Զինվորի կյանքը շատ ավելի թանկ է, քան պարտավորությունները ԵԱՏՄ-ի կամ Անգելա Մերկելի առաջ.Սերգեյ Շաքարյանց

Քաղաքագետ Սերգեյ Շաքարյանցի կարծիքով՝ վարչապետ Հովիկ Աբրահամյանը չպետք է այցելեր Մոսկվա՝ մասնակցելու ԵԱՏՄ միջկառավարական հանձնաժողովի նիստին:

Այս մասին նա հայտնեց Past.am-ի հետ զրույցում:

Ըստ Շաքարյանցի՝ եթե ՀՀ իշխանությունները մեղադրանք են ներկայացնում Ղազախստանին, որն իր քայլերով ԵԱՏՄ-ն քայքայում է, ապա շատ ճիշտ կլիներ գտնել մի ձև՝ հասկացնելու Ղազախստանի և Ռուսաստանի դեմ ուղղված մեր բողոքը: Բացի դրանից, մեր զրուցակցի խոսքով, պետք էր հետ կանչել Տիգրան Սարգսյանին, որը պաշտոն է ստացել ԵԱՏՄ-ում: Քաղաքագետի համոզմամբ՝ դա կլիներ նորմալ իշխանությունների քայլ: «Իշխանությունները պետք է հասկանան, որ մեր զինվորի կյանքը շատ ավելի թանկ է, քան պարտավորությունները ԵԱՏՄ-ի կամ Անգելա Մերկելի առաջ: Մի քիչ պետք է ազգային արժանապատվությունը բարձր պահել»,- ընդգծեց պարոն Շաքարյանցը:

Սերգեյ Շաքարյանցը դեմ է Եվրասիական տնտեսական միությունից դուրս գալուն, քանի որ դրանով Հայաստանը կզրկվի այն արտոնյալ գներից, որոնք սահմանվում են: «Բոլորս հասկանում ենք, որ գոյատևել ինչ-որ օդային տնտեսական տարածքում, հնարավոր չէ: Ես հավաստի կարող եմ ասել՝ որևէ երկիր Հայաստանին ավելի էժան վառելիք չի առաջարկի, չնայած նրան, որ կարող ենք փորձել բանակցել Իրանի հետ: Դուրս գալն անիմաստ է: Մեզ Եվրամիությունում չեն սպասում: Եթե Արևմուտքը թքած ունի 40 միլիոնանոց ուկրաինացիների վրա, բնական է, որ թքած կունենա նաև 3 միլիոն հայերի վրա»,- համոզված է Սերգեյ Շաքարյանցը:Ինչ վերաբերում է ՀԱՊԿ-ից դուրս գալուն, քաղաքագետն ասաց, որ պետք եթե ոչ դուրս գալ, ապա գոնե սառեցնել մասնակցությունն այդ կառույցում կամ մնալ դիտորդ-երկրի կարգավիճակում, քանի դեռ չեն կարգավորվել որոշ տեխնիկական խնդիրներ: «Բայց այս հարցում չունենք այլընտրանք: Կարող են ՆԱՏՕ մտնելու կոչեր լինել: Ես դեմ եմ կտրականապես: Հունաստանը ՆԱՏՕ-ի մեջ է, նրանց հարցերը թուրքերի հետ լուծվո՞ւմ են: Համենայն դեպս, ՄԱԿ-ի դրոշի ներքո Կիպրոսի խնդիրը դեռևս լուծում չի ստացել, Հյուսիսային Կիպրոսը շարունակում զավթված մնալ թուրքերի կողմից:Հիմա պետք է ոչ թե ՀԱՊԿ-ից դուրս գալ, այլ պետք է օգտագործել այն իրավունքները, որոնք մենք ունենք որպես նախագահող երկիր: Պետք է դրդել Բելառուսին և այդ կառույցի մյուս անդամներին, որպեսզի նրանք հայտարարություններ անեն՝ շեշտելով, որ Ադրբեջանի արածն ագրեսիա է: Բայց Սերժ Սարգսյանը դա չի անի: Նա ուզում է, որ իր «նեղացած հայացքից» Պուտինն ու Լուկաշենկոն ազդվեն՝ ուղարկելով մեծ բանակ, որը սեփական կորուստների գնով ոչնչացնի Ադրբեջանը կամ Թուրքիան, նվիրեն հայերին:Սա բոլոր հայ «դուքյանչիների» երազանքն է՝ թող ուրիշն անի ու մեզ նվիրի: Բայց կներեք, դա էշություն է: 21-րդ դարում հետամնաց հոգեբանության դրսևորում է նման մտածելակերպ ունենալը: Ոչ ոք չի անցնի քո կողմը, մինչև չտեսնի քո անկոտրում կամքը»,- նշեց քաղաքագետը:

Մեր զրուցակցի կարծիքով՝ պետք է ճիշտ ընտրել պատերազմներից հետո այցելությունների վայրերը: Նրան պնդմամբ՝ չարժե նետվել «երրորդ կարգի» երկրների վարչապետի գիրկը, երբ առաջնահերթ հարկավոր էր այցելել Իրան, քանի որ պատերազմական օրերին հայտարարություններ կային հենց Իրանից: «Ես ստիպված եմ ասում, որ Սերժ Սարգսյանի խորհրդականները բան չեն հասկանում քաղաքականությունից, այդպես էլ բան չեն հասկացել նախագահական երկու ժամկետների ընթացքում: Բայց դա ամոթ է և՛ Սերժ Սարգսյանի համար, և՛ այն մարդկանց, ովքեր խորհուրդ են տվել այցելել Գերմանիա: Լսե՛ք, Էրդողանն իր ձեռքով ահաբեկչություններ է սարքում իր երկրում, հետո դա պատճառ է բռնում, որ չայցելի նույնիսկ Ադրբեջան, քանի որ երկրում սուգ է: Մեր նախագահը չի մնում Երևանում այդ օրերին, երբ զոհված զինվորների մարմիններ ենք ստանում, նա գնում է կանցլեր Մերկելի հետ հանդիպման ու «Դոյչե Վելեին» հարցազրույց տալու: Ինքն ապացուցում է, որ քաղաքականությունից հեռու մարդ է: Ոչ մի տեղ չպետք է գնալ, հարկավոր է մնալ ազգի հետ: Բայց եթե գնում ես, ապա գոնե գնա Իրան, որտեղից այս վերջին գործողությունները գնահատվել են որպես «ագրեսիա Իրանի տարածքի դեմ»:

Նախագահի այդ կոպիտ սխալները դեր կխաղան հետագայում: Տա Աստված, որ շատ ծանր չնստի այդ ամենը շարքային քաղաքացու ուսին: Ես ապագան գուշակել չեմ կարող, չգիտեմ՝ ինչ կլինի»,- ասաց Սերգեյ Շաքարյանցը:

Լևոն Փանոսյան