«Ընդդեմ ցեղասպանության հանցագործության» երևանյան համաժողովի ուշադրության կենտրոնում են լինելու փախստականների և վերապրածների խնդիրները

 Երևանում անցկացվելիք «Ընդդեմ ցեղասպանության հանցագործության» երկրորդ գլոբալ ֆորումը հիմնականում կենտրոնացված կլինի ցեղասպանություն վերապրած կենդանի անձանց և փախստականների խնդիրների վրա: Ապրիլի 22-ին լրագրողների հետ հանդիպմանն այս մասին ասաց ՀՀ նախագահի աշխատակազմի ղեկավար Վիգեն Սարգսյանը: «Մենք կենտրոնանալու ենք այն անձանց խնդիրների վրա, ովքեր իրենց աչքերով տ եսել են այդ արհավիրքը, իրենց վրա են զգացել ցեղասպանություն հանցագործության սարսափը: Ուշադրության կենտրոնում ենք պահելու նաև փախստականների հարցը: Բոլորին է հայտնի, թե փախստականների խնդիրն այսօրվա աշխարհում որքան լուրջ մարտահրավեր է: Մենք կենտրոնանալու ենք ոչ միայն Հայոց ցեղասպանության, այլ ընդհանրապես բոլոր ցեղասպանությունների վրա, փորձելու ենք վեր հանել առկա խնդիրները և հետագա ցեղասպանությունները կանխարգելելու ուղղությամբ քայլեր քննարկել»,- «Արմենպրես»-ի հաղորդմամբ՝ նշեց Սարգսյանը:

Վիգեն Սարգսյանը հավելեց, որ անցած տարի, երբ Երևանում անցկացվեց «Ընդդեմ ցեղասպանության հանցագործության» առաջին գլոբալ ֆորումը, մասնակիցները Հայաստանին կոչ են արել ստեղծել միջազգային հարթակ, որտեղ հնարավոր կլինի լայնորեն քննարկել ցեղասպանությունների հետ կապված խնդիրները, քննարկել դրանք կանխարգելելու եղանակներ: «Եվ իսկապես մենք հասկացանք, որ չկա այնպիսի հարթակ, որտեղ մարդիկ կարող են պարբերաբար հավաքվել, ցեղասպանության հիմնախնդիրները քննարկել: Մենք եկանք այն եզրակացության, որ ֆորումը պետք է դառնա պարբերական: Որոշում է կայանվել, որ այդ նիստերը կկայանան Երևանում երկու տարին մեկ անգամ: Մենք գտանք, որ շատ լավ կլինի, եթե ցեղասպանագետների գիտական աշխատանքին զուգահեռ Երևանում գումարվի ֆորում, որտեղ կհավաքվեն քաղաքական գործիչներ, ցեղասպանագետներ, մեդիայի ներկայացուցիչներ, հոգևոր դասի ներկայացուցիչներ, այլև քննարկել հիմնահարցեր ցեղասպանություն հանցագործության դեմ պայքարի շուրջ»,- «Արմենպրես»-ի հաղորդմամբ՝ նշեց Վիգեն Սարգսյանը:

Նա հավելեց, որ առաջին գլոբալ ֆորումից հետո Հայաստանը շատ կարևոր քայլեր է արել ցեղասպանությունների դեմ պայքարի և նման երևույթները կանխարգելելու ուղղությամբ: Առաջին ձեռքբերումը Վիգեն Սարգսյանը համարում է այն հանգամանքը, որ ՄԱԿ-ում դեկտեմբերի 9-ը սահմանվել է որպես ցեղասպանությունների դատապարտման և կանխարգելման, ցեղասպանության զոհերի հիշատակի միջազգային օր: Երկրորդ ձեռքբերումը Վիգեն Սարգսյանը համարում է այն աշխատանքը, որ տարել է Հայաստանը հայտնի ցեղասպանագետների հետ:

ՀՀ ԱԳ փոխնախարար Կարեն Նազարյանն էլ հավելեց, որ միջկառավարական և միջխորհրդարանական հարթակներում Հայաստանը շարունակում է քայլերը ցեղասպանություն հանցագործության կանխարգելման օրակարգի քայլերը վեր հանելու ուղղությամբ: «Մենք ականատես ենք լինեում մեր տարածաշրջանում սարսափազդու հաճախականությամբ շարունակվող ցեղասպանության դեպքերի, և մենք վեր ենք հանելու այն խնդիրները, որոնք վերաբերելու են նման դեպքերի կանխարգելմանը»,- ասաց Նազարյանը:

Նա նշեց, որ գլոբալ ֆորումն ունենալու է 4 հիմնական բաժիններ: Ֆորումի պաշտոնական բացումը կիրականացնի ՀՀ Նախագահ Սերժ Սարգսյանը, որից հետո տեղի կունենա բարձրաստիճան երկխոսություն: Հետո տեղի կունենան նիստեր, իսկ յուրաքանչյուր նիստի ավարտին կլինի հարցուպատասխան, որի ընթացքում մասնակիցները կկարողանան իրենց հուզող հարցեըը տալ զեկուցողներին: Փակման բաժնում էլ նախատեսված են մասնակիցների ելույթները: Կարեն Նազարյանը նշեց, որ նախատեսվում է գլոբալ ֆորումի արդյունքներով ընդունել համատեղ փաստաթուղթ, որում արտացոլված կլինեն քննարկումների ժամա նակ բարձրաձրած հարցերը, մտահոգությունները և հետագա անելիքները ցեղասպանությունների դատապարտման և կանխարգելման ուղղությամբ:

Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը նշեց, որ «Ընդդեմ ցեղասպանության հանցագործության» երկրորդ գլոբալ ֆորումի ընթացքում ներկայացված բոլոր մտքերը կարող են դառնալ տարբեր երկրների խորհրդարանների, միջազգային կազմակերպությունների քննարկման առարկա, վերածվել փաստաթղթերի: «Աշխարհը լի է ցեղասպանության վտանգներով, և մենք մեր հանձնառությունն ենք համարում պահպանել այս ֆորումի նշանակությունը, այն դարձնել կարևորագույն հարթակ հետագայում ավելի խորը քաղաքական քննարկումների համար: Առաջին ֆորումը բավականին մեծ հնչեղություն ստացավ: Այս տարվա ֆորումն էլ ավելի կոնկրետ օրակարգով կարող է ունենալ համապատախսան հնչեղություն: Այս առումով Հայաստանի պատկան մարմինները հստակ անելու են ամեն ինչ, որպեսզի հետագա ընթացքը ևս մնա տրամաբանական շարունակության մեջ, որպեսզի մենք կարողանանք մեր թիրախները պահել միջազգային հանրության ուշադրության կենտրոնում»,- եզրափակեց Զաքարյանը: