Որևէ կերպ չպետք է նսեմացնել հաղթանակը. կարծիքներ Հայաստան - Գվատեմալա խաղից հետո (տեսանյութ)

Հայաստանի ազգային հավաքականն ընկերական հանդիպման շրջանակում 7:1 հաշվով հաղթեց Գվատեմալային, ինչը վերջին 2 տարվա ընթացքում 1-ին հաղթանակն էր: Armsport.am-ը ֆուտբոլային աշխարհի անձանց հետ խոսել է հանդիպման վերաբերյալ. իրենց կարծիքն են հայտնել նախկին ֆուտբոլիստ Երվանդ Կրբաշյանը, կարիերան ավարտած և «Բանանցում» աշխատանքի անցած Վալերի Ալեքսանյանը և մարզական մեկնաբան, «Ֆուտբոլ +» շաբաթաթերթի հիմնադիր Սուրեն Բաղդասարյանը: 

Երվանդ Կրբաշյան. Հարկավոր է զարգացնել հաջողությունը

«Մեր հավաքականը հիանալի հանդիպում անցկացրեց: Գրոհները բավականին արագ էին կազմակերպվում, իսկ գոլերը շատ գեղեցիկ ստացվեցին: Մխիթարյանը կրկին փայլեց՝ ցուցադրելով իր լավագույն ունակություններըը: Զգացվում էր, որ տղաների հոգեբանությունը փոխվել է: Նման հանդիպումներ շատ են անհրաժեշտ, քանի որ նոր ֆուտբոլիստներ են բացահայտվում, երիտասարդները դրսևորվում են: Տեսանք, թե նույն Տիգրան Բարսեղյանը որքան լավ հանդիպում անցկացրեց: 

Վարուժան Սուքիասյանի գործոնը մեծ դեր ունի, նա իրապես կարողանում է հաղթական տրամադրել ֆուտբոլիստներին: Հավաքականում մարզիչը տրամադրության տակ մի քանի օր ունի, ուստի հարկավոր է պատշաճ կազմակերպել անելիքները: Նա իրոք խարիզմատիկ մարզիչ է:

Նոր արյուն էր հարկավոր հավաքականին, որն արդեն կա, հարկավոր է զարգացնել հաջողությունը»:

Սուրեն Բաղդասարյան. Պետք չէ շատ ոգևորվել հաղթանակից

«Հաշվի առնելով, որ Հայաստանի հավաքականը մոտ 2 տարի հաղթանակ չէր տարել, զուտ հոգեբանական առումով շատ կարևոր էր Գվատեմալայի դեմ հանդիպումը. հաշվի առնենք նաև, որ մինչ այս, վերջին 5 հանդիպումներում գոլեր չէինք խփել: Ամեն դեպքում, պետք չէ շատ ոգևորվել այս հաղթանակից, քանի որ Գվատեմալան Եվրոպա չէ: Ուրախ եմ, որ Վարուժան Սուքիասյանը մի շարք փորձարկումներ է անում: Դե իսկ մյուսների՝ մասնավորապես Հենրիխի մասին խոսք չկա. նա մեզ համար ադամանդ է: Ափսոս կլինի, որ իր ժամանակաշրջանում հավաքականը լուրջ հաջողության չհասնի: 

Ես հիշում եմ 2000 թվականին իրենց դեմ խաղը. կրկին պետք է հաղթեինք խոշոր հաշվով, սակայն իրենք «կոտորած» էին սկսել և այնպես էին հարվածում, որ մեր 2 ֆուտբոլիստների միանգամից հիվանդանոց տարան:

Այս խաղում իրենցից լուրջ սպառնալիք չտեսանք... այդկերպ մեր պաշտպանության մասին ավելի ամփոփ կարծիք կարող էինք կազմել:

Գվատեմալան խաղում էր որոշակիորեն փորձնական կազմով, նորեկներ կային, սակայն դա արդարացում չէ, քանի որ մեր ընտրանում էլ երիտասարդները շատ են: Որևէ կերպ չպետք է նսեմացնել հաղթանակը. չէ՞ որ պատմության ամենախոշոր հաշվով հաղթանակն է: Այս հաշիվն անցնելու է պատմության մեջ ու հակադրվելու է նույն լատինամերիկյան Չիլիից կրած 0:7 հաշվով պարտությանը՝ իհարկե վիճակագրության տեսանկյունից»:

Վալերի Ալեքսանյան. Դրական փոփոխությունների ականատես ենք լինելու

«Գվատեմալայի դեմ խաղում մեր հավաքականի մոտ ամեն ինչ լավ էր ստացվում: Գործոններից մեկն այն է, որ մրցակիցն այնքան էլ բարձր որակներ ունեցող ընտրանի չէր:
Տպավորեց մեր հավաքականի խաղային կարգապահությունը: Գնդակը խլելուց հետո գրոհները բավականին արագ էին կազմակերպվում, առջևում ամեն ինչ շատ լավ էր ստացվում: Հաշվի մեջ առաջ լինելն արդեն թույլ էր տալիս վերահսկել հանդիպումը:

Պարտադիր չէ թիմային արագություն ունենալ հաղթելու համար, եթե մրցակիցն ամենաուժեղներից չէ: Բարձրակարգ ֆուտբոլիստների որակները բավական են ելքը վճռելու համար:

Մեկ խաղով բարդ է փոփոխությունների մասին խոսել, առաջիկայում ամեն ինչ ավելի հստակ կլինի: Վստահ եմ, որ միմիայն դրական փոփոխությունների ենք ականատես լինելու»: