Ամեն ինչ անում են՝ բացատրելու համար, թե ինչու ոչինչ չեն անում.Արամ Կարապետյանը՝ Ընտրական օրենսգրքի քննարկումների մասին

Այսօր Ազգային ժողովում մեկնարկեցին Ընտրական օրենսգրքի շուրջ «4+4+4» ձևաչափի բանակցությունները, որոնց մասնակցում են իշխանության, ընդդիմության և քաղաքացիական հասարակության ներկայացուցիչներ:

Past.am-ի հետ զրույցում «Նոր ժամանակներ» կուսակցության նախագահ Արամ Կարապետյանը կիսվել է գործընթացի վերաբերյալ իր տպավորություններով:

Ըստ նրա՝ իշխանությունը, որը պատրաստել է այդ օրենսգիրքը, ամեն ինչ անում է՝ բացատրելու, թե ինչու պետք է ոչինչ չանել:

«Իշխանության անունից հիմնականում հանդես եկող Դավիթ Հարությունյանն ամեն ինչ անում է, որ բացատրի՝ ինչու պետք է ոչինչ չարվի: Ասում են՝ թանաքոտել պետք չէ, որովհետև չգիտեմ ինչ, ցուցակները փակցնել պետք չէ, որովհետև չգիտեմ ինչ:

Չկա որևէ լուրջ բացատրություն, թե ինչու պետք է ոչինչ չանել»,- ասաց Արամ Կարապետյանը՝ հավելելով, որ ավելի հեշտ է բավարարել մարդկանց պահանջները:

Մեր զրուցակցի խոսքով՝ սա ֆիկցիա է՝ ցույց տալու համար միջազգային կառույցներին, որոնք ապրիլի վերջին պետք է կարծիք ներկայացնեն, որ բուռն և լայն քննարկումներ են գնում:

«Պարզ է, որ Վենետիկի հանձնաժողովը, ԺՀՄԻԳ-ը իշխանություններին գովելու առումով չափը շատ են անցել , հիմա ասում են՝ տղերք ջան, էլ չենք կարող, որովհետև կասեն, թե մեզ իսկապես կաշառել եք: Կա՛մ այդ ընտրություններին ինչ-որ շղարշ պետք է տրվի, որ համեմատաբար լավ պայմաններում է անցկացվում, կա՛մ ես մնում եմ իմ կարծիքին՝ այլ ճանապարհ է պետք փնտրել, որպեսզի Հայաստանում փոփոխություններ արվեն: Եթե լուրջ նայենք այս ամենին, ապա կհամոզվեք, որ այս ամենը պարապ ժամանակվա խոսակցություններ են: Մենք խոսում ենք, դուք փաստեր եք հավաքում, Past.am-ում տպում եք, իրենք մեզ վրա ծիծաղում են»,- ասաց նա:

Հարցին՝ ընդդիմությունն իր մասնակցությամբ չի՞ լեգիտիմացնում գործընթացը, պարոն Կարապետյանը պատասխանեց, որ լեգիտիմացումը քաղաքական կատեգորիա չէ: «Կրկնում եմ՝ լեգիտիմացնեք, թե չլեգիտիմացնեք, փողերը տանում եմ, մեզ վրա ծիծաղում: Մնացածն էական չէ: Այլ գործողություններ են պետք, եթե ուզում ենք լուրջ նայել քաղաքականությանը»,- ավելացրեց Կարապետյանը:

Լևոն Փանոսյան