2016-ի տնտեսական խոստումնալից մեկնարկը
BLOGԱրմեն Վարդանյանը ֆեյսբուքյան իր էջում գրում է.
ՀՀ ԿԲ-ի հրապարակած վերլուծությունների համաձայն 2016թ.-ին սպասվում է շուրջ 2.7-3.6%-անոց տնտեսական աճ: Վերջինս 2016թ.-ի համար հնչեցրած ամենալավատեսական ցուցանիշն է, քանի որ տարեկսզբին թե կառավարությունը, թե միջազգային կառույցները՝ Համաշխարհային բանկ, Արժույթի միջազգային հիմնադրամ, Հայաստանի համար կանխատեսել էին 2%-անոց տնտեսական աճ:
Ինչպես երևում է՝ այս տարին մեկնարկել է հուսադրող ցուցանիշներով: Նախորդ տարվա ցուցանիշի հետ համեմատելիս ակնառու է, որ թե տնտեսական ակտիվության ցուցանիշի, թե արտահանման, առանձին ճյուղերի թողարկման աճի առումով այս տարի որոշակի դրական տեղաշարժեր են եղել:
Վերը նշվածում իր ուրույն տեղը ունի Ռուսաստանի տնտեսության անկման տեմպերի էապես դանդաղումը և ռուսական ռուբլու փոխարժեքի հարաբերական կայունացումը, որն անշուշտ դրական ազդակներ կհաղորդի նաև մեր տնտեսությանը՝ առավելապես եկող մասնավոր տրանսֆերտների ծավալների ավելացմամբ պայմանավորված ներքին սպառման աճով:
Վերը նշվածից կարելի է փաստել, որ հետևողական, թիրախավորված տնտեսական քաղաքականությունը մեր տնտեսությանը զարգացման լուրջ ազդակներ է հաղորդում, ինչը մի կողմից պարարտ հող է նախապատրաստում առավել շոշափելի տնտեսական աճ գրանցելու համար, մյուս կողմից էլ՝ հավելյալ հնարավորություններ դիմակայելու արտաքին տնտեսական շոկերին: