«Եվրատեսիլ 2016». կոլեգաները՝ Իվետա Մուկուչյանի մասին

LIFE 14 May, 2016 23:05

Շվեդիայի մայրաքաղաք Ստոկհոլմում այս գիշեր տեղի կունենա «Եվրատեսիլ-2016» երգի մրցույթի եզրափակիչ փուլը: Հիշեցնենք, որ Հայաստանն այս տարի ներկայացնում է Իվետա Մուկուչյանը: Երգչուհին LoveWave ստեղծագործությամբ ելույթ կունենա 26-րդ համարի ներքո:

Past.am-ի հետ զրույցում մի քանի երաժիշտներ և երգիչներ իրենց տպավորությունները հայտնեցին մրցույթի, ինչպես նաև Իվետայի առաջին ելույթի վերաբերյալ: Երգիչ Արթուր Իսպիրյանը չի հետևել առաջին կիսաեզրափակչին: Երգիչն ընդգծեց, որ շատ է սիրում այս տարվա մասնակցի համարձակությունը, ճաշակը, երգը:Ըստ նրա՝ ամեն ինչ համապատասխանում է մրցույթի չափանիշներին:

«Առաջին անգամ է, որ ես համոզված եմ՝ մենք մեծ հաջողություն ենք ունենալու: Միշտ իմ մեջ եղել է այդ կասկածը, բայց այս անգամ վստահությունս մեծ է: Իհարկե, ես չեմ սիրում «Եվրատեսիլը» և այնտեղ հնչող երգերի ֆորմատը: Ես այլ երաժշտության սիրահար եմ: Ես մելոման եմ, ունեմ 4000-ից ավելի ձայնասկավառակների հավաքածու, իսկ մելոմանը չի կարող սիրել այն տիպի երաժշտություն, որը հնչում է «Եվրատեսիլում»:

Բայց Իվետայի ելույթներն ինձ զարմացնում են: Նա նաև շատ կիրթ խոսեց ասուլիսին՝ իրեն թույլ չտալով ավելորդություններ: Բայց առաջին օրվա ելույթը չեմ տեսել: Հիացա, երբ առաջին անգամ լսեցի նրա կենդանի կատարումը: Հարցրեցի՝ այս աղջիկը որտեղի՞ց է եկել, որ մինչև հիմա չեմ լսել: Պարզվեց՝ Գերմանիայից է եկել: Ինձ հիացրեց նաև Իվետայի անգլերենի իմացությունն ու գրագետ խոսքը: Չգիտեմ՝ ինչպես են ընտրել նրան, բայց ճիշտ ընտրություն են կատարել»,- ասաց Արթուր Իսպիրյանը:

EMPYRAY խմբի երաժիշտ, երգահան Գիսանե Պալյանը հիշեցրեց, որ երգչուհուն ճանաչում է դեռ վերջինիս մասնագիտական ճանապարհի սկզբից, երբ Իվետան մասնակցում էր «Հայ սուպերսթարին»:

Երգահանի խոսքով՝ Իվետա Մուկուչյանը վոկալի առումով մեծ աճ է արձանագրել: Ըստ Գիսանե Պալյանի՝ այն, որ Իվետան շատ ինքնավստահ է, գալիս է նրա մյուս մասնագիտությունից՝ մոդելային գործունեությունից:

«Կարելի է կռահել, որ պետք է շատ լավ հանդես գա այսօր: Կարծում եմ՝ անթերի էր ամեն բան: Ամպագոռգոռ չլինի, բայց բոլոր տարիների ամենաանթերի ելույթն էր: Մրցույթներ չեմ սիրում, որովհետև արվեստը սուբյեկտիվ բան է: Մեկին կարող է դուր գալ, մյուսին՝ ոչ: Իմ կարծիքով՝ հնգյակում կլինենք»,- հավելեց նա:

Պատասխանելով այլ ֆավորիտների մասին հարցին՝ Գիսանե Պալյանն ասաց, որ չի հետևել, սակայն համարում է, որ Իվետայի ելույթն օբյեկտիվորեն լավն է:

Քրիստինե Պեպելյանին ևս շատ դուր է եկել Իվետա Մուկուչյանի ելույթը:Նա շատ ուրախ է, որ հենց Իվետան է ներկայացնում մեր երկիրը: Խոսելով այլ ֆավորիտների մասին՝ Քրիստինեն նշեց. «Շատ դժվար է ունենալ այլ ֆավորիտ: Շատ երկրների համար էլ հենց Իվետան է ֆավորիտ: յս տարվա «Եվրատեսիլն» առանձնահատուկ շուք և առանձնահատուկ ալիք ունի: Իվետայի գործոնը նպաստում է դրան: Իմ ֆավորիտն Իվետան է»:

Լևոն Փանոսյան