Արցախին աջակցություն են հայտնել աշխարհի տարբեր ծայրերից

Այս քառօրյա պատերազմի ընթացքում աշխարհի տարբեր ծայրերում գտնվող հայերը համախմբված դուրս էին եկել փողոցներ՝ իրենց բողոքն արտահայտելու Ադրբեջանի սադրիչ, հարձակողական գործողությունների դեմ եւ միջազգային հանրության ուշադրությունը ղարաբաղա-ադրբեջանական հակամարտության դադարեցմանն ուղղելու նպատակով:

Այսպես, Գլենդելում Հայաստանի դեսպանատան դիմաց բողոքի ցույց էին կազմակերպել ամերիկահայերը՝ Ադրբեջանի կողմից հարձակողական գործողությունները դադարեցնելու պահանջով: Հրապարակում հավաքված երիտասարդությունը ռազմա-հայրենասիրական, ազգային երգեր էր կատարում, բարձրաձայն աղոթք կարդում: Հավաքվածներին էր միացել նաեւ Գլենդելի քաղխորհրդի ներկայացուցիչ Վարդան Կարապետյանը:

Հունաստանի մայրաքաղաքում Հայ հեղափոխական դաշնակցությունը բողոքի ցույց էր կազմակերպել՝ Լեռնային Ղարաբաղում Ադրբեջանի կողմից լայնածավալ հարձակողական գործողությունների դեմ: Ինչպես գրում է հունական «Ազատ օր» պարբերականը, Արցախի ժողովրդին աջակցություն ցուցաբերելու եւ Ադրբեջանի կողմից ռազամական գործողությունների դատապարտման նպատակով Աթենքում Ադրբեջանի դեսպանատան դիմաց էին հավաքվել տեղի հայերը: Ցույցը ղեկավարում էր Հունաստանի ՀՅԴ Հայ դատի խումբը: Ցույցին միացել էին նաեւ հույները, մասնավորապես՝ Հունաստանի Պոնտական միության անդամները: Ադրբեջանի դեսպանությունը ստիպված էր ցուցարարների պահանջները հաշվի առնել, եւ «Ղարաբաղը մերն է» վանկարկումների ներքո դեսպանատան ներկայացուցիչներից մեկը վերցրեց ցուցարարների նամակը:

Լիբանանի մայրաքաղաք Բեյրութում նույնպես մեր հայրենակիցների կողմից ցույցեր իրականացվեցին: Բուրչ Ամուդ թաղամասի հրապարակում հավաքվել էին հազարավոր մարդիկ, ովքեր իրենց ձեռքերում պահել էին Արցախի ժողովրդին իրենց աջակցությունը հայտնող եւ Ադրբեջանի գործողությունները դատապարտող գրություններով ցուցապաստառներ:

Ապրիլի հինգին Ադրբեջանի դեսպանատան դիմաց ցուցարարներ էին հավաքվել նաեւ Փարիզում: Հնչել էին կոչեր, որ պետք է դատապարտել նաեւ նրանց, ովքեր աջակցում էին Ալիեւին եւ նրա գործելաոճը:

Ցույցեր տեղի ունեցան նաեւ Իսպանիայում, մասնավորապես՝ Վալենսիայում: Հավաքվածներն իրենց ձեռքերում պահել էին «Մենք բոլորս Արցախն ենք, մենք բոլորս հայեր ենք», Stop Azerbaiyan! գրություններով պաստառներ: Ցույցին մասնակցել էին Վալենսիայի մարզի գրեթե բոլոր քաղաքները, Միսլատի, Մանասեսի, Կարկախենթի եւ այլ բնակավայրերը, ինչպես նաեւ «Իսպանիա-2000» կուսակցության նախագահ Խոսե Լուիս Ռոբերտոն եւ կուսակցության անդամները: Արգենտինայի հայերը նույնպես իրենց աջակցությունն էին հայտնել Արցախի ժողովրդին: Բուենոս Այրեսում Ադրբեջանի դեսպանատան դիմաց մեր հայրենակիցները բողոքի երթ էին կազմակերպել: Արգենտինայի հայկական թեմի արքեպիսկոպոս Գիսակ Մուրադյանը Արցախում զոհվածների հոգիների հանգստության համար աղոթք է կարդացել: Այնուհետեւ հայ համայնքն իր բողոքի նամակն է հանձնել դեսպանատան ներկայացուցչին:

Ավստրիայում էլ հայ համայնքը բողոքի ցույց էր կազմակերպել: Ակցիայի մասնակիցները «Մենք խաղաղություն ենք ուզում», «Ադրբեջա´ն, ձեռքդ հեռացրու Արցախից», «Հարգե՛ք մեր ինքնորոշման իրավունքը» գրություններով պաստառները ձեռքներին հավաքվել էին Վիեննայում տեղակայված ԵԱՀԿ շտաբի դիմաց: Ցույցեր են տեղի ունեցել նաեւ ԱՄՆ-ում, մասնավորապես՝ Լոս Անջելեսում:

Քրիստինա Տեր-Մաթեւոսյան