Որտե՞ղ են հանգստանում հայ հայտնիները

Blognews.am-ը գրում է.

Արդեն օգոստոսն է և ճիշտ ժամանակն է մեկնել հանգստի, որպեսզի սեպտեմբերին թարմ ուժերով վերադառնանք աշխատանքի։ BlogNews.am-ի զրույցը հայտնիների հետ կարող է ուղեցույց լինել Ձեզ համար, եթե դեռ չեք կողմնորոշվել, թե ուր կարելի է գնալ հանգստանալու։

Անի Ամիրյան

Ես և Ստյոպը (նկատի ունի՝ ամուսնուն՝ դերասան Ստեփան Ղամբարյանին) Մարթայի հետ գնում ենք Եգիպտոս՝ Հուրգադա։ Շատ հարմար է այնտեղ մեկնելը, հատկապես՝ երեխայի հետ, քանի որ ուղիղ թռիչք է, հյուրանոցում ամեն բան կա, նաև՝ երեխային զբաղեցնելու համար։ Բացի այդ, Կարմիր ծովը շատ լավ է և՛ երեխայի, և՛ մեզ համար։ Ընտրեցինք Հուրգադան, քանի որ այնտեղ ջերմաստիճանը համեմատաբար ցածր է։ Եգիպտոսի շոգը մեզ վրա չի ազդի, քանի որ ծով գնալու ենք մինչև ժամը 12-ը և 6-ից հետո, այնպես որ, մնացած ժամանակը անցկացնելու ենք հյուրանոցում։

Նաև՝ Եգիպտոս գնալը այլ հանգստավայրերի համեմատ նաև մատչելի է:

Աստղիկ Սաֆարյան

Ես ծովային հանգստի մեծ սիրահար եմ. ծովը հանգստություն է բերում և խլում է ամբողջ բացասական էներգիան։ Կմեկնեմ Իսպանիա, շատ եմ սիրում այնտեղի լողափերը, բացի այդ, շատ եմ սիրում Բարսելոնան՝ Կոստա-Բրավա ափը։

Ֆինանսական տեսանկյունից Բարսելոնայում հանգիստն ավելի հարմար է, քան, օրինակ, Ֆրանսիայում, ինձ համար այն ավելի մատչելի է ստացվում, քանի որ ապրում եմ մեր տանը, ոչ թե հյուրանոցում։

Ժակ

Ես ընտանիքիս հետ գնացել էի Սև ծով՝ Բաթումի, քանի որ մենք սիրում ենք ոչ միայն ծովային, այլև քաղաքային հանգիստ։ Բաթումին ամենամոտ ու ամենահարմար, ամենաարագ զարգացող, հնի ու նորի հետաքրքիր համադրությամբ գեղեցիկ քաղաքն է, որտեղ  կարելի է համատեղել ծովափնյա և քաղաքային հանգիստը։

Իհարկե, պայմանները դեռ կարող են բարելավվել, սակայն կարևորում եմ նաև, որ երեկոյան չենք ձանձրանում։ Վճարման տեսանկյունից էլ Բաթումին բազմաշերտ է. կարելի է և՚՛ մատչելի հանգիստ կազմակերպել, և՛․ ոչ մատչելի։ Ես, իհարկե, ցանկանում եմ, որ հանգիստը հարմար լինի, սակայն չեմ կարող ասել, թե շատ եմ խնայել։ Համենայն դեպս, այնքան գումար, որքան  ծախսել եմ, կարող էի գնալ նաև հանգստի այլ վայրեր, քանի որ մենք սիրում ենք Բաթումին։

Ինչ վերաբերում է հարցին, որ ասում են՝ ափը քարքարոտ է կամ ծովը կեղտոտ է, որովհետև այնտեղ նավեր կան, կարող եմ նշել, որ ափի համար հատուկ հողաթափեր կան, իսկ ծովի կեղտոտվածությունը կախված է նախորդ օրը ծովի «ապրումներից», ես արտառոց կեղտոտություն չեմ նկատել։

Հրաչուհի Ութմազյան

Ես մեկնել էի Մոսկվա և Սանկտ Պետերբուրգ, քանի որ ցանկանում էի ժամանակ անցկացնել զարմուհիներիս հետ. քույրիկս արձակուրդ չուներ, դրա համար էլ ինքս գնացի նրա մոտ։ Հանգստի տեսանկյունից Մոսկվան շատ հետաքրքիր էր, քանի որ մինչ այս այդքան չէի ուսումնասիրել Մոսկվան, իսկ  Սանկտ Պետերբուրգին ուղղակի սիրահարվել եմ։ Հռոմից հետո սա երկրորդ քաղաքն է, ուր անպայման վերադառնալոու եմ։ Այնտեղի ճարտարապետությունն ուղղակի փառահեղ է։

Հյուրանոցի համար ես գերադասում եմ հարմարավետությունը։ Չեմ կարող ասել, որ Մոսկվայում հանգստանալը կարող է մատչելի լինել, քանի որ այն մեգապոլիս է, սակայն շատ հետաքրքիր է։

Աշոտ Ղազարյան

Ես և կինս ամեն տարի գալիս ենք Ջերմուկ և շատ լավ հանգստանում, կտրվում առօրյայից։ Այստեղ կան բուժական մի շարք պրոցեդուրաներ, որոնք ինձ պետք են Չեմ կարծում, որ Հայաստանում հանգիստն այդքան թանկ է, թեև շատ էժան էլ չէ։ Ամեն դեպքում՝ այդ գումարի դիմաց տալիս են և՛ հյուրանոց, և՛ երեքանգամյա սնունդ, և՛ բուժական պրոցեդուրաներ, եթե այդ ամենը հաշվի առենք, կհասկանանք, որ հանգիստը Ջերմուկում նույնիսկ էժան է։

Ռոզի Ավետիսովա

Սեպտեմբերին մեկնելու եմ Իտալիա, քանի որ քույրս այնտեղ է ապրում։ Իտալիան շատ լավ երկիր է։ Այնտեղ  կարող ես գնալ և՛ ծովափնյա, և՛ մշակութային հանգիստ վայելելու համար։ Այս տարի հավանաբար չեմ հասնի ծովային հանգստին, սակայն նոր քաղաքներում կլինեմ, թանգարաններ կայցելեմ։ Մեկնելու եմ Միլան, դեռ չեմ եղել Ֆլորենցիայում, Վենետիկում և Հռոմում, հուսով եմ՝ այս անգամ կլինեմ։

Միայն մշակույթի, խոհանոցի, մարդկանց հաճելի հյուրընկալության համար արժե գնալ Իտալիա։ Մատչելութայան մասին խոսել չեմ կարող, քնի որ ինձ հրավիրել են, ես միշտ որպես հյուր եմ եղել այնտեղ։

Սոնա Մաթևոսյան

Այս ամռանը հանգիստս չծրագրված ստացվեց։ Հունիսին Մոսկվայի թատերական ամառային դպրոցում էի, որտեղ շատ ընկերներ եմ ձեռք բերել, արդեն հուլիսին Երևան ժամանեց ընկերուհիս. ում հետ գնացինք Վրաստան՝ Թիֆլիս։ Ամբողջ քաղաքը ոտքի տակ տվեցինք, շատ եմ սիրում Թբիլիսին, այն շատ հարազատ է ինձ։ Քաղաքի կենտրոնում մատչելի հյուրանոցներ կան, որոնցից մեկում մնացինք, ապա ուղևորվեցինք Բաթումի, որտեղ տուն վարձակալեցինք ու անմոռանալի հանգիստ ունեցանք։ Վրաստանում կարելի է կազմակերպել մատչելի և շատ լավ հանգիստ։ Այնտեղ հրաշք բնություն կա, ես իսկապես հանգստանում եմ Բաթումիում։

Անդրանիկ Հարությունյան

Այս տարի հանգստանալու եմ Հայաստանում՝ Դիլիջանում, քանի որ այնտեղ մաքուր օդ է, ինչը շատ լավ է թե՛ մեզ, թե՛ երեխայի համար։ Դիլիջձանն իմ ծննդավայրն է ու գնում ենք տատիկիս տուն։

Մի անգամ հետաքրքրվեցի Դիլիջանի հյուրանոցում հանգստի գներով ու հասկացա, որ այնտեղ հանգստանալու համար պետք է առնվազն պատգամավոր լինես։ Առհասարաակ, Հայաստանի հանգստի գոտիները բավականին թանկ են, սակայն եթե հնարավորություն կա, օրինակ, տատիկի տուն գնալ, պետք է օգտվել։ Շատ գեղեցիկ բնություն ունենք։