կրել է Աբովյանի կանանց գաղութում, սակայն համաներման ակտով ազատ է արձակվել ու հեռացել Հայաստանից: «Էդ կինը տարավ տղուս կոտը կերավ, հիմա էլ Հայաստանից փախած ա՝ Մոսկվայում ա: Բայց թե ի՞նչն ա պատճառը եղել, որ իմ տղուն էդ օրը գցեցին, չեմ իմանում, որովհետև էդ խուլիգանկան չասեց` ինչի համար»,- ասաց նա:

Անդրադառնալով այս դեպքը Ռուզաննա Խաչատրյանի անվան հետ կապելուն` Հայրապետյանն ասաց. «Էն ժամանակ Սեյրան Օհանյանի կինը չգիտեմ` ուր ա եղել, բայց որ ինքը լիներ, ինքը կդատապարտվեր»:

Դիտարկմանը` արդյո՞ք քննության առարկա դարձել է իր այն վարկածը, որ որդուն Աշտարակում թունավորել են, նա պատասխանեց. «Ես դա հետագայում եմ իմացել: Եթե ես անուններ իմանայի` շատ վատ կլիներ, հիմա իրանք էլ իմ տղու օրը կընկնեին, չկար ոչ մի կասկածյալ, մինչև հիմա ինձ համար մութ ա»:

Մինչև հիմա մութ այս դեպքին, սակայն, շատ ավելի առեղծվածային պատմություններ են հաջորդել, որոնք նույնպես ժամանակին մոռացվել են: Հովիկ Հայրապետյանի մահվան 7-րդ օրը՝ 2002թ. հունիսի 19-ին, սպանված էին գտել Հայրապետյանի ընկերոջը, ՀՀ 2-րդ նախագահ Ռոբերտ Քոչարյանի աշխատակազմի անդամ Հովհաննես Մանուկյանին: Նրա սպանության պատասխանատվությունն իր վրա էր վերցրել Փայլակ Հայրապետյանի եղբայրը՝ Միշա Քալանթարյանը, ով, սակայն, դատարանի կողմից անմեղսունակ էր ճանաչվել և ուղարկվել հարկադիր բուժման: Ըստ մամուլի հրապարակումների՝  Հայրապետյանները Հովիկ Հայրապետյանի  վթարը կազմակերպելու մեջ  մեղադրել էին  Հովիկ Մանուկյանին:

Սակայն վերջինիս հայրը՝ Ղազար Մանուկյանը, բազմիցս հայտարարել է, որ սպանողը ոչ թե Միշա Քալանթարյանն է, այլ Փայլակ Հայրապետյանը, նրա որդին՝ Հայրապետ Հայրապետյանը, հայտնի դատավորի եղբորորդիներ Գագիկ Քալանթարյանը, Արթուր Եգորյանը: Իսկ սպանությունն էլ, ըստ նրա, տեղի է ունեցել հենց Փայլակ Հայրապետյանի տանը, իսկ հետո որդուն տեղափոխել են Օրբելու փողոց ու հեռացել: Այս ամենի կապակցությամբ Ղազար Մանուկյանը ժամանակին բաց նամակով դիմել էր նաև Ռոբերտ Քոչարյանին:

Թե որքանո՞վ այս երկու պատմությունները կապ ունեն 2012-ին Միշա Քալանթարյանի ինքնասպանության կամ Հայրապետյանների սնանկացման հետ, ոչ ոք չի կարող ասել: Սակայն այն, որ այս պատմություններից յուրաքանչյուրն իր դառը հետքը թողել է այս ընտանիքների կյանքում, փաստ է:

Իսկ շատերի համար մոռացված պատմությունները «պեղելով»` դրանք խեղաթյուրված ներկայացնելը ընդամենը ավելի է բորբոքում այս ընտանիքների վիշտը:

Թագուհի ՄԵԼՔՈՆՅԱՆ