«Մեր բակ»-ի Լալան, Հրանտը, Աշոտը, 90-ականների սեքս-սիմվոլ Լիլիթ Կարապետյանը՝ Armenia TV-ի «Վերնիսաժ»-ում

PHOTO 1 April, 2016 11:26

Tert.am-ը գրում է.

Հեռուստադիտողից խնամքով թաքցված ու կապույտ էկրանից դուրս մնացած բոլոր կադրերն ու պատմություններն այլևս գաղտնազերծվելու են։ Այսօր Armenia TV-ն իր հեռուստադիտողին է ներկայացնում նոր՝ «Վերնիսաժ» անվամբ հեռուստաշոու, որի շրջանակներում հայտնի մարդիկ վերհիշելու են՝ հայտնի դեպքերն ու պատմությունները, պատմելու են կուլիսներից այն կողմ կատարվածի մասին։

«Վերնիսաժ»-ը վարելու են Նազենի Հովհաննիսյանն ու Արտակ Հերիքյանը։ Առաջին հաղորդումը նվիրված է «Մեր բակը» երաժշտական կատակերգության 20-ամյակին։ Ինչպես Tert.am Youth-ի հետ զրույցում ասաց Նազենի Հովհաննիսյանը, «Մեր բակ»-ի մասին վերհիշելու շատ բան կա։

Իսկ հաղորդումն ինքնին, Նազենի Հովհաննիսյանի խոսքով, առաջին հերթին ուրախ, հաճելի, հետաքրքիր պատմությունների մասին է լինելու, բացահայտվելու են գաղտնի ու անհայտ երևույթները, որոնք կադրից դուրս են մնացել, որոնց մասին շատերը չգիտեն, չեն էլ լսել։

«Մենք չենք խոսելու այն ամենի մասին, ինչի մասին շատ է խոսվել։ Փորձելու ենք բացահայտել փակ, թերթերում մնացած, կադրից դուրս մնացած կարևոր, հետաքրքիր երևույթները։ Յուրաքանչյուրը կգտնի իրեն տասը հետաքրքիր րոպե, իր սերնդին բնորոշ պատմություն, յուրաքանչյուրը կունենա այն նոստալգիկ պատկերը, որը բոլորիս համար կարևոր է։ Նոր երևույթները հին տոմարով, հին երևույթները՝ նորովի․․․ Այս ամենը կլինի «Վերնիսաժ»-ում։ Սա կլինի հետաքրքիր գեղարվեստական խճանկար»,- նշեց Նազենի Հովհաննիսյանը։

Իսկ «Վերնիսաժ»-ի տաղավարում ֆիլմի 1-ին, 2-րդ, 3-րդ հատվածներում նկարված դերասաններն են՝ 90-ականների սեքս սիմվոլ Լիլիթ Կարապետյանը, Լալան, Հրանտը, Աշոտը:

Դերասան Հրանտ Թոխատյանն ասաց, որ ինքը միշտ հաճույքով է հիշում «Մեր բակ»-ի մասին, հատկապես՝ խաղահրապարակում բակի իրական բնակիչների հետ շփումները, նրանց հյուրընկալությունը։

«Սուրճ էին հասցնում, ջուր, մեզ տուն էին կանչում։ Մարդկանց վիճակը վիճակ չէր, բայց ամեն ինչ անում էին, որ մենք մեզ լավ զգայինք։ Դերասաններն ունեին իրենց սենյակը, բայց բնակիչները միշտ տուն էին հրավիրում ․․․ 96, 97 թվականներին «Մեր բակ»-ը նկարվեց որպես ամանորյա թողարկում, հետո, երբ ջերմ ընդունվեց հեռուստադիտողի մասին, նկարվեցին երկրորդն ու երրորդը։ Բայց առաջին հատվածում մի բան կար, չգիտեմ՝ չեմ կարող բացատրել, թե ինչ, որ հետո մյուսներում էլ չկային։ Դերասանները գալիս էին անգամ այն ժամանակ, երբ նկարահանում չունեին, որովհետև մթնոլորտը շատ ջերմ էր»,- Tert.am Youth-ի հետ զրույցում պատմեց դերասանը։

Հրանտ Թոխատյանի խոսքով՝ շատ դեպքերում նկարահանման հրապարակում էին ծնվում գաղափարները․ «Մի անգամ ընդմիջման ժամանակ, երբ բոլորը գնացել էին, տեսախցիկը միացրած էին թողել ու ես մի ամբողջ դրվագ նկարվել էի։ Ֆիլմի մեջ այդ կտորը չկա, բայց ես պահպանել եմ այն՝ որպես ինձ համար հետաքրքիր էպիզոդ»։

Ի դեպ, Հրանտ Թոխատյանի հայտնի վերարկուն՝ կաթնագույն «տռենչը», գոտկատեղից բարձր գոտիով մինչ օրս պահպանվում է։ Դերասանն ասաց, որ վերարկուն 90-կաններին բնորոշ իր է, ուստի խնամքով պահում է իր տանը, որ գլխարկի պես չկորի։

Թոխատյանն անկեղծացավ, որ ի սկզբանե վերարկուն նախատեսված չի եղել գոտիով կապելու համար․«Երբ որ զգեստապահարանում էինք, հագա վերարկուն, մի բան կարծես պակաս լիներ։ Հետո գոտին պատահաբար վերև բարձրացավ, Միքայել Դովլաթյանն ասաց՝ վերջ, այսպես պիտի լինի ու այդպես էլ մնաց»։

Պրոդյուսեր, դերասան Կարեն Ղազարյանն էլ ասաց, որ «Մեր բակ»-ն իր բնույթով բակ էր։ «Ցանկացած մարդ գիտի՝ ինչ է կատարվում մեր բակում, որի մասին խոսել չի կարելի։ Դա մեր կյանքն էր, «Մեր բակ»-ը բակ էր, բոլորիս բակն էր»,- ասաց դերասանը։

Բացելով փակագծերը՝ Կարեն Ղազարյանը հիշեց «Մեր բակը-2»-ում իր և Արմեն Ջիգարխանյանի հայտնի դրվագը՝ նկուղում «Ժամանման վայրը փոխել չի կարելի» ֆիլմի նմանակման նկարահանման վերաբերյալ։ «Նստած էի, բան էի ուտում, ինձ հարցնում էին՝ մենակ պատասխանում էի, եթե հիշում եք, ու այնքան վատ էի ինձ զգում, որովհետև երբեք այդքան բորշչ չէի կերել, ինչքան այդ օրը։ Այնքան էինք փորձել նկարել այդ դրվագը, որ երևի մի քանի աման բորշչ էի կերել»,- պատմեց Կարեն Ղազարյանը։