Նորմա՞լ է, որ ՀՀ քաղաքացիները վճարեն Ադրբեջանի հետախուզության համար. Անի Հովհաննիսյան

Արդեն մի քանի ամիս է Analitik.am կայքն անդրադառնում է ՎՏԲ Հայաստան բանկին՝ նշելով, որ այն ունի ադրբեջանական կապիտալ, որը վտանգավոր է Հայաստանի համար: Վերջին շրջանում էլ նախաձեռնվել է ստորագրահավաք, որը պահանջում է ԿԲ-ին զրկել ՎՏԲ Հայաստան բանկին արտոնագրից: Այս հարցերի շուրջ զրուցեցինք Analitik.am կայքի հիմնադիր Անի Հովհաննիսյանի հետ:

Ի՞նչն է պատճառը, որ արդեն երկար ժամանակ է Ձեր հիմնադրած կայքը ՎՏԲ-ին հանգիստ չի թողնում:

ՎՏԲ-ի հետ որպես կազմակերպություն որևէ խնդիր չկա և ոչ էլ ՎՏԲ-ի կապիտալի հիմնական բաժնետեր հանդիսացող ՌԴ կառավարության հետ խնդիր կա: Խնդիրը ՎՏԲ բաժնեմասերի 3 տոկոսի սեփականատեր Ադրբեջանի նավթային ֆոնդի հետ է, որը փաստացի հանդիսանում է նաև ՎՏԲ Հայաստանի հիմնադիր: Ինչպես գիտենք ՀՀ սահմանադրությամբ էլ ամրագրված է, որ եթե թշնամական երկրին ՀՀ քաղաքացին ուղղակի կամ անուղղակի կերպով օգուտ է տալիս՝ այստեղ կապ չունի 3, թե 20 տոկոսի չափով, ապա դա համարվում է պետական դավաճանություն: Ադրբեջանի հանրապետությունը թշնամի՞ երկիր է Հայաստանին, թե ո՞չ, Ձեզ եմ հարցնում, եթե ոչ, ուրեմն նորմալ է, կարող են ադրբեջանական կապիտալով ընկերություններն անարգել գործել Հայաստանում: Թող որևէ պետական պաշտոնյա հայտարարի, որ Ադրբեջանն այսուհետ մեզ թշնամի երկիր չէ և տնտեսական շահերից ելնելով կարող է Հայաստանում կազմակերպություններ հիմնել և շահույթներ ստանալ և թող հիմնավորի դա, կա՞ մեկը ՀՀ-ում, որ կարող է նման հայտարարություն անել: Կարծում եմ՝ ոչ:

Իսկ բացի Ադրբեջանին շահույթ ապահովելուց ուրիշ ի՞նչ խնդիրներ կան, եթե ՎՏԲ-ն շարունակի գործել ՀՀ-ում:

Համարենք, որ նորմալ է այն, որ ՎՏԲ Հայաստան բանկին տված ՀՀ քաղաքացիների օգուտի 3 տոկոսը գնում է Ադրբեջանին և ասենք, օգտագործվում զենք առնելու համար: Համարենք, որ նորմալ է, որ մեր զոհված զինվորների վրա կրակած զենքի գումարի, ասենք 1 կամ 3 տոկոսը վճարում ենք հենց մենք, իսկ նորմա՞լ է, որ ՎՏԲ Հայաստան բանկի միջոցով Ադրբեջանի հանրապետությունը տեղեկություններ է ստանում ՀՀ քաղաքացիների աշխատավարձերի չափի, բիզնեսների շրջանառության, թոշակների չափի և մնացած այլ կարևոր ոլորտների հետ կապված: Սա հետախուզությո՞ւմ է, թե ոչ: Պատկերացնում եք՝ ինչ հարմար է ստանալ տեղեկություններ և դրա հետ միասին նաև փող աշխատել, այլ ոչ թե ծախսել: Սա հիմնավորված է, քանի որ ՎՏԲ-ի կանոնադրությամբ ամրագրված է, որ Վերահսկիչ տնօրենների խորհրդի անդամը, իսկ Ադրբեջանն ունի նման ներկայացուցիչ այդ խորհրդում, իրավունք ունի ստանալ իրեն հետաքրքրող տեղեկությունները, եթե դա էլ է նորմալ, որ ՀՀ քաղաքացիները վճարեն Ադրբեջանի հետախուզության համար, ուրեմն, կներեք, ապա հոգեբանական լուրջ խնդիրներ ունեցող մարդիկ շատ են մեր շրջապատում՝ չնայած վստահ եմ, որ ճնշող մեծամասնությունը, եթե ոչ բոլորը, հասկանում են հարցի լրջությունը:

Լավ, իսկ ինչպե՞ս եք տեսնում հարցի լուծումը: ԿԲ-ին կզրկի՞ ՎՏԲ բանկին արտոնագրից:

ԿԲ-ի մասով, երևի հենց իրենց հարցնեք, սակայն մենք այլընտրանքային տարբերակ էլ ունենք: Հիմա չեմ ցանկանում մանրամասնել, այս պահին նախապատրաստվում են բոլոր անհրաժեշտ թղթերը և իրավական հիմքերը, որոնք հնարավորություն կտան ինչպես ՎՏԲ-ին, այնպես էլ ուղղակի կամ անուղղակի ադրբեջանական կապիտալ ունեցող ընկերություններին դուրս հանել Հայաստանից: Այս պահին արդեն կա հավաքված մոտ 5000 ստորագրություն, ինչպես նաև բազմաթիվ խախտումներ, որոնք արվել են ՎՏԲ Հայաստանի կողմից, որոնք հերթով ներկայացվելու են և համապատասխան իրավական պահանջներ են առաջադրվելու:

Ուրիշ ի՞նչ քայլեր են արվում այս հարցի կարգավորման համար:

Բոլոր հնարավոր քայլերն արվում են, մեզ են միացել մի շարք մարդիկ և կազմակերպություններ, որոնք մտահոգ են հարցի լուծմամբ, աշխատանքները շարունակվում և շարունակվելու են: Մենք նաև ակտիվ աշխատում ենք հայկական սփյուռքի հետ, տեղեկացնում ենք նրանց ՎՏԲ բանկի ադրբեջանական կապիտալ ունենալու մասին, աշխարհի տարբեր ծայրերում տեղեկացնում ենք մարդկանց, որպեսզի նախընտրությունը տան ոչ թշնամական բանկերին:

Եվ ինչպիսի՞ն է արդյունքը:

Մոտակա ժամանակաշրջանում արդեն արդյունքի մասին կտեղեկացնենք՝ նշելով մեր այն սփյուռքի հայրենակիցների անունները, ովքեր նույնպես դադարեցնելու են այդ բանկի հետ իրենց ունեցած կապերը ոչ միայն ՀՀ-ում, այլև ուրիշ երկրներում:

Ռուզաննա Խաչատրյան