Պերմյակովի գործով արտագնա հաջորդ դատական նիստը կկայանա մարտի 11-ին

SOCIETY 4 March, 2016 21:07

Գյումրիում Ավետիսյանների ընտանիքի սպանության մեջ մեղադրվող ռուս զինծառայող Վալերի Պերմյակովի գործով արտագնա հաջորդ դատական նիստը կկայանա մարտի 11-ին: Այս ընթացքում դատարան ներկայանալու համար կծանուցվի 2012 սահմանապահ ջոկատից դատակոչված վերջին վկան՝ Ռոմիկ Խաչատրյանը, ով ներկա պահին գտնվում է արձակուրդում: Դատարանի կողմից այս ընթացաքում հստակեցվելու է նաև դատակոչվող մյուս վկաների՝ 102-րդ ռազմաբազայում Պերմյակովի ծառայակիցների, այդ թվում նաև Պերյակովի անմիջական հրամանատար՝ Նիկիշինի գտնվելու վայրը: Դատարանն ըստ օրենքի կդիմի ռուսական կողմին՝ այդ 7 վկաների գտնվելու վայրն ու հասցեները պարզելու նպատակով,ապա կձեռնակեն համապատասխան միջոցառումներ՝ նրանց դատարան կանչելու ուղղությամբ:

Այն, որ տվյալ գործի քննության համար անչափ կարևոր է հենց այս վկաների ցուցմունքերը՝ «Արմենպրես»-ին տեղեկացրեց Ավետիսյանների իրավահաջորդների շահերի պաշտպան փաստաբան Երևանդ Վարոսյանը: «Դեռ առաջին դատական նիստի ժամանակ ներկայացվեցին դատակոչված այդ 7 անձի հետ կապված հրամաններն այն մասին, որ նրանց մի մասը զորացրվել էր, մյուսը մասն էլ տեղափոխվել էին այլ վայրեր ծառայության: Կարծում եմ, որ պետք է մինչև վերջ պնդենք, որ այդ անձիք հարցաքննվեն, քանի որ նրանց շարքում են և՛ Պերմյակովի ծառայակիցները, ովքեր էական նշանակության ցուցմունքեր են տալու նրա վերաբերյալ, և՛ ամենակարևորը՝ նրա անմիջական հրմանատարը՝ Նիկիշինը, ով եղել է այն անձը, ով գնացել է Չիտա, ընտրել է Պերմյակովին որպես լավագույն զինվոր, բերել հասցրել Հայաստան, բացի այդ, դեպքի օրն ինքն է եղել վերակարգի հրամանատարը: Այդ առումով շատ կարևոր վկաներ են և պետք է փորձել ապահովվել նրանց ներկայությունը դատարանում»,-նշեց Երվանդ Վարոսյանը:

Հարցին, թե ինչպես է ապահովվելու վերջիներիս ներկայությունը դատարանում, եթե այդ վկաներն այս պահին այլ երկրում են, փաստաբանը նշեց, որ դա շատ հեշտ է կազմակերպել: «Այն անձիք, ովքեր զորացրված չեն, նրանց հրամատարության համար խնդիր չէ իրենց զինծառայողի ներկայությունն ապահովել իրենց իսկ ռազմաբազայի տարածքում, իսկ նրանք, ովքեր զորացրված են, պետք է պարզել նրանց հասցեներն ու ծանուցել: Օրենքի պահանջն է դա և պետք է կատարվի»,-նշեց Երվանդ Վարոսյանը:

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան« ժամը 06:00-ի սահմաններում« նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը« ով կտրող-ծակող գործիքից ստացած վնասվածքներով տեղափոխվել էր բժշկական կենտրոն« այնուհետև` յոթ օր հետո մահացել: Նշանակվել էին դատաբժշկական« դատատոքսիկոքիմիական« դատաձգաբանական փորձաքննություններ: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին« և ՀՀ քննչական կոմիտեի քննիչները Վալերի Պերմյակովին մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրմա ն համար օգոստոսի 12-ին դատապարտվել է 10 տարվա ազատազրկման:

Արմենուհի Մխոյան