Ստեփանավանի ոստիկանության նախկին աշխատակցի և որդիների կողմից ծեծի ենթարկված քննիչը բողոքում է առողջական վիճակից

Ստեփանավանի ոստիկանության նախկին աշխատակցի և նրա որդիների մասնակցությամբ ծեծկռտուքի հետևանքով տուժել է Ստեփանավանի քննիչ Էդիկ Կոստանյանի առողջությունը: Այդ մասին մեզ հետ զրույցում հայտնեց քննիչը՝ նշելով, որ ծանր մարմնական վնասվածք է ստացել՝ ուղեղի ցնցում, ճակատային ոսկրի խոռոչի ճաք, ինչի պարագայում, հասկանալի է, որ չի կարող նորմալ առողջական վիճակում լինել: «Գլխացավեր եմ ունենում հաճախակի»,- բողոքեց քննիչը:

Վերջինս չցանկացավ մանրամասներ հաղորդել դեպքի վերաբերյալ՝ ասելով, որ նման լիազորություն չունի տեղեկատվություն հաղորդելու, հատկապես, որ դռնբաց դատավարություն է ընթանալու և բոլոր մանրամասները կհրապարակվեն դատարանում: Միայն նշեց, որ կռվի մեջ է հայտնվել ծառայողական պարտականությունների բերումով. վիճաբանություն տեսնելով՝ իջել է մեքենայից, որ հանդարտեցնի քաղաքացիներին: Արդեն Լոռու մարզի դատարանի վարույթում է Գլխավոր դատախազության կողմից ուղարկված գործը՝ ըստ մեղադրանքի Վարուժան և Արծրուն ու Ալեքսանդր Մովսիսյանների՝ Քր. օր.-ի 112-րդ հոդվածի 2-րդ մասի 2-րդ, 6-րդ, 9-րդ կետերով, 258-րդ հոդվածի 3-րդ մասի 1-ին և 2-րդ կետերով՝ դիտավորությամբ առողջությանը ծանր վնաս պատճառելը, որը կատարվել է անձի նկատմամբ՝ կապված այդ անձի կողմից իր ծառայողական գործունեության կամ հասարակական պարտքի կատարման հետ, մի խումբ անձանց կողմից, խուլիգանական դրդումներով, և Խուլիգանությունը՝ դիտավորությամբ հասարակական կարգը կոպիտ կերպով խախտելը, որը կատարվել է մի խումբ անձանց կողմից և զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով:

Այսպիսով, ոստիկանության նախկին աշխատակից Վարուժան Մովսիսյանն ու նրա երկու որդիները մեղադրվում են այն բանի համար, որ 2015թ. հունիսի 3-ին՝ ժամը 23.37-ի սահմաններում, խմբի կազմում կատարել են՝ անձի նկատմամբ բռնություն գործադրելով, հասարակական կարգի խախտումը խափանող անձին դիմադրություն ցույց տալով, ուրիշի գույքը ոչնչացնելով և վնասելով զուգորդված խուլիգանություն:

Ինչպես նաև խմբի կազմում, խուլիգանական դրդումներով և, կապված անձի կողմից իր հասարակական պարտքի կատարման հետ, նրա առողջությանը դիտավորությամբ պատճառել են ծանր վնաս: ՀՀ քննչական կոմիտեի Լոռու մարզային քննչական վարչության Ստեփանավանի քննչական բաժնի ավագ քննիչ Էդիկ Կոստանյանն ու նույն բաժնի քննիչ Գագիկ Այվազյանը տուժող են ճանաչված:

Որպես իրեղեն ապացույց գործում ներկայացված են տուժողներ Էդիկ Կոստանդյանի և Գագիկ Այվազյանի, մեղադրյալներ Վարուժան, Ալեքսանդր և Արծրուն Մովսիսյանների հագուստները, տուժող Էդիկ Կոստանդյանի բժշկական փաստաթղթերը: Հայր և որդի Մովսիսյանների նկատմամբ խափանման միջոց է ընտրված կալանավորումը: Չնայած նույնիսկ գործում առկա բժշկական փաստաթղթերին՝ տուժող քննիչը ցավով նկատում է, որ իր առողջական վիճակը ոչ ոքի չի հետաքրքրում:

«Երևի թե ոչ ոքի այս պահին դա չի հուզում: Մի բան էլ մեղադրվող կողմը նախագահին դիմումներ է գրում»,- ասաց քննիչը: Իսկապես, ՀՀ նախագահին ուղղված բաց նամակում քննիչի ծեծի փաստով կալանավորված նախկին ոստիկանության աշխատակցի կինը նշել էր, որ ամուսնու և որդիների նկատմամբ անարդար քննություն է իրականացվել, որ ինքը չի դիմանա, եթե նրանք դատապարտվեն և «թախանձագին խնդրել էր» նախագահին հանձնարարել ամուսնու եւ որդիների կամ գոնե նրանցից մեկի նկատմամբ ընտրված խափանման միջոց կալանքը փոխել:

«Հատուկ քննչական ծառայությունում նույնպես հակված չեն պարզել դեպքի իրական հանգամանքները եւ իրենց քրտինքով եւ ազնիվ աշխատանքով ապրող ընտանիքի երեք տղամարդկանց՝ ամուսնուս եւ որդիներիս, թողեցին կալանքի տակ՝ անտեսելով բոլոր իմ աղերսները: Նրանց կալանավորելուց հետո ես՝ բազմաթիվ հիվանդություններով տառապող կինս, մնացել եմ առանց խնամքի, ավելին, ամիսներ շարունակ բռնել եմ Ստեփանավան-Երեւան ճանապարհը եւ հարկադրված եմ ինքս հոգալ անազատության մեջ գտնվող ընտանիքիս երեք անդամների խնամքը։

Եվ սա այն դեպքում, երբ այդ չարաբաստիկ վիճաբանությունն սկսվել է պատահաբար, նախապես ծրագրված չի եղել, վիճաբանողները մինչ այդ միմյանց նկատմամբ որեւէ անձնական թշնամանք չեն ունեցել, վիճաբանության ընթացքում հրազեն կամ սառը զենք չի կիրառվել եւ ամենակարեւորը՝ այն որեւէ անդառնալի կամ ողբերգական հետեւանք չի ունեցել։ Բոլորս էլ պարբերաբար տեղեկանում ենք, որ նման միջադեպեր հաճախ են լինում եւ ոչ ոք ապահովագրված չէ դրանից»,- գրել էր ստեփանավանցի կինը՝ հանրապետության նախագահին ուղղված բաց նամակում:

Նույն նամակից տեղեկանում ենք մի ուշագրավ հանգամանքի, որ դեպքից անմիջապես հետո մեղադրյալ Վարուժան Մովսիսյանն անձամբ է գնացել ոստիկանության Ստեփանավանի բաժին ու հաղորդում տվել իրեն ծեծի ենթարկելու մասին, բայց այն թողնվել է անհետևանք, իսկ քրեական գործը հարուցվել է քննիչների զեկուցագրերի հիման վրա: Քննիչները տուժող են ճանաչվել, իսկ հաղորդում տվողը ձերբակալվել, ապա՝ կալանավորվել է։ Երկու ամիս անց կալանավորվել են նաև նրա երկու որդիները: