Տղաս ու աղջիկս ինձ և ամուսնուս լիարժեք են դարձնում. Գոհար Հովհաննիսյանը նշում է ծննդյան 34-ամյակը

PHOTO 23 March, 2016 15:48

Ժողովրդական երգերի կատարող Գոհար Հովհաննիսյանն այսօր տոնում է ծննդյան 34-ամյակը: Այսօր երգչուհին ծննդյան օրը կնշի տանը՝ ընտանիքի գրկում, մտերմիկ երեկոյի շրջանակներում ու իրականացված երազանքների գիտակցումով:

Life.panorama.am-ը շնորհավորելով երգչուհուն՝ խոսել է նրա հետ ու տեղեկացել օրվա մանրամասներից.

«Այնպես ստացվեց, որ երեկ մեր ընկերներից մեկի ծննդյան օրն էր ու իմ ծննդյան մեկնարկը տրվեց հենց այդ նույն շրջապատում: Ամուսինս շատ է սիրում անակնկալներ մատուցել, երեկ էլ փոքրիկ տորթով ու ծաղիկներով ճիշտ 00:00-ին շնորհավորեց ինձ. հավատացեք՝ չկա ավելի մեծ երջանկություն, քան ծննդյանդ օրը գիտակցել, որ երազանքներդ իրականացված են, քանի որ ունես հրաշ ընտանիք»,- պատմեց Գոհարն ու նկատեց, որ տոնական օրը տանը կանցկացնի.

«Քանի որ աղջիկս դեռ շատ փոքր է, ուստի որոշեցինք այսօրն անցկացնել տանը՝ մեր ամենամտերիմ հարազատների հետ միասին: Շատ եմ սիրում նման մտերմիկ հավաքույթները, երբ քեզ իսկապես տանն ես զգում: Իմ մտերիմները շատ լավ գիտեն, որ ինչքան էլ ինչ-որ մի բանից սրտնեղած լինեմ, միեւնույն է, ցույց չեմ տա, նրանց հետ ուրախ կանցկացնեմ տրված ժամանակը, առհասարակ ամեն օրս փորձում եմ ուրախ անցկացնել, ամեն ինչի մեջ դրականն ու գունավորը տեսնել»,- նշեց նա:

Գոհարի խոսքերով՝ նա 33-ում հասել է ամենամեծ երազանքին. «Հենց 33-ում ծնվեց աղջիկս, ով իմ կատարված գլխավոր երազանքն է: Նա այսօրվա իմ ամենամեծ նվերն է, տղաս ու աղջիկս ինձ ու ամուսնուս լիարժեք են դարձնում, ինչի համար շնորհակալ ենք Աստծուն»,- ասաց երգչուհին:

Գոհար Հովհաննիսյանը մեզ հետ զրույցում պատմեց, որ իր մեծանալը զգում է հենց ծննդյան օրը.

«Երբեմն ինձ թվում է, թե ես մեծանում եմ հենց ծննդյանս օրը, քանի որ ողջ տարվա ընթացքում այդ անցումը չեմ զգում: Ծաննդյանս օրերին միշտ մի փոքր հուզմունք եմ զգում, գիտակցում եմ, որ մեծանում եմ, բայց եւ չեմ թողնում, որ հուզմունքս խանգարի վայելել այն, ինչ ունեմ, ինչով արժեւորվում է կյանքս»:

Երգչուհու համար անգնահատելի է երկրպագուների կողմից ստացած շնորհավորանքները.

«Երբ հարազատներդ ու ընկերներդ են շնորհավորում, շատ հաճելի է, բայց երբ երկրպագուներդ են շնորհավորում ու բարեմաղթանքների տարափ հնչեցնում, հասկանում ես, որ անցած ճանապարհդ իսկապես իզուր չէ: Ես ավելի եմ ոգեւորվում նրանց ուշադրությունից, ուզում եմ անվերջ ստեղծագործել նրանց համար»,- ոգեւորությամբ պատմեց Գոհարն ու հավելեց.

«Մի շարք ծրագրեր ունեմ այս տարվա համար՝ նոր երգեր, նոր տեսահոլովակներ, որոնց իրագործաման համար մեծ ջանքեր եմ ներդնում: Մի բան հաստատ է, երազանքներ ունենալը լավ բան է, դրանք պատահակն չեն լինում, բայց դրանց իրականացման համար պետք է աշխատել, որպեսզի երազանքներդ տարիներով նույնը չմնան»:

Հեղինակ՝ Անուշիկ Մելքոնյան