Խոսրով Հարությունյանը՝ Գյումրիի ընտրություններում դաշինքով մասնակցության, ՀՀԿ-ի վարկաբեկվածության և ԳԱԼԱ-ի շանսերի մասին

Past.am-ի հարցերին պատասխանում է Հայաստանի Քրիստոնեա-դեմոկրատական միություն կուսակցության նախագահ, ԱԺ Հանրապետական խմբակցության պատգամավոր Խոսրով Հարությունյանը:

-Ձեր գլխավորած կուսակցությունը Գյումրիի ավագանու ընտրություններում ինչո՞ւ որոշեց ՀՀԿ-ի հետ դաշինք կազմել՝ սատարելով Սամվել Բալասանյանին:

-Երևի տեղյակ եք, որ ապագա ձևավորվելիք ավագանին լինելու է որակապես այլ մարմին: Այն լինելու է Գյումրու պառլամենտը: Այսինքն՝ այնտեղ գործելու են մշտական հանձնաժողովներ, անցկացվելու են աշնանային, գարնանային նստաշրջաններ, աշխատելու են խմբակցությունները:

Մի խոսքով՝ տեղական խորհրդարան: Մենք գտանք, որ իմաստ ունի սեփական մասնակցությունը բերել այդ կառույցին: Մենք կարևորում ենք կառույցի գործունեությունն ու դրա պատասխանատու դերը: Բայց մենք նաև գիտակցում էինք, որ միայնակ այդքան ռեսուրս չունենք, այդքան ազդեցիկ չենք:

Քանի որ համապետական մակարդակում Քրիստոնեա-դեմոկրատական միությունը շատ հաջող համագործակցում է Հանրապետական կուսակցության հետ, որոշեցինք այդ համագործակցությունը տեղափոխել նաև տեղական մակարդակի վրա: Այդպես առաջացավ դաշինքի գաղափարը: Սա է ամբողջ իմաստը:

-Իսկ ընդդիմության շանսերն ինչպե՞ս կգնահատեք: Գիտեք, որ վերջերս ստեղծեց ԳԱԼԱ կուսակցությունը:

-Չեմ կարող որևէ կերպ գնահատել: Նոր ստեղծված կուսակցություն է, ունի իր լրատվամիջոցը, գուցե դա ազդեցիկ կլինի,չեմ կարող ասել:Այդ ամենի լավագույն գնահատականն ընտրությունների արդյունքներն են:

-Գյումրեցիները համապետական ընտրություններում աչքի են ընկնում ընդդիմադիր հայացքներով: Դա չի՞ մտահոգում:

-Կրկնում եմ՝ մենք մասնակցում ենք, քանի որ կարևորում ենք ավագանու քաղաքական նշանակութունը:Մնացած ավագանիներն այդպես չեն գործում: Նրանք մեծամասնական ընտրական համակարգով են որոշվում: Այլ համայնքներում (բացի Երևանից ու Վանաձորից) ավագանի դառնալու շարժառիթը շատ անձնական է: Այստեղ շարժառիթը քաղաքական է,որովհետև ավագանու անդամը պատասխանատու պետք է լինի ոչ միայն ընտրողի, այլև սեփական կուսակցության առաջ: Սա էական հնարավորություն է տալիս բարձրացնել քաղաքական դերակատարների պատասխանատվությունը: Այդ կարևորությունը գիտակցելով՝ մենք որոշեցինք մասնակցել: Հիմա կստացվի՝ լավ, չի ստացվի՝ աշխարհը դրանից շուռ չի գա:

- ԳԱԼԱ-ի ներկայացուցիչներից մեկն իր հարցազրույցում  ասաց, թե ՀՀԿ-ն Գյումրիում այնքան է վարկաբեկված,դրա համար է դաշինքով գնում: Ձեր մեկնաբանությունը:

-Ենթադրենք, թե ասել են: Կյանքը ցույց կտա, չէ՞: Ես էլ կարող եմ հակառակորդի հասցեին շատ բան ասել: Ասելո՞վ է դա, ժամանակը ցույց կտա: Ինչո՞ւ է ընդդիմությունն անհագստանում, եթե իրենց ասածները ճիշտ են: Նույնիսկ պետք է ուրախ լինեն, որ թույլ հակառակորդ ունեն: Ճիշտն ասած՝ խառնաշփոթ և անհանգստություն եմ տեսնում, որը բացատրելի չէ: Ինքս շատ հանգիստ եմ նայում պայքարին, սա քաղաքականություն է: Եթե հակառակորդս ուժեղ է,ապա կաշխատեմ իր հետ մրցել, մեծացնել պոտենցիալս, լինել արժանի մրցակից: Ինչո՞ւ պետք է դարդոտվեմ կամ աղմուկ բարձրացնեմ, եթե մրցակիցը թույլ է: Ես կուրախանամ, այնպես չէ՞:

Լևոն Փանոսյան