Տեղի կունենա Հայաստանի ազգային ֆիլհարմոնիկ նվագախմբի 90-ամյակին նվիրված հոբելյանական համերգ

CULTURE 27 June, 2016 19:22

Արամ Խաչատրյան համերգասրահում հունիսի 28-ին կայանալու է Հայաստանի ազգային ֆիլհարմոնիկ նվագախմբի 90-ամյակին նվիրված հոբելյանական համերգ: Ինչպես հաղորդում է «Արմենպրես»-ը, համերգին մասնակցելու են հայ երաժշտարվեստի մեծանուն գործիչներ` սոպրանո Հասմիկ Պապյանը, ջութակահար Սերգեյ Խաչատրյանը, բաս Բարսեղ Թումանյանը, թավջութակահար Ալեքսանդր Չաուշյան և դաշնակահար Վահագն Պապյանը :

Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանըհունիսի 27-ին կայացած ասուլիսումնշեց, որոշում է կայացվել՝ նվագախմբի 90-ամյակին նվիրված հոբելյանական համերգին ելույթ ունենան միայն հայ երգիչներն ու երաժիշտներ, որովհետև սա միայն հայ երաժիշտների տոնն է:

«Դյուրին չէր բոլորին հավաքել նույն տեղում, նույն օրը, սակայն կարևորն այն էր, որ բոլորի մոտ կա այդ ցանկությունը»,- ասաց Էդուարդ Թոփչյանը:

«Ոչ բոլոր նվագախմբերին է բախտ վիճակվում այսքան երկար կյանք ու մեծ ավանդույթներ ունենալ»,- նկատեց ջութակահար Սերգեյ Խաչատրյանն` ընդգծելով, որ այսօր շատ ավելի կարևոր է պահպանել ու շարունակել այդ ավանդույթները:

Հասմիկ Պապյանը էլ նշեց, որ 1915 թվականից տաս տարի անց, ստեղծելով ֆիլհարմոնիկ նվագախումբ, խոսում է հայ ժողովրդի մշակութասեր լինելու, հայ ազգի ապրելու ցանկության մասին:

«Ներկա եմ եղել նաև արտասահմանյան համերգերին, կարդացել և լսել եմ արձագանքները: Ուրախանում և հպարտանում եմ մեր նվագախմբով»,- նշեց Հասմիկ Պապյանը: Երգիչ Բարսեղ Թումանյանն էլ ավելացրեց, որ եթե խոսում են պետականության, քաղաքակրթության մասին, ապա Հայաստանի ազգային ֆիլհարմոնիկ նվագախումբը դրա ամենացայտուն փաստերից մեկն է, որով կարող են արձանագրել, որ հայ ժողովուրդը քաղաքակիրթ պետություն ունի: Նա ընդգծեց, որ պետք է լուրջ վերաբերվել, աջակցել նման մնայուն օրգանիզմին, ինչպիսին Ֆիլհարմոնիկ նվագախումբն է:

Նշենք, որ համերգին հնչելու է՝ Շոստակովիչ՝ «Տոնական նախերգանք», Մոցարտ՝ «Դաշնամուրի կոնցերտ թիվ 21, C-Dur KV 467 (2-րդ և 3-րդ մասեր)», Վերդի՝ Լեոնորայի արիան «Pace, pace mio Dio»` «Ճակատագրի ուժը» օպերայից, Բիզե՝ «Էսկամիլիոյի քառյակները «Կարմեն» օպերայից (Votre toast, je peux vous le rendre)», Բաղդասարյան՝ «Ռապսոդիա ջութակի և նվագախմբի համար», Չայկովսկի՝ Ռոկոկո թեմայով վարիացիաներ` թավջութակի և նվագախմբի համար», Վերդի՝ «Արքա Ֆիլիպի արիան «Ella giammai m’amo» «Դոն Կարլոս» օպերայից», Վագներ՝ «Էլիզաբեթի արիա ն «Dich teure Halle» ` «Տանհոյզեր» օպերայից, Միրզոյան՝ ««Ինտրոդուկցիա և «Անընդհատ շարժում» ջութակի և նվագախմբի համար», Խաչատրյան՝ Սիմֆոնիա թիվ 2 (2-րդ մաս):

Հայաստանի ազգային ֆիլհարմոնիկ նվագախումբը (ՀԱՖՆ), հիմնադրվելով 90 տարի առաջ Արշակ Ադամյանի և Ալեքսանդր Սպենդիարյանի կողմից, տարիներ շարունակ եղել է նախկին Խորհրդային Միության առաջատար նվագախմբերից մեկը: Տարբեր տարիների նվագախումբը գլխավորել են Ա. Ադամյանը, Ալ. Սպենդիարյանը, Ս. Չարեքյանը, Գ. Բուդաղյանը, Կ.Սարաջյանը, Մ. Մալունցյանը, Օ. Դուրյանը, Մ. Տերյանը, Ռ. Վարդանյանը, Ա. Քաթանյանը, Դ.Խանջյանը Վ. Գերգիևը, Վ. Պապյանը, Մ. Ավետիսյանը և Լ. Ճգնավորյանը: 2000 թ.հոկտեմբերին ՀԱՖՆի գեղարվեստական ղեկավարի և գլխավոր դիրիժորի պաշտոնը ստանձնեց Էդուարդ ոփչյանը: Ֆիլհարմոնիկի գործունեությունը միտված է բարձրացնելու տեղի ունկնդրի մշակութային և երաժշտական պատրաստվածությունը` կանոնավոր կերպով հանդես գալով դասական սիմֆոնիկ և օպերային, ինչպես նաև ժամանակակից և ազգային երաժշտության համերգներով: Իր հիմնադրման շրջանից նվագախումբը կատարել է գրեթե ողջ դասական երգացակը: Ֆիլհարմոնիկը ներկայացնում է նաև հայ կոմպոզիտորների ստեղծագործություններ: Նվագախմբի հետ ելույթ են ունեցել համաշխարհային հռչակ վայելող երաժիշտներ: ՀԱՖՆ-ը նաև հայ երաժշտարվեստի յուրահատուկ դեսպանն է աշխարհում և հաճախ հյու րախաղերով հանդես է գալիս արտերկրում: