Ադրբեջանական հերթական սադրիչ ակցիան
BLOGԱրմեն Հովասափյանը Ֆեյսբուքյան իր էջում գրում է.
Լեռնային Ղարաբաղի ու Ադրբեջանի զինված ուժերի շփման գծում ապրիլի 1-ի լույս 2-ի գիշերը ադրբեջանական կողմը հարձակողական գործողություններ է ձեռնարկել հարավ արևելյան ու հյուսիսարևելյան ուղղություններով։ Ընդ որում, օգտագործվել է հրետանի, զրահատեխնիկա և օդուժ:
Ղարաբաղա-ադրբեջանական հակամարտ զորքերի շփման գծի ողջ երկայնքով ընթանում են ռազմական բախումներ: Առավել թեժ մարտեր են ընթանում արդեն ռազմաճակատի վերածված առաջնային գծի Հադրութի և Մարտակերտի ուղղություններով: Հաստատված տվյալներով՝ ղարաբաղյան ուժերը մարտագծի հարավարևելյան ճակատում շարքից հանել են երկու տանկ, մեկ ռազմական ուղղաթիռ, հյուսիսարևելյան ուղղությամբ՝ մեկ տանկ և երկու անօդաչու թռչող սարք:
Այս պահին հայկական զինուժը վերահսկում է իրավիճակը և համապատասխան քայլեր է ձեռնարկում խաղաղության և կայունության ապահովման համար: Ներկայումս դեռևս ընթանում են մարտական գործողությունները, ուստի շատ կարևոր է նաև ինֆորմացիոն անվտանգության և ճշգրիտ տեղեկատվության ապահովման անհրաժեշտությունը: