Ողջ ճշմարտությունը «տնային աշխատանքի» մասին

Վերջին 10 տարիների ընթացքում Փենսիլվանիայի համալսարանի պրոֆեսոր Ջերալդ Ք. Լե Տանդրեն (Gerald K. LeTendre) իր գործընկերների հետ միասին ուսումնասիրել է, թե ինչպես է տարբեր երկրներում աշակերտներին հանձնարարվող տնային առաջադրանքների ծավալն ազդում նրանց կրթամակարդակի և առաջադիմության վրա: Ներկայացնում ենք այդ թեզիսի որոշ հատվածներ, որոնք հրապարակել է The Washington Post-ը:

1. Հետազոտության գլխավոր եզրահանգումներից մեկը հետևյալն է. առավել մեծ ծավալի տնային առաջադրանքներ երեխաներին հանձնարարվում են թույլ զարգացած տնտեսություն և վառ ընդգծված սոցիալական անհավասարություն ունեցող երկրներում: Ու չկա ոչ մի ապացույց, որ ծանրաբեռնվածության նման աստիճանը դրական է ազդում առաջադիմության ու կրթամակարդակի վրա:

2. Ծնողների ճնշող մեծամասնությունը գտնում է, որ վաղ տարիքից տնային առաջադրանքներ կատարելը երեխային վարժեցնում է կարգապահության ու ինքնուրույնության, իսկ հետագայում էլ այդ երեխաները շատ ավելի հեշտ են կյանքում և ուսման մեջ հասնում հաջողությունների: Ընդ որում՝ 1890-1920թթ-ից ԱՄՆ-ում տնային առաջադրանքները չէին կարևորվում: Այն կիրառվում էր բացառապես միայն որպես պատժամիջոց, որը երեխային զրկում էր խաղերից ու ազատ ժամանցից:

3. Գիտնականները հաստատեցին, որ առաջադրանքների մեծ ծավալի պատճառով հաճախակի վեճեր են առաջանում ծնողների ու երեխաների միջև երեխաների կողմից դրանք չկատարելու կամ կատարել չցանկանալու պատճառով: Տրամաբանական է, որ նման դեպքերում տնային առաջադրանքը միայն բացասական էմոցիաներ կառաջացնի ու ոչ մի առաջադիմության էլ չի հանգեցնի:

 

Պրոֆեսոր Ջերալդ Ք. Լե Տանդրեն․ «Հիմա էլ կասե՞ք, որ տնային առաջադրանքը կապ ունի ուսման մեջ առաջադիմելու հետ: Պատասխանն ակնհայտ է՝ իհարկե ՈՉ: Աշխարհի ոչ մի երկրում աշակերտների տնային առաջադրանքները չեն նպաստում նրանց ուսման մեջ առաջադիմելուն:

4. Անիմաստ է հերքել, որ ներկայումս տնային առաջադրանք ասվածը համընդհանուր երևույթ է: Հարցված 4-րդ դասարանի աշակերտների միայն 7% է ասել, որ տնային առաջադրանք չի ունենում: Տնային առաջադրանքը նպատակահարմար է միայն միջին ու ավագ դպրոցներում առաջադիմություն ապահովելու համար:

5. Իսկ ահա տարրական դասարանների աշակերտների համար գիտականորեն ապացուցված է, որ անգամ 30 րոպե տնային առաջադրանքներ կատարելն արդեն իսկ սթրես է ու ծանրաբեռնվածություն: Չինացի գիտնականները պնդում են, որ օրական երկու ժամ տնային առաջադրանք կատարելը խանգարում է երեխայի բնականոն քունն ու օրգանիզմը ենթարկում է սթրեսի: Չորրորդ դասարանցիների մոտ 10%-ն ամբողջ աշխարհում խոստովանել է, որ տնային առաջադրանքների վրա օրական ծախսում է մի քանի ժամ, իսկ շաբաթական՝ 3-4 օր, օրական կես ժամ միայն մաթեմատիկայի առաջադրանքների վրա է ծախսում:

 

Ուսուցիչը պետք է յուրաքանչյուր դասարանի հետ առանձին զբաղվի: Ուսուցիչը պետք է քննարկի ծնողների ու աշակերտների հետ՝ արդյոք շա՞տ չեն երեխաներին հանձնարարվող տնային առաջադրանքները, արդյոք դրակա՞ն է ազդում առաջադրանքների ծավալը ուսման մեջ առաջադիմելու գործին:

6. Ակնհայտ է, որ տնային առաջադրանքների թույլատրելի ծավալը պետք է լինի երեխայի տարիքին, նրա ընտանեկան ու մշակութային սովորույթներին համապատասխան:

7. Որոշ ժամանակ առաջ Ֆրանսիայի նախագահ Ֆրանսուա Օլանդն առաջարկեց առհասարակ արգելել տնային առաջադրանքները, քանի որ այն, ըստ նախագահի, կարող է բերել հասարակության մեջ լիբերալ կարգերի կործանմանը: Գիտնականները հաստատում են տնային առաջադրանքների լուրջ ազդեցությունը, սակայն Օլանդի հետ չեն համաձայնվում: Քիչ հավանական է, որ այն կարող է լինել դասային անհավասարության ու թշնամանքի պատճառ:

8. Ուսումնասիրությունների հիմքում ընկած են TIMSS-ի (դպրոցի մաթեմատիկական և բնագիտական գիտելիքների որակը ուսումնասիրող միջազգային մոնիտորինգային կազմակերպություն) ուսումնասիրությունների արդյունքները: TIMSS-ի վարկանիշային արդյունքները հրապարակվում են 5 տարին մեկ և միանգամից մի շարք միֆեր են կործանում: Օրինակ՝ ասիական երկրներում, ինչպիսիք են Հոնկոնգը, Թայվանն ու Ճապոնիան, մաթեմատիկայի ցուցանիշները ամենաբարձրն են աշխարհում, բայց արի ու տես, որ տնային առաջադրանքների ծավալներն աշխարհի մակարդակով միջին հորիզոնականում են: Նիդեռլանդներում ամեն 5-րդ 4-րդ դասարանցին, առհասարակ, տնային առաջադրանքներ չի կատարում, բայց դա չխանգարեց հոլանդացի դպրոցականներին մաթեմատիկական գիտելիքների իմացության մակարդակով հայտնվել աշխարհի ամենաբարձր վարկանիշն ունեցող երկրների ցանկում: Ամերիկացի դպրոցականներն այս ցանկում միջին դիրք են զբաղեցնում, իսկ ահա ռուսական դպրոցականները սովորաբար 5-յակում են արդեն մի ամբողջ տասնամյակ:

Գիտաշխատողներին և դասագրքեր ստեղծողներին արժե ուսումնասիրել աղքատության,  սոցիալական անհավասարության ու տնային առաջադրանքների ծավալների միջև կապը: Հարկ է մտածել այն մասին, թե ինչպես կատարելագործել ուսումնական պրոցեսը դասասենյակում, և ոչ թե ամենը թողնել տնային առաջադրանքի հույսին:

9. Ժամանակակից հանրակրթության թիվ մեկ խնդիրը դպրոցական ծրագրի ահռելի ծավալներն են և ճնշումները ուսուցիչների հանդեպ: Ուսուցիչը ֆիզիկապես չի հասցնում աշակերտին «մատուցե» անհրաժեշտ ծավալով ողջ նյութը, այդ իսկ պատճառով էլ մեծամասնությունը թողնում է տնային առաջադրանքի հույսին:

10. Ամենակարևոր խորհուրդը, որն այս ուսումնասիրություններն իրականացնողը տալիս է ուսուցիչներին. անհատական մոտեցում ցուցաբերել տնային առաջադրանքներ հանձնարարելու գործում, հաշվի առնել երեխայի տարիքը, ընտանեկան պայմանները, հետաքրքրությունները, կոնկրետ կարողությունների ուսուցանման կարևորությունը՝ յուրաքանչյուր երեխայի մոտ առանձին: Միայն այս պարագայում դպրոցին կհաջողվի արդյունավետ դարձնել տնային առաջադրանքը:

Թարգմանությունը՝ BlogNews.am