Պատգամավորները դատապարտում են Ադրբեջանի ագրեսիան և ահաբեկչական գործողությունները

Վերջին ամիսներին միջազգային կառույցների, Մինսկի խմբի հասցեին ագրեսոր Ադրբեջանի պարբերաբար քննադատությունները խոսում էին այն մասին, որ նա խաղաղ բանակցային փուլը ցանկանում էր փոխարինել ռազմական գործողություններով և ահաբեկչությամբ: Ազգային ժողովի նիստի ընթացքում այս մասին ասաց ԱԺ ՀՀԿ խմբակցության ղեկավար ՎահրամԲաղդասարյանը: «Գաղտնիք չէ, որ այսօր Ադրբեջանում ներքաղաքական իրավիճակը ծայրահեղ լարված է: Տնտեսական և սոցիալական խնդիրներից բնակչությանը շեղելու համար նրանք ընտրել են ռազմական ճանապարհը»,-«Արմենպրես»-ի հաղորդմամբ՝ նշեց Բաղդասարյանը:

Նա միջազգային հանրությանը, մասնավորապես, Մինսկի խմբի համանախագահներին կոչ արեց սաստել ալիևյան ագրեսիվ, միջազգային պայմանագրերն արհամարհող պահվածքը: «Տեղեկացնում ենք, որ այսօր բոլոր քաղաքական ուժերը միասնական են: Երկրապահ կամավորականները՝ շուրջ 1000 մարդ, իրենց փորձով և հմտությամբ մեր զինվորի կողքին են, իսկ Լեռնային Ղարաբաղի պաշտպանության բանակը լիովին տիրապետում է իրավիճակին»,- ընդգծեց ՀՀԿ խմբակցության ղեկավարը:

ՀՀԿ խմբակցության պատգամավոր, ԱԺ պաշտպանության, ազգայինանվտանգության և ներքին հարցերի մշտական հանձնաժողովի նախագահԿորյուն Նահապետյանն էլ ընդգծեց, որ հայ ժողովուրդը միաբանված է ադրբեջանական ագրեսիան սանձելու հարցում: «Ստեղծված ռազմաքաղաքական իրավիճակը պահանջում է համակարգված գործողություններ բոլոր ուղղություններով: Գիտեք, որ այս պահին ընթանում են ռազմական գործողություններ, և Արցախի պաշտպանության բանակն իրականացնում է հաջող մարտեր՝ հակառակորդին պատճառելով կենդանի ու ժի և զինտեխնիկայի զգալի կորուստներ: Շատ կարևոր է, որ մենք կարողանանք մեր ռազմական հաջողություններն ամրագրել քաղաքական և դիվանագիտական մակարդակում: Ռազմական և քաղաքական գործողությունների ճիշտ համադրումն ունի առանցքային նշանակություն: Ես ցանկանում եմ առանձնակի կարևորել Լեռնային Ղարաբաղի հակամարտության գոտու շուրջ անվտանգության ամրապնդումը: Այսօր արդեն խոսվում է աջակցության տարբեր ծրագրերի մասին, և կարծում եմ, որ այստեղ խորհրդարանը նույնպես ունի իր պատասխանատվության աստիճանը՝ իրականացնել աջակցության նպատակային ծրագրեր: Խորհրդար անական դիվանագիտական տարբեր հարթակներում մենք պետք է իրականացնենք առավել նպատակային աշխատանք՝ ստեղծված իրավիճակը ներկայացնելու և մեր հաջողություններն արձանագրելու առումով»,- նշեց Նահապետյանը:

Ազգային ժողովի ՀԱԿ խմբակցության քարտուղար Արամ Մանուկյանն էլ կոչով դիմեց ադրբեջանական զինուժի նախահարձակ գործողությունների հետևանքով զոհված հայ զինծառայողների ծնողներին և հարազատներին. «Ես ցանկանում եմ ամրագրել մեր ցավակցությունը, մեր աջակցությունը մեր հերոսների ծնողներին և հարազատներին: Նրանք բոլորը իսկապես ազգային հերոսներ են: Բոլորը իրենց երիտասարդ կյանքի գնով կասեցրել են թշնամու առաջխաղացումը, արժանապատվորեն պահել են մեր սահմանները, մեր արժանապատվությունը, մեր անկախությունն ու պետականությունը: Բոլոր զոհերը սրբացել են՝ միանալով արցախյան ազատամարտի բոլոր սուրբ նահատակներին: Ես դիմում եմ ծնողներին, որ այդ անչափ ցավի հետ իրենք տոգորվեն հպարտության զգացումով, որովհետև ցանկացած սուրբ նահատակ պատմական ազգային հպարտություն է, որը յուրաքանչյուրինս է, բայց առաջին հերթին՝ ծնողներինը: Ես ցանկանում եմ հավաստել նրանց, որ մենք իրենց կողքին ենք, մեր ժողովուրդը ըստ արժանվույն կպահի մեր հերոսների հիշատակը»,- եզրափակեց Մանուկյանը:

Ապրիլի 1-ի լույս 2-ի գիշերը և առավոտյան Ադրբեջանը ղարաբաղա-ադրբեջանական հակամարտ զորքերի շփման գծի ողջ երկայնքով ձեռնարկել է լայնածավալ նախահարձակ գործողություններ, որոնց ընթացքում հրթիռահրետանային արկակոծման են ենթարկվել ոչ միայն հայկական զինուժի պաշտպանական դիրքերը, այլև խաղաղ բնակավայրերը: Ադրբեջանական զինուժի կողմից ապրիլի 2-ին ժամը 08:30-իսահմաններում Մարտունու պաշտպանական ուղղությամբ ՄՄ-21 («Գրադ») կայանքից իրականացված հրթիռահրետակոծության հետևանքով սպանվել է 12-ամյա Վաղինակ Թաթուլի Գրիգորյանը, ևս երկու երեխա վիրավորվել են: Ավելի ուշ Ստեփանակերտի հիվանդանոց է տեղափոխվել ևս չորս վիրավոր քաղաքացիական անձ: Իսկ ապրիլի 3-ին հայտնի դարձավ, որ Թալիշում նախօրեին ադրբեջանցիները գազանային կերպով գնդակահարել են երեք խաղաղ բնակչի, որոնք չէին հասցրել տարհանվել: Լեռնային Ղարաբաղի Պաշտպանության բանակի՝ ժամանակին և արհեստավարժ գործողությունների շնորհիվ հնարավոր է եղել իրավիճակը վերցնել վերահսկողության տակ և զգալի կորուստներ հասցնել հակառակորդին. ապրիլի 1-ի լույս 2-ի գիշերը և օրվա ընթացքում տեղի ունեցած մարտական գործողությունների ընթացքում ադրբեջանական զինուժը տվել է 200-300 կորուստ: Շարքից հանվել է, ընդհանուր առմամբ, թշնամական 18 տանկ, մեկ «Գրադ» կայանք: Հայկական կողմն ունի 18 զոհ և մոտ 37 վիրավոր: Առաջնային գծի հարավային ուղղությամբ ապրիլի 3-ին՝ ժամը 06:00-ից սկսած, հակառակորդը հրթիռահրետանային միջոցների և զրահատեխնիկայի կիրառմամբ շարունակել է ագրեսիվ ռազմական գործողությունները: ՊԲ ստորաբաժանումներն անցել են հակազդիչ գործողությունների և Թալիշի ուղղությամբ տիրել նախօրյակին ադրբեջանական ուժերի կողմից գրավված մարտավարական կարևոր նշանակության հենակետին: