Սեւանում ու Արթիկում ընտրությունները թեժ են. պայքարում են ՀՀԿ-ական, ԲՀԿ-ական եւ անկուսակցական թեկնածուները

Գեղարքունիքի մարզի Սեւան քաղաքում այսօր՝ հոկտեմբերի 2-ին, մեկնարկել են քաղաքապետի ընտրությունները: Քաղաքապետի թեկնածու է առաջադրվել անկուսակցական Սարգիս Մուրադյանն ու ՀՀԿ-ական Ռուդիկ Ղուկասյանը:

Անկուսակցական Սարգիս Մուրադյանին սատարում է «Հանրապետական» կուսակցությունը եւ Գեղարքունիքի մարզպետ Ռաֆիկ Գրիգորյանը: ՀՀԿ-ական Ռուդիկ Ղուկասյանին, սակայն, «Հանրապետական» կուսակցությունը չի սատարում:

Արթիկում առաջադրվել է քաղաքապետի երկու թեկնածու՝ նախկին ԲՀԿ-ական Մուշեղ Պետոյանն ու Մխիթար Վարագյանը, որի ընտանիքը Ռուսաստանի Դաշնությունում խոշոր բիզնեսներ ունի: Նախկին ԲՀԿ-ական քաղաքապետի թեկնածու Մուշեղ Պետոյանին աջակցում է «Հանրապետական» կուսակցությունը: 

Նշենք, որ այսօր տեղական ինքնակառավարման մարմինների ընտրություններ տեղի կունենան Գեղարքունիքի, Կոտայքի, Լոռու, Շիրակի, Վայոց ձորի եւ Սյունիքի 375 համայնքներում, իսկ Գյումրիում եւ Վանաձորում՝ ավագանու: Քաղաքապետի ընտրություններ տեղի կունենա 26 քաղաքային համայնքում,  միայն համայնքի ղեկավար կընտրեն՝ 2 -ում, ավագանու անդամ՝ 8 եւ համայնքի ղեկավար եւ ավագանի 16 -ում:

Բացի այդ,  Գյումրիում եւ  Վանաձորում  առաջին անգամ քաղաքացիները ընտրություն կկատարեն ոչ թե անձերի, այլ քաղաքական ուժերի միջեւ եւ հաղթող քաղաքական ուժն էլ առաջիկա 5 տարիների ընթացքում կղեկավարեն այդ քաղաքները:

Առավել թեժ ընտրություններ են սպասվում Գյումրիում, Վանաձորում, Արթիկում եւ Սեւանում: 

Գյումրիում տեղական ինքնակառավարման մարմինների ընտրություններին մասնակցելու համար գրանցվել է 10 կուսակցություն եւ մեկ դաշինք՝ «Ալյանս առաջադիմական ցենտրիստական» կուսակցությունը, «Բարգավաճ Հայաստան» կուսակցությունը, «Գաղափարակից լիբերալների ալյանս» (ԳԱԼԱ) կուսակցությունը, «Գյումրեցու ոգի» կուսակցությունը, «Գործարար» կուսակցությունը, «Համախմբում»  կուսակցությունը, «Հայ ազգային կոնգրես» կուսակցությունը, «Հայ հեղափոխական դաշնակցություն» կուսակցությունը, «Հայկական վերածնունդ» կուսակցությունը, «Քաղաքացիական պայմանագիր» կուսակցությունը եւ «Բալասանյան» դաշինքը, որին սատարում է իշխող «Հանրապետական» կուսակցությունը:

Վանաձորում համայնքի ավագանու ընտրություններին մասնակցելու համար գրանցվել է 8 կուսակցություն՝ «Բարգավաճ Հայաստան», «Լուսավոր Հայաստան, «Համախմբում», «Հայ ազգային կոնգրես», «Հայ հեղափոխական դաշնակցություն», «Հայաստանի Հանրապետական», «Հայկական վերածնունդ», «Քաղաքացիական պայմանագիր» կուսակցությունները: