Իմ սիրտը նորից ազատ է. Նարեկ Մակարյանը պատմում է ընկերուհուց բաժանվելու և էքստրեմալ ճանապարհորդության մասին (լուսանկարներ)

Tert.am Life-ը գրում է.

Օրեր առաջ երգիչ Նարեկ Մակարյանը  օրիգինալ կերպով տոնեց իր 24-րդ տարեդարձը:

Tert.am Life-ը զրուցեց երգչի հետ էքստրեմալ ճանապարհորդության, սահմանած «ռեկորդի» և անձնական կյանքում տեղի ունեցած փոփոխությունների մասին:

-Օրեր առաջ Ձեր ծննդյան տարեդարձն էր, սակայն Հայաստանում չէիք:  Ինչպե՞ս ստացվեց տոնել տարեդարձը:

-Ամեն տարի նույն պրոցեսը կրկնում եմ՝ ռեստորան, սրճարան, ակումբ ու էլի նորից նույնը: Այս տարի որոշեցինք ընկերներով գնալ հեռու մի տեղ ու նշել տարեդարձս: Ինչո՞ւ ընտրեցինք Վրաստան, քանի որ ամենահարմար վայրն էր մոտոցիկլետով գնալու համար: Մոտավորապես 5 ժամում հասանք Թբիլիսի:

-Որքանո՞վ էր ճանապարհն անվտանգ:

-Վտանգներն անպակաս էին: Ըննկերներիցս մեկը վթարի ենթարկվեց: Ճանապարհը լի էր էքստրիմներով ու միջադեպերով: Վթարից լուրջ հետևանքներ չեղան, բայց ամեն դեպքում բավականին ժամանակ խլեց մեզանից: Գծագիրս հետևյալն էր՝ Թիֆլիս, Քոբուլեթի, իսկ հետո նաև Բաթումի, որից հետո Ախլցխա ու Երևան:

 

-Ադրենալինը հատե՞ց թույլատրելիի սահմանը:

- Այն էլ ինչպես հատեց: Ամեն ինչ սկսեց այն ժամանակ, երբ  մենք որոշեցինք Բաթումիից գնալ Ախլցխա: Մեզ սխալ ճանապարհ ցույց տվեցին ու սկսվեց քաոսը: Քիչ թե շատ գնալուց հետո անցանելի ճանապարհը վերջացավ ու սկսվեց քարանձավային արահետը: Մոտավորապես 120 կիլոմետր այդ աննկարագրելի դաժան ճանապարհով անցել ենք: Իմ մոտոցիկլը նախատեսված էր անցանելի ճանապարհների համար, բայց այդ տարածքը ահավոր էր:  Բացարձակ մարդ չկար, կենդանիներ, ծառեր ու անապատ: Երբ դժվարություններով մի կերպ տեղ հասանք ես իմացա, որ միակն եմ, ով այդ ճանապարհն անցել եմ սպորտային մոտոցիկլետով: Ես անգիտակցաբար դարձա ռեկորդակիր: Ծնունդս նշելը շատ էքստրեմալ ստացվեց:

-Տարեդարձը նույն կերպ էլի կնշե՞ք:

-Պետք է ասեմ, որ այո՛։ Նման տարեդարձ հաստատ չեմ ունեցել: Բնությանը այսքան մոտ վաղուց չէի եղել: Նորից կփորձեմ, բայց համապատասխան տեխնիկայով:

-Վրաստանում եղել եք, երբ մեր հայրենակիցներից մեծ մասը այնտեղ վայելում են իրենց հանգիստը: Երկրպագուհիների չհանդիպեցի՞ք այնտեղ:

- Ճանապարհից սարսափելի հոգնել էի ու բոլորովին չէի ուզի, որ ինձ նկատեն: Բայց իմ շատ սիրելի երկրպագուհիները ինձ նկատում են անգամ երբ նման չեմ ինձ, սարսափելի հոգնած եմ ու նկարվելու արտաքինով չեմ: Այո, նրանք ինձ նույնիսկ այլ երկրում «բռնացրին» ու նկարվեցին ինձ հետ: 

-Վայելեցիք հանգիստը, իսկ ի՞նչ է սպասվում աշխատանքային ու ստեղծագործական կյանքում:

-Դեռևս շարունակում եմ հանգստանալ,  քանի որ վերջին հեռուստանովելից հետո շատ էի սպառվել: Որոշեցի, որ պետք է հետևեմ ապրելակերպիս՝ սպորտով զբաղվեմ, բնությանը մոտ լինեմ, շրջեմ Հայաստանով, իսկ սեպտեմբերին կհասկանամ, թե ինչ է ինձ սպասվելու ապագայում:

-Նախորդ զրույցի ընթացքում ասացիք, որ գրեթե գտել եք նրան ում փնտում էիք: Ո՞ւր է գեղեցկուհին:

-Պետք է, որ սեպտեմբեր ամսվա  վերջ գար, սակայն… տարածությունը խնդիրներ է առաջացնում: Եթե մի օր որոշի Հայաստան գալ, ապա ես նրան կընդունեմ որպես հյուրի: Մնացածը ասել չեմ կարող, ժամանակը ցույց կտա:

-Փաստորեն հարաբերությունները կարմրահեր աղջկա հետ փոխվե՞լ են:

-Ընկերական հարաբերությունները միշտ էլ կան: Գերազանց մարդ ու աղջիկ է, բայց..ես դեռ կասկածների  մեջ եմ: Հասկացել եմ, որ  սարսափելի  բծախնդիր եմ:

-Այսինքն՝  Նարեկ Մակարյանի սիրտը մնա՞ց ազատ:

-Իմ սիրտը նորից ազատ է: Ենթադրում եմ, որ երկար ժամանակ դեռ ազատ էլ կմնա: Համատեղել իմ ապրելակերպը ու անձնական կյանքը, իրոք դժվար է: Շատ եմ փորձել, զիջումների գնալ, բայց ապարդյուն: Երբեմն աղջիկները չեն հասկանում, որ արտիստը սովորական կյանքով չի ապրում, բայց չեմ էլ մեղադրում նրանց: Օրինակ՝ եթե ես ինքս իմ հետ շփվեի, ես երևի կկախվեի: