Life.panorama.am-ը գրում է.
Հանրային հեռուստաընկերության «Ամենակարող երգիչ» նախագծի շուրջ զարգացող սկանդալը կարծես թե օրեցօր նոր թափ է հավաքում, չնայած նրան, որ Life.panorama.am-ը օրերս է ներկայացրել հեռուստաընկերության դիրքորոշումը ծավալված քննարկումների վերաբերյալ:
Life.panorama.am-ը թեմայի շրջանակում, ինչպես եւ Հայաստանում տիրող մշակութային որակի մասին խոսել է երգիչ, երաժիշտ Արթուր Իսպիրյանի հետ:
«Բարեբախտաբար՝ ես հեռուստացույց առհասարկ չեմ նայում, ինձ բախտ չի վիճակվել տեսնելու «Ամենակարող երգիչ» հաղորդումը, բայց վերջին օրերի քննարկումների ու քննադատությունների մասին տեղյակ եմ համացանցի միջոցով: Իհարկե, շատ խոսել չեմ կարողանա, քանի որ չեմ դիտել: Ինքս Հանրային հեռուստատեսության մի շարք նախագծերում ելույթ եմ ունեցել, հիմա էլ այդ հեռուստաընկերությամբ գործում է իմ ամենասիրելի ծրագիրը՝ «Երգ երգոցը», իսկ թե ինչու է որոշում կայացվել, որ գործի «Ամենակարող երգիչ» հաղորդումը, չգիտեմ, ամեն դեպքում՝ մենք հոգնել ենք ռաբիզ, ցածր որակի երաժշտությունից, ցածրաճաշակ ֆիլմերից ու քաղաքական մեկնաբաններից, որոնց ներքո, ցավոք, արդեն սերունդներ են մեծանում: Երբ ժամանակ առ ժամանակ խնջույքներին ռաբիզ երաժշտության ներքո տեսնում եմ երիտասարդների փայլող աչքերը, ցավ եմ ապրում, որովհետեւ մենք կորցնում ենք մեր գրագիտությունն ու ճաշակը»,- նշեց Ա. Իսպիրյանն ու հավելեց.
«Չեմ կարծում, որ ճիշտ որոշում կամ դիրքորոշում է՝ ցուցադրել ռաբիզ կատարումներ ու այդպիսով բացատրել դրա անպետքությունը: Չի կարելի անճաշակություն ցույց տալով ապացուցել, որ դա չի կարելի անել: Հանրային հեռուստաընկերությունը միշտ էլ լիդեր է եղել ասպարեզում ու չէի ցանկանա, որ այս հեռուստաընկերությամբ ցուցադրվի ցածրորակ մի բան»:
«Ես ցավում եմ, որ մեր գովազդատուները պատրաստ են վճարել ավելի շատ ցածրորակ հաղորդումների, քան բարձրաճաշակ նախագծերի համար, մեր օլիգարխների մեծ մասը հենց այդ ճաշակն ունեն, այդ երաժշտությամբ են նրանք ապրում: Ցավում եմ, որ մեր այսօրվա իրականության մեջ հեռուստաընկերություններին պետք է վճարել, որ երգչի տեսահոլովակը ցուցադրեն: Ինքս նման բան երբեք չեմ արել ու չեմ անի, ու շատ երգիչներ, ինչպես եւ ես, վճարունակ չեն դրա համար, փոխարենը ռեստորանային մի շարք երգիչներ, ովքեր բավականին մեծ գումարներ են աշխատում, կարող են իրենց թույլ տալ թանկարժեք տեսահոլովակներ նկարահանել ու հետո վճարել, որ դրանք ցուցադրեն հեռուստաընկերություններով: Փաստացի, շուկան գտնվում է նրանց ձեռքում, ոքեր փող ունեն»,- նշեց երգիչը:
Արթուր Իսպիրյանը հայտնեց, որ նորանշանակ Մշակույթի նախարար Արմեն Ամիրյանի հետ մեծ հույսեր է կապում.
«Ի ուրախություն բոլոր արվեստագետների՝ ՀՀ Մշակույթի նախարար նշանակվեց Արմեն Ամիրյանը: Այս լուրը շատ հաճելի իրարանցում է ստեղծել, բոլորը մեծ հույսով ու լիաթոք ուրախությամբ են խոսում այս մասին: Նոր վարչապետի նշանակումը եւս մեծ հույսեր է տվել, բոլորը խոսում են այն մասին, տպավորություն է, որ թունելի վերջում մի լույս երեւաց: Հուսամ չենք սխալվում ու մեր երկրի բոլոր ոլորտներում լավ փոփոխությունները զգալի կլինեն: Արմեն Ամիրյանը շատ բարձր ճաշակի տեր մարդ է, նա շատ լավ գիտի որակյալ ու վատ երաժշտության տարբերությունները, վստահ եմ, նաեւ պայքարի ձեւեր մշակած կլինի: Կարծում եմ՝ նա նաեւ այն լծակները կունենա, որպեսզի միջամտի հեռուստատեսություններով ցածրորակ երաժշտության պրոպագանդմանը, ինչպես արեց Հանրային ռադիոյում: Այս առումով հույսս նաեւ նորանշանակ վարչապետն է, ով իմ տեղեկություններով շատ երաժշտասեր, բարձրաճաշակ ու խելացի մարդ է, նա արդեն իսկ մեզ համար շատ ցավոտ խնդիրների լուծման կարեւորության հարցն է բարձրացրել»,- ընդգծեց Արթուր Իսպիրյանը:
