Մոդել Զառա Մինասյանը` «ԴոՄիՆո»-ում նկարահանվելու, անձնական կյանքի եւ տղամարդու իդեալի մասին

Մոդել Զառա Մինասյանին հեռուստադիտողն առաջին անգամ նկատեց «Անծանոթը» հեռուստասերիալում: Այժմ գեղեցկուհին նկարահանվում է «ԴոՄիՆո» սիթքոմում, որտեղ մարմնավորում է հմայիչ եւ խորամանկ Աննային:

Նոր կերպարի, անձնականի եւ, առհաարակ, հեռուստատեսության մասին հետաքիր զրույց ենք ունեցել Զառայի հետ, որն էլ ներկայացնում ենք ձեր ուշադրությանը:

-Զառա, Ձեզ ավելի շատ ճանաչում են մոդելային ասպարեզում: Ինչպե՞ս սկսեցիք նկարահանվել ֆիլմերում:

-Այո, ինչպես նշեցիք՝ ինձ ավելի շատ ճանաչում են, որպես մոդել, քանի որ 10 տարուց ավել է, ինչ մոդելային ասպարեզում եմ: Առաջին նկարահանումս եղել է հրավերով, որից հետո ինձ տեսել են էկրաններին եւ սկսել եմ ստանալ նկարահանվելու բազմաթիվ առաջարկներ:

-Մոդել դառնալը շատ աղջիկների համար մանկության երազանք է: Ձեր դեպքում է՞լ է այդպես եղել:

-Ես կասեի՝ դա ինձ համար նպատակ էր, ոչ թե երազանք: Պարզապես, ինձ մանկուց գրավել է նորաձեւությունը:

-Ի՞նչ եք մասնագիտությամբ:

-Մասնագիտությամբ լեզվաբան եմ, ավարտել եմ Երեւանի Վալերի Բրյուսովի անվան պետական լեզվահասարակագիտական համալսարանը: 

-Խոսենք «ԴոՄիՆո» սիթքոմից, որտեղ մարմնավորում եք Աննային:Մի փոքր կպատմե՞ք Ձեր կերպարի մասին եւ կներկայացնե՞ք, թե ինչ  զարգացումներ է այն ունենալու հետագայում: 

-«Դոմինո»-ում մարմնավորում եմ մի խորամանկ աղջկա, որն իր գեղեցկությունը գործի դնելով փորձում է գլխավոր կերպարին՝ Միկային գցել իր ծուղակը: Ինչ վերաբերում է ֆիլմում կերպարի զարգացմանը՝ չակերտները չեմ բացի, որպեսզի հեռուստադիտողի համար հետաքրքիր լինի: 

-Սովորաբար, երբ էկրաններին գեղեցիկ աղջիկ են տեսնում, սկսում են ավելի մեծ ուշադրություն դարձնել նրա արտաքինին, ոչ թե տաղանդին: Ձեզ երբեւէ դա խոչընդոտե՞լ է:

-Չեմ ուզում ինձ գերագնահատել, բայց բացի արտաքին գեղեցկությունից՝ ամենակարեւորը ես ունեմ իմ ներքին հմայքն ու ներդաշնակությունը, հետեւաբար նման խնդիր չեմ ունեցել:

-Համոված եմ՝ շատ երկրպագուներ ունեք. իսկ ի՞նչ կարգավիճակում է Ձեր սիրտը:

-Առհասարակ, անձնականից խոսել չեմ սիրում, կփորձեմ լինել համառոտ՝ կյանքումս ինչ-որ նորության կամ փոփոխության դեպքում հետագա հարցազրույցներում կբարձրաձայնեմ:

-Կարծիք կա, որ գեղեցիկ կանայք իրենց կողքին ցանկանում են տեսնել հմայիչ տղամարդկանց. համաձա՞յն եք ասվածի հետ:

-Ինձ համար տղամարդու գրավչությունը նրա արտաքինի մեջ չէ, այլ արած քայլերի:

-Արդեն նկարահանվել եք եւ սերիալում, եւ սիթքոմում: Գեղարվեստական ֆիլմերում նկարահանվելու առաջարկներ դեռեւս չունե՞ք:

-Գեղարվետական ֆիլմում դեռեւս չեմ նկարահանվել, բայց եթե լինի հետաքրքիր առաջարկ, ինչո՞ւ ոչ, կարելի է մտածել այդ ուղղությամբ…

Սյունե Առաքելյան

NEWS.am STYLE