Հայաստանում քաղաքական որոշ ուժեր ու կուսակցություններ կարծես քաղաքական իրականությունից կտրված լինեն
BLOGԱլեն Ղևոնդյանը Ֆեյսբուքյան իր էջում գրում է.
Ընդդիմադիրները մեզանում ավելի շատ ու ավելի շուտ մրցում են միմյանց հետ առավել «ընդդիմադիր» լինելու հարցում, քան թե իշխանության հետ՝ իշխանության հասնելու հարցում:
Իսկ դա ոչ միայն նշանակում է, որ մեզանում գործնականում բացակայում է կայացած «ընդդիմության ինստիտուտը», որն ունակ է ներկայացնել ՀՀ-ի քաղաքացիների՝ մի բավական մեծ սեգմենտի շահերը, այլ նաև փաստում է այն մասին, որ նման վարքաձևի արդյունքում ընդդիմադիրները՝ որպես քաղաքական ուժ կամ սպառվում են, կամ մարգինալացվում՝ դրանից բխող հետևանքերով:
Ավելին՝ որքան էլ տարօրինակ է, սակայն ընդդիմադիրների մի մասը, մեր հասարակության քաղաքական համակարգում առաջնորդվում են քաղաքական պայքարի իրականացման զգայական ու ռոմանտիկ ընկալում/ըմբռնումներով՝ իրենց հնարավոր հաղթանակը ընտրություններում կապելով «ժողովուրդը փողոց դուրս կգա» դիտարկման հետը: Նման գործելաոճը, որը, փաստորեն, քաղաքական պայքարի դուրս եկած կուսակցության ռազմավարության մի կոնկրետ փուլում «գործող անձ» է դիտարկում ամորֆ ու անորոշ այնպիսի հանգամանք, ինչպիսին «ժողովուրդի փողոց դուրս գալն» է, դատապարտված է:
Մի քիչ անհասկանալի է. այսքան տարի քաղաքական ձախողումներն առհասարակ որևէ բան կարծես չեն սովորեցրել մեր՝ մի շարք քաղաքական ուժերի, իսկ դա նշանակում է, որ նրանք պետք է սպասեն քաղաքական դաշտում հերթական ձախողումներին: