Բոլորը կպատժվեն, երբ խաղաղվի. Զոյա Թադևոսյան

Առաջին նախագահ Լևոն Տեր-Պետրոսյանի և գործող նախագահ Սերժ Սարգսյանի հանդիպմանը հաջորդեցին բազմաթիվ վերլուծություններ և մեկնաբանություններ: Ինչպես հայտնի է, Լևոն Տեր-Պետրոսյանը հարցազրույց տվեց ilur.am կայքին՝ ներկայացնելով որոշակի մանրամասներ հանդիպումից: Այդ հարցազրույցը ֆեյսբուքում սկսեցին share և like անել նույնիսկ Հանրապետական կուսակցության անդամներ, չինովնիկներ և մարդիկ, ովքեր նշում էին, որ չէին մտածի, թե կարող են Լևոն Տեր-Պետրոսյանի որևէ հարցազրույց տեղադրել իրենց ֆեյսբուքյան պատին: Տեր-Պետրոսյանն ընդգծեց, որ բանակցությունների սեղանի շուրջ Սերժ Սարգսյանը պետք է իրեն ուժեղ զգա, ունենալով իր ժողովրդի աջակցությունը: Բայց, ըստ Լևոն Տեր Պետրոսյանի, վարչախումբը պարտավոր է որոշակի դրական քայլեր կատարել, դեմքով շրջվել դեպի ժողովուրդը, պայքար մղել կոռուպցիայի, մենաշնորհների, ընտրակեղծիքների և այլ չարիքների դեմ:

Past.am-ը ՀԱԿ ներկայացուցիչ Զոյա Թադևոսյանին հարցրեց՝ կա՞ հույս, որ հարցազրույցի այդ հատվածը տեղ կհասնի և կարվեն հետևություններ: «Այդ խնդրին չեմ կարող նայել հույսի տեսանկյունից: Ես կնայեի պարտավորությունների տեսանկյունից: Եթե ստեղծված է այսպիսի վիճակ, պետականության լինել-չլինելու խնդիրն է դրված, իսկ սրա պատասխանատուն իշխանություններն են, որոնք իրենց թալանով թուլացրին մեր ազգային անվտանգության պաշտպանությունը, այստեղ արդեն հույսի մասին չենք խոսում: Պարտավոր են դա անել: Հակառակ դեպքում՝ հայ ժողովուրդը նրանց շատ խիստ կպատժի»,-նշեց տիկին Թադևոսյանը:

Հարցին՝ իշխանությունները խոհեմ կգտնվե՞ն, Թադևոսյանը պատասխանեց, որ ինքնապաշտպանության բնազդը պետք է աշխատի: Մեր զրուցակցի խոսքով՝ եթե իշխանություններն իմանան որ հայ ժողովուրդը նրանց կպատժի, ապա նրանք կգիտակցեն իրավիճակի կարևությունը: «Եթե հայ ժողովուրդը ցույց տա հավաքական գիտակցություն, ապա իշխանությունը կարժևորի այն: Առաջին նախագահը շատ տեղին կոչ է արել: Բայց միևնույն է, նրանք պատժվելու են, իրենց գործածները հենց այնպես չեն կորչելու: Սակայն այս պահին իշխանությունները պարտավոր են քայլեր անել, քանի դեռ մեր գլխին կախված է պատերազմի վտանգը: Հետո բոլորը պատասխան կտան, երբ կխաղաղվի»,-նշեց Թադևոսյանը:

Ճշտեցինք նաև Զոյա Թադևոսյանի կարծիքն այն մեկնաբանությունների վերաբերյալ, թե առաջին նախագահը լեգիտիմացնում է գործող իշխանություններին: Զ. Թադևոսյանն ասաց, որ դա նորմալ է, քանի որ ժողովրդի համբերության բաժակը լցվել է: ՀԱԿ-ի ներկայացուցչի կարծիքով՝ մենք պետք է հասկանանք նրանց, ովքեր երեխաներ կորցրեցին բանակում, ովքեր հարցի շուտափույթ լուծման են սպասում, բոլորն էլ իրավունք ունեն իրենց վրդովմունքն արտահայտել:

Բայց, ըստ Զոյա Թադևոսյանի, իրավիճակից դուրս գալու քաղաքական լուծումները հասարակ մահկանացուներս չենք պատկերացնում ամբողջությամբ, դրանք ճիշտ կլինի, որ քաղաքական գործիչները լուծեն: «Քաղաքական թիվ 1 գործիչը՝ առաջին նախագահը, այդ լուծման բաղադրատոմսն ունի, հավանաբար: Կարծում եմ, որ նրա անմիջական խորհրդատվությամբ ինչ-որ լուծումներ կգտնվեն: Այստեղ ես արդեն հույսի դաշտում պետք է խոսեմ՝ ընդգծելով, որ այդ հույսն ունեմ: Բայց չեմ պատկերացնում, թե որքանով հույսս ու հավատս կարդարանան»,-խոսքը եզրափակեց Զոյա Թադևոսյանը:

Լևոն Փանոսյան