Ավագ Ավետիսյանները սպանությունից առաջ եղել են շարժման մեջ. հրապարակվել են համալիր փորձաքննության արդյունքներ

Գյումրու 102-րդ ռազմաբազայի տարածքում շարունակվում է Ավետիսյանների ընտանիքի յոթ անդամների սպանության մեջ մեղադրվող ռուս զինծառայող Վալերի Պերմյակովի գործով դատական նիստը: Նիստին այս անգամ շարունակվեց փաստաթղթերի ընթերցման գործընթացը 10-րդ հատորից սկսած: 10-րդ հատորում ներկայացված են վկաների հարցաքննության արձանագրությունները, միջնորդություններ, տուժողների իրավահաջորդների շահերի պաշտպանների ճանաչման վե րաբերյալ փաստաթղթեր, Ավետիսյանների մահվան վկայականների պատճենները, գրություններ ոստիկանությունից և դատախազությունից:

Հաջորդ հատորում ներկայացված էին ոստիկանության, ճանապարհային ոստիկանության արձանագրություններ, քննչական կոմիտեից «Վիվա Սելլ» ընկերությանն ուղղված գրություններ, Ավետիսյանների հագուստներից արված փորձագիտական եզրակացություններ, ինչպես նաև ՌԴ քննչական կոմիտեի գրությունը ՀՀ քննչական կոմիտեին` համատեղ փորձաքննություն անցկացնելու վերաբերյալ: Ներկայացվեցին նաև Ավետիսյանների ուղղությամբ արձակված կրակոցների հերթականության վերաբերյալ փորձագիտական եզրակացությունները: Համաձայն այդ եզրակացությունների` կրակոցը եղել է շարժման վիճակում, արթուն և շարժման վիճակում են եղել Արմեն Ավետիսյանը և Սերյոժա Ավետիսյան ավագը, ամենայն հավանականությամբ, արթուն և շարժման վիճակում է եղել ավագ Հասմիկ Ավետիսյանը: Ըստ վերոնշյալ համալիր փորձաքննության եզրակացության` տան տղամարդիկ ոչ միայն արթուն են եղել, այլև փորձ են արել ինչ-որ գործողություններ կատարել` սենյակից սենյակ տեղափոխվել կամ նույնիսկ բռնել զենքը: Դատարանն այս նիստի ընթացքում նաև ծանոթացավ ռուսական կողմի գործի նյութերի որոշ թարգմանությունների, որոնց մեջ ներառված էին նաև Պերմյակովի կողմից ներկայացված որոշ դիմումներ ու փաստաթղթեր: Դրանք դատարանը որոշեց չհրապարակել այս պահին, մինչև Պերմյակովի ցուցմունքի ավարտը: 

Ավետիսյանների ընտանիքի 6 անդամների սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև` յոթ օր հետո մահացել: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս եւ հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին  մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության եւ զենքի ապօրինի կրման համար օգոստոսի 12-ին դատապարտվել է 10 տարվա ազատազրկման: