Life.panorama.am-ը գրում է.
Իրանահայ երգչուհի Ռաիսա Ավանեսյանը կարճ ժամանակով Հայաստանում է. նա եկել է Երեւան, որպեսզի նկարահանվի «Հայաստանի ձայնը 3» նախագծի հաղթանակին արժանանալուց հետո ստացած մրցանակ-տեսահոլովակում:
Life.panorama.am-ի հետ զրույցում Ռաիսան նշեց, որ մեծ ոգեւորությամբ է սպասում տեսահոլովակի նկարահանմանը, քանի որ երգը վաղուց է պատրաստ.
«Երգս պատրաստ է, պարզապես տեսահոլովակի նկարահանումները ձգձգվում են, քանի որ ռեժիսոր Ժոռ Մելոյանը հաճախ է գործերով մեկնում արտերկիր: Ինչեւէ, ուրախ եմ, որ նրա պես տաղանդավոր մասնագետ է զբաղվելու տեսահոլովակիս ռեժիսորությամբ, հավանաբար նկարահանումները կլինեն առաջիկա մեկ ամսվա ընթացքում»,- նշեց Ռաիսան ու խոսեց երգի մասին.
«Երգի երաժշտության հեղինակն է Նիկ Եգիբյանը, ով նաեւ զբաղվել է գործիքավորմամբ, իսկ խոսքերը հեղինակել է Ավետ Բարսեղյանը: Երգս տարօրինակ աղջկա մասին է` իսկը իմ մասին,- ծիծաղելով նշեց երգչուհին ու շարունակեց,- կարծում եմ, Ավետն ինձ ճանաչելով, կարողացել է համապատասխան խոսքեր ընտրել: Երգը ուժեղ կամքով աղջկա մասին է, նա ասում է` եթե մեկն ինձ սիրում է, ուրեմն պետք է ընդունի ինձ այնպիսին, ինչպիսին կամ: Ի դեպ` նշեմ, որ նախապես Ավետին չէի ասել, թե ինչ խոսքեր եմ պատկերացնում, նա անձամբ է որոշել այս բովանդակությունը: Երգս շատ հիթային, ինչպես ասում են` «դռայվով» է, բոլորովին նոր ոճում, որի նմանը կարծես թե Հայաստանում չկա. հուսամ հավանության կարժանանա»:
Մեզ հետ զրույցում Ռաիսան նշեց նաեւ, որ բացի սպասվող տեսահոլովակից, այս պահին մրցանակից դուրս մեկ այլ երգ էլ է պատրաստում.
«Հիմա մեկ երգ էլ ունեմ, որի վրա աշխատում եմ. շատ գեղեցիկ, մելոդիկ երգ է, որի երաժշտության հեղինակը կրկին Նիկն է, իսկ խոսքերը դեռեւս գրված չեն: Այս երգի տեսահոլովակը եւս շատ չի ուշանա, միայն թե այս անգամ տեսահոլովակը կնկարահնեմ Թեհրանում, քանի որ այնտեղ էլ ունեմ շատ տաղանդավոր երիտասարդ ընկերներ: Ուզում եմ նոր մարդկանց հետ էլ աշխատել, որպեսզի ձեռագրային փոփոխություն լինի»,- պատմեց երգչուհին:
Ռաիսան Երեւանում կմնա եւս մեկ ամիս ու կվերադառնա Թեհրան, ուր իրեն են սպասում իր ստուդիայի 130 աշակերտները: Հետաքրքրվելով, թե Ռաիսա Ավանեսյանը չի՞ մտածում Հայաստան տեղափոխվելու ու այստեղ բնակվելու մասին, պատասխանեց.
«Ես մի անգամ փորձեցի գալ ու այստեղ ապրել, սակայն չստացվեց միայն մի պատճառի համար` ֆինանսական տեսանկյունից այստեղ շատ դժվար է ապրելը: Ակումբում երգող երգիչը 3-4 ժամ կենդանի երգելուց հետո ստանում է ընդամենը 15.000 դրամ, ինչն ուղղակի ծիծաղելի է ու աշխարհում նման բան չկա. ես շատ ավելին ստանում եմ Թեհրանում մեկ պարապմունքի դիմաց: Դժբախտաբար, մեր ակումբային երգիչները շատ ցածր աշխատավարձ են ստանում, շատ կցանկանայի, որ այդ հարցը շտկվեր: Ինքս շատ եմ սիրում Հայաստանը, անկեղծորեն` մեծ հաճույքով կապրեի այստեղ ու երբեք չէի գնա, սակայն, ցավոք, չկան համապատասխան պայմաններ, որպեսզի մարդն իրեն լիարժեք զգա ու գոյատեւի»:
