Գոյություն ունեն արդյո՞ք վամպիրներն իրականում

Mediamonitor.am-ը գրում է.

Վամպիրների մասին լեգենդները այնքան հին են, որքան մարդկային պատկերացումը: Չնայած որ չկան հավաստի տեղեկություններ, որոնք կկարողանային հաստատել այդ մահաբեր էակների առաջացման ճշգրիտ դարաշրջանը, այնուամենայնիվ վամպիրները միշտ էլ կազմել են ֆոլկլորի մի մասը: Եվ նույնիսկ, երբ մարդկությունը հասել է ինտելեկտուալ նոր մակարդակի, նրանք միշտ էլ առկա են եղել մարդկանց գիտակցության մեջ գեղարվեստական պատկերների միջոցով, որոնք ստեղծվում են գրականության և կինոմատոգրաֆիայի ներկայացուցիչների կողմից: Ժամանակակից վամպիրը շատ առումներով գերազանցում է միֆերում և լեգենդներում գոյություն ունեցող իր վաղեմի եղբայրակիցներին, որոնք պատկերվում էին երկար ճիրաններով, չափազանց գունատ մաշկով և որոնք քնում էին դագաղներում:

Վամպիրներին շրջապատող առեղծվածային աշխարհը ավելի է գրգռում նրանց նկատմամբ հետաքրքրությունը: Բացի այդ, ի հայտ է եկել նոր կուլտ՝ վամպիրիզմը: Եվ որպես դրա հետևանք այսօր հավատը վամպիրների գոյության փաստի նկատմամբ ավելի մեծ է, քան երբևէ: Համացանցը ողողված է այնպիսի հարցերով, ինչպիսիք են՝ գոյություն ունեն արդյոք վամպիրներ իրական կյանքում, կան արդյոք վամպիրներ մեր շրջապատում, ով է իրականում վամպիր տեսել, որտեղ կարելի է վամպիր գտնել: Եվ հազարավոր մարդիկ փորձում են գտնել այդ հարցերի պատասխանները:

Իմաստ չունի հերքել վամպիրների գոյությունը, պարզապես պետք է հասկանալ, թե վամպիր ասելիս դուք ում նկատի ունեք:

Մեր շրջապատում կան մարդիկ, որոնք իրենց անվանում են իրական վամպիրներ՝ Սանգվինարներ: Սակայն Սանգվինարները վամպիրներ չեն: Նրանց գոյության համար պետք է արյուն, որից նրանք ստանում են կենսական էներգիա առանց որի նրանք թույլ են և հիվանդ: Նրանք կամ ծնվել են որպես վամպիր, կամ միջոցներ են փնտրում վամպիր դառնալու, քանի որ դա համարում են իրենց կոչումը: Դեռահասության տարիքում նրանք արյան սուր պակաս են զգում:

Ցավոք սրտի վամպիրների մասին տեղեկությունը բազմազան է և մասամբ հակասական: Վամպիրների մասին այսօրվա պատկերացումը ստեղծվել է ֆիլմերի և գեղարվեստական գրականության հիման վրա, որոնց հեղինակները դույզն ինչ պատկերացում չունեն նրանց մասին, ինչի հետևանքով էլ մենք ստացել ենք նրանց ֆանտազիայի պտուղները: Վամպիրները մարդիկ չեն, որոնք օժտված են գերունակություններով: Վամպիրները այլ էակներ են գերբնական աշխարհից, ընդ որում, նրանք այդ աշխարհի ամենահզոր էակները չեն: Վամպիրիզմը այդ էակների գոյության միջոցն է: Կան գոյության այլ միջոցներ և այլ էակներ: Մարդկային միտքը պարզապես ունակ չէ ընդունել և հասկանալ նյութական և հոգևոր աշխարհների գոյության բոլոր ձևերը: Իմանալով վամպիրների մասին գեթ մի փոքր տեղեկություն՝ մենք ընդամենը կարող ենք կուրորեն ենթադրել, թե ինչպիսին են այդ խորհրդավոր էակները:

Մարդկանց դաժան աշխարհը ատում և վախենում է վամպիրներից: Շատ հայտնի են ինկվիզիցիայի դեպքերը ոչ միայն կախարդների և վհուկների, այլ նաև վամպիրների նկատմամբ: Վամպիրների դեմ պայքարելու համար ստեղծվում էին մեծ կազմակերպություններ, բայց դրանից վամպիրները դառնում էին ավելի ուժեղ, խորամանկ, խելացի: Նրանք կերպարանափոխման իսկական վարպետներ են, այդ իսկ պատճառով հեշտությամբ դիմակավորվում են մարդկանց մեջ և շատ լավ գիտեն, թե որտեղ կարող են ինկվիզիցիայի ենթարկվել:

Վամպիրիզմի ֆենոմենը փորձել են բացատրել գիտնականներ, բժիշկներ, պատմաբաններ, բայց հանելուկն այդպես էլ դեռևս լուծում չի ստացել: Աշխարհում դեռևս շատ անհասկանալի, անբացատրելի երևույթներ կան և մնում է հավատալ և հուսալ, որ մոտ ապագայում մենք կկարողանանք վստահաբար ասել՝ վամպիրները գոյություն ունեն: