iPhone SE, iPad Pro, iOS 9. Apple-ը ներկայացրել է իր նորագույն գաջեթներն ու հավելվածները

LIFE 22 March, 2016 9:49

Tert.am–ը գրում է.

Ամերիկյան Կուպերտինո քաղաքում անցկացվող միջոցառման շրջանակներում Apple-ը ներկայացնում է այս տարվա իր նորագույն արտադրանքները` նոր սմարթֆոնը, iPad-ը, Apple Watch-ի թևնոցը, նոր հավելվածներ և ծրագրեր:

Ինչպես հաղորդում է Business insider-ը` տեխնոլոգիական ընկերությունը ներկայացրել է ResearchKit և CareKit ծրագրերը, որոնցից կարող են օգտնվել տարբեր հետազոտություններ իրականացնող գիտնականները, այդ թվում բժիշկները:

Այսօրվա նորույթներից են Apple Watch ժամացույցի համար նախատեսված գործված նեյլոնե թևկապները: Ժամացույցի նոր սպորտային տարբերակը ավելի մատչելի գնով կվաճառվի` 299 դոլարով:

Ընկերության ղեկավար Թիմ Կուկը ներկայացրել է նաև անցյալ աշնանը թողարկված Apple TV-ի նոր գործառույթները, որոնք ներառում են Siri ձայնային ծառայությունը և թղթապանակները, որոնց մասին առաջին անգամ խոսվել է այսօր:

Ներկայացվել է նաև երկար սպասված iPhone SE սմարթֆոնը` 4 դյույմ անկյունագծով էկրանով: Սմարթֆոնի արտաքին տեսքը հիշեցնում է iPhone 5s-ը, իսկ գաջեթի միջուկը նմանակում է iPhone 6s-ինը` A9 պրոցեսոր: Սմարթֆոնը հասանելի է վարդագույն-ոսկեգույն երանգով: Սմարթֆոնը ստացել է 12 մեգապիքսել տեսախցիկ, որը ևս կրկնօրինակում է iPhone 6s-ի բոլոր գործառույթները, այդ թվում` Live Photos-ը:

iPhone SE-ն համալրված է Apple-ի մատնահետքով աշխատող սենսորային համակարգով, ինչը թույլ է տալիս ապահով վճարումներ կատարել Apple Pay-ով: Սմարթֆոնի արժեքը մեկնարկում է 399 դոլարից` 16 ԳԲ հիշողությամբ տարբերակի համար: Սմարթֆոնը պատվիրել հնարավոր կլինի մարտի 24-ից և այն կմատակարարվի մարտի 31-ին:

iOS 9 օպերացիոն համակարգը, որը հասանելի կլինի iPhone-ների, iPad-ների և iPod Touch-երի համար, կարելի կլինի անվճար ներբեռնել արդեն այսօր:

Մարքեթինգի գծով ավագ փոխնախագահ Ֆիլ Շիլլերը ներկայացրել է iPad Pro գաջեթների ընտանիքը համալրող 9.7 դյույմ անկյունագծով, «ռետինա» էկրանով iPad-ը, որը 4 բարձրախոսներ և կրկնակի ուժեղ հնչեղություն կունենա, քան iPad Air 2-ը: iPad Pro-ն կունենա 12 Մպ տեսախցիկ: Այն Apple-ի առաջին պլանշետն է, որն ունի 256 ԳԲ հիշողություն, իսկ արժեքը կսկսի 599 դոլարից: