Լենա Ղազարյանը՝ նոր տեսահոլովակի եւ նկարահանման ընթացքում տեղի ունեցած պատահարների մասին

Life.panorama.am-ը գրում է.

Հանգստյան օրերը «Իմ անունն է», «X ֆակտոր» եւ «Պրեմիերա» նախագծերից հայտնի դարձած երգչուհի  Լենա Ղազարյանի համար նշանավորվեցին կարեւոր իրադարձությամբ. Նա ներկայացրեց իր առաջին անհատական տեսահոլովակը` նկրահանաված «Ամառ է, ցուրտ է» երգի հիման վրա:

Life.panorama.am-ի հետ զրույցում երգչուհին ոգեւորությամբ նշեց, որ երգի ընտրության հարցում շատ չի մտորել եւ առանձին մանրամասներ ներկայացրեց.

«Տեսահոլովակ նկարահանելու ցանկություն վաղուց ունեի եւ մի քանի երգեր կային, որոնց շուրջ մտածում էի, սակայն մտորումներս երկար չտեւեցին, քանի որ «Ամառ է, ցուրտ է» երգի նկատմամբ առանձնահատուկ սեր ունեմ, այն ինձ համար շատ տպավորիչ ու հուզիչ երգ է: Շատ շնորհակալ եմ երգի հեղինակներին՝ Գայանե Ավետիսյանին, ով գրել է երգի շատ գեղեցիկ խոսքերը եւ Նիկ Եգիբյանին, ով երաժշտության հեղինակն է: Ի դեպ այս երգի համար կարելի է ասել ամբողջությամբ աշխատել եմ Նիկի հետ, քանի որ նա նաեւ զբաղվել է գործիքվորմամբ եւ հանդես է եկել որպես ռեժիսոր, իսկ մոնտաժն իրականացրեց Արամայիս Հայրապետյանը»:

Երգչուհու խոսքերով, տեսահոլովակի նկարահանումները տեւել են ընդամենը մեկ օր: Մեզ հետ զրույցում Լենան պատմեց, որ տեսահոլովակի նկարահանման ընթացքում փոքրիկ «պատահարներ» են տեղի ունեցել.

«Տեսահոլովակում մի քանի կերպարով եմ հանդես եկել, որոնք մշակել ենք ես ու Նիկը: Նկարահանումները մի քանի ժամ տեւեցին, ընթացքում ոչ միայն աշխատանքային, այլեւ շատ ուրախ ու ջերմ  մթնոլորտ էր տիրում, որին նպաստեցին իմ սայթաքումները. մի տեսարան կա, երբ ես երկար զգեստով եմ, նկարահանման ընթացքում չգիտեմ ինչու՝ երկար զգեստիս եւ բարձրակրունկ կոշիկներիս պատճառով անընդհատ ընկնում էի, արդյունքում իսկական զավեշտալի իրավիճակ էր ստեղծվում»,- ծիծաղելով պատմեց Լենա Ղազարյանը:

Ի դեպ՝ Լենան երկրորդ մասնագիտությամբ դիմահարդար է եւ տեսահոլովակում իր արտաքին տեսքով անձամբ է զբաղվել: Նրա խոսքերով՝ իրեն կարողանում է ազատ զգալ եւ դրսեւորել դիմահարդարման արվեստում:

Շատ շուտով Լենա Ղազարյանը եւս մեկ տեսահոլովակ կներկայացնի.

«Այս պահին արդեն զբաղված եմ հաջորդ տեսահոլովակիս նախապատրաստական աշխատանքներով: Մյուս երգիս հեղինակն է Արթուր Բարսեղյանը, ով ապրում է Նյու Յորքում, այն Երեւանի մասին է: Արդեն գիտեմ, թե ում հետ եմ աշխատելու այդ երգիս համար, բայց դեռեւս մանրամասներ չեմ հայտնի»,- նկատեց  նա:

Հետաքրքրվելով, թե «Պրեմիերա» նախագծում հաղթելուց հետո մրցանակ տեսահոլովակը ե՞րբ կլինի, Լենան նշեց.

«Հաղթանակած տեսահոլովակս դեռ մի փոքր ուշանում է, բայց դա էլ անպայման կիրականանա, ամեն ինչ հերթով՝ իր ժամանակին»: