Արեգունի համայնքը փառով հավերժություն ճանապարհեց իր հերոս զավակ Հարությունին

Գեղարքունիքի մարզի Արեգունի համայնքն այսօր փառքով հավերժություն ճանապարհեց Հայոց բանակի պայմանագրային զինծառայող,Արցախի պաշտպանական դիրքերում հերոսի մահով ընկած իր զավակին՝ Հարություն Հովհաննեսի Աբրահամյանին: «Արմենպրես»-ի տեղեկացմամբ՝ հուղարկավորությունից առաջ հերոսի աճյունը տեղափոխվեց Արեգունու միջնակարգ դպրոց, որտեղ նրան վերջին հրաժեշտն ու խոնարհումը տալու համար հավաքվեցին Արեգունու եւ շրջակա համայնքների բնակիչները, ուսուցիչները, հերոսի մտերիմները, ծառայակից ընկերները,  պետական եւ տեղական ինքնակառավարման մարմինների ներկայացուցիչները: Հրաժեշտի հանդիսավոր խոսքեր հնչեցրին Ավազան գյուղի հիմնական դպրոցի տնօրեն, ազատամարտիկ Սարգիս Լալայանը, Արեգունու միջնակարգ դպրոցի տնօրեն Նորիկ Վարդանյանը, Արեգունու միջնակարգ դպրոցի ուսուցիչ Սոս Հովհաննիսյանը, համայնքի բնակիչ Ալվինա Բաբայանը: Իրենց սրտառուչ խոսքերում նրանք նշեցին, որ Հարությունն իրեն փառքով է պսակել թշնամուց հայրենի հողն ազատագրելու համար մղվող մարտում եւ իր կյանքի ու արյան գնով նվաճել մեր նորօրյա հաղթանակն ու խաղաղությունը: Ինչպես ներկաներին ծանուցեց  ՀՀ ՊՆ Վարդենիսի տարածքային զինվորական կոմիսար, փոխգնդապետ Գարիկ Առաքելյանը, գործած սխրանքի եւ անձնուրացության համար Լեռնային Ղարաբաղի Հանրապետության Նախագահ Բակո Սահակյանը Հարություն Աբրահամյանին հետմահու պարգեւատրել է «Մարտական ծառայության համար» մեդալով: Պարգեւը զինկոմի կողմից հանձնվեց հերոսի հորը՝ Արցախյան ազատամարտում պայքարի հաղթական ուղի անցած Հովհաննես Աբրահամյանին:»Հարությունը երեք անչափահաս երեխայի հայր էր՝ անմնացորդ նվիրված իր հող ու ջրին, հայրենիքի պաշտպանության սուրբ գործին:

Մի կողմից նա սահմանապահ զինվոր էր, մյուս կողմից՝ տնտեսության մեջ զինծառայությունից ազատ օրերին բարիք ստեղծող, զավակներին ու ծնողներին կերակրող: Նա ազատամարտիկ Հովհաննես Աբրահամյանի մինուճար զավակն էր, չուներ քույր կամ եղբայր: Թշնամու կողմից վերսկսված պատերազմի լուրը լսելուն պես Հովհաննեսը հագել էր զրահաբաճկոնը, վերցրել զենքը եւ մեկնել ճակատ՝ դիմագրավելու մեր հայրենիքի վրա եկած չարիքի հեղեղը, սակայն կես ճանապարհին լսել էր իր սիրելի որդու զոհվելու լուրը եւ հետ վերադարձել: Մենք համայնքով ամեն կերպ կօժանդակենք մեր սիրելի հերոսի ընտաիքին, կանենք ամեն ինչ, որ Հովհաննեսը մխիթարվի իր թոռներով, նրանց պահի ու մեծացնի ապահով վիճակում, առանց դժվարությունների»,-նշեց դպրոցի տնօրեն Նորիկ Վարդանյանը:»

Այն, որ թշնամին ջախջախվեց ու հետ շպրտվեց մեր սուրբ հողից, եղավ միայն Հարությունի ու իր ծառայակից ընկերների, առաջնագիծ մեկնած մեր կամավորների հավաքական ու անկոտրում կամքի շնորհիվ: Հերթական հաղթանակն  ու խաղաղությունը մենք կարողացանք նվաճել այս հերոս տղաների կյանքի ու արյան գնով եւ միշտ պետք է ապրեցնենք նրանց անունն ու գործը:Մեր զինկոմիսարիատից զորակոչված հաջորդ հերոս մարտիկը Փոքր Մասրիկ գյուղի բնակիչ Վրեժ Վարդանի Սարգսյանն էր, որին եւս այսօր փառքով ճանապարհեցինք դեպի հավերժություն»-իր խոսքում նշեց  Վարդենիսի զինվորական կոմ իսր, փոխգնդապետ Գարիկ Առաքելյանը:Հարություն Աբրահամյանի աճյունն ամփոփվեց հայրենի Արեգունի գյուղի գերեզմանատանը: Նրա հուղարկավորությունը վերածվեց համաժողովրդական  համախմբման ու ոգեկոչման տուրքի:

Խոսրով Խլղաթյան