Կին վարորդը դատարանում վիճարկել է ՃՈ վարչական ակտն ու հաղթել

Փաստաբան Ռուզաննա Ազրոյանը վարչական դատարանում վիճարկել է ճանապարհային ոստիկանության վարչական ակտը, ըստ որի նա Դավթաշեն-Եղվարդ խճուղու վրա խախտել է երթևեկության կանոնները՝ գերազանցելով սահմանված 40 կմ/ժամ արագությունը: Դատարանը բավարարել է փաստաբանի հայցը և վարչական ակտը ճանաչել ոչ իրավաչափ: «Արմենպրես»-ի հետ զույցում, մանրամասնելով տեղի ունեցածը, Ռուզանն Ազրոյանը նշեց, որ խնդիրը կայանում է նրանում, որ Եղվարդ-Դավիթաշեն խճուղում տեղադրված է 40 կմ/ժամ արագություն սահմանափակող նշանը, բայց ՀՀ-ում գործում է «Երթևեկության անվտանգության մասին» օրենք, որտեղ ասվում է, որ երթևեկության կանոնները սահմանվում են կառավարության որոշմամբ: «Համապատասխան կանոնները սահմանվել են կառավարության 2007թ. հուլիսի 28-ի որոշմամբ:  Եվ այդ կանոնների համաձայն՝ բնակավայրերում կարող է սահմանվել 60 կմ/ժամ արագություն, իսկ Երևանը բնակավայր է: Այնտեղ կան բացառությունն եր, որ 20 կմ/ժամ արագություն կարող է սահմանվել բնակավայրում, եթե դա բնակելի գոտու սկիզբ է կամ ավարտ, որը հիմնականում բակերն են: Նշված է նաև, որ Երևանից դուրս կարող է լինել 90 կմ/ժամ արագություն և 70 կմ/ժամ արագության հետ կապված մատնանշում կա կառավարության այդ որոշման մեջ: Այնտեղ շատ հստակ գրված է, որ մնացած բոլոր դեպքերում առավելագույն արագություն սահմանափակում նշանի կիրառումը կարող է թույլատրվել միայն երթևեկելու՝ սահմանված առավելագույնից բարձր արագությամբ: Այսինքն՝ առավելագույնից ցածր լինել չի կարող»,- նշեց Ազրոյանը:

Մանրամասնելով ասվածը՝ փաստաբանը նշեց, որ կառավարության որոշմամբ թույլատրվում են 60, 20,  որոշակի դեպքերում՝ 70 և Երևանից դուրս 90  կմ/ժամ արագություն սահմանափակող նշանները: «Այլ տիպի նշան՝ կլինի դա 40 կամ 50 կմ/ժամ արագություն սահմանափակող, չի կարող լինել, որովհետև կառավարության որոշմամբ նման վարչական ակտ չի թույլատրվում: Իսկ մեզ մոտ կա «վարչական վարույթների մասին» օրենք, որի 63-րդ հոդվածը սահմանում է ՝ օրենքի խախտմամբ, սխալ կիրառմամբ կամ սխալ մեկնաբանմամբ ընդունված վարչական ակտերը ոչ իրավաչափ են: Դուրս է գալիս, որ այդ նշանը, որն ինքն իրենով համարվում է վարչական ակտ, ընդունվել է օրենքի սխալ  մեկնաբանման և կիրառման արդյունքում: Դրա համար էլ դատարանը բավարարեց իմ հայցը և այդ վարչական ակտը ճանաչեց ոչ իրավաչափ»,- հավելեց Ռուզանն Ազրոյանը:

Նա ընդգծեց, որ վարչական  դատարանի որոշումը հրապարակվել է մարտի 29-ին և ուժի մեջ կմտնի մեկ ամիս հետո: «Մենք ունենք Դատական օրենսգիրք, որի 15-րդ հոդվածը հստակ սահմանում է, որ օրինական ուժի մեջ մտած դատական ակտերը պարտադիր են բոլորի համար և կարող են օգտագործվել նմանատիպ այլ հանգամանքներում: Փաստորեն, այս վարչական ակտը, որը ճանաչվել է ոչ իրավաչափ, դա կիրառելի է նաև մնացած բոլոր 40 կմ/ժամ արագություն սահմանափակող նշանների համար»,- ասաց Ազրոյանը:

Նա դժվարացավ հստակ պատասխանել, թե Երևանում 40 կմ/ժամ արագություն սահմանափակող քանի նշան կա, սակայն նշեց, որ Դավթաշեն-Եղվարդ ճանապարհի վրա 50 մետր տարբերությամբ երեք հատ նման նշան է դրված: «Կարելի է ենթադրել, որ նման նշաններ շատ այլ տեղերում էլ են տեղադրված»,- ընդգծեց Ռուզանն Ազրոյանը:

Փաստաբանը նաև հավելեց, որ որոշման ուժի մեջ մտնելուց հետո վարորդները, ովքեր նման վարչական ակտով կտուգանվեն, կարող են վիճարկել ակտը և անպայման կշահեն: Որոշումը, սակայն, հետադարձ ուժ ունենալ չի կարող: Այսինքն, այն վարորդները, ովքեր նախկինում տուգանվել են նման խախտման համար, վիճարկելու իրավական հիմքեր չեն ունենա, որովհետև Վարչական դատավարության օրենսգրքի համաձայն վիճարկման հայցերով դատարան կարող են դիմել երկամսյա ժամկետում: Նրանք, ովքեր արդեն բաց են թողել այդ ժամկետը բողոքելու իրավական հիմքեր չունեն: