Քրդամետ կուսակցությունը պահանջել է Դիարբեքիրի նահանգապետից բացել Դիարբեքիրի ահաբեկչության վերաբերյալ «բոլոր խաղաքարտերը»

Թուրքիայի ընդդիմադիր Ժողովրդադեմոկրատական կուսակցության մամուլի գրասենյակը պաշտոնապես կոչ է արել Դիարբեքիրի նահանագպետ Հուսեյ Աքսոյին հասարակությանը ներկայացնել նոյեմբերի 4-ին Դիարբեքիրում տեղի ունեցած ահաբեկչության վերաբերյալ «բոլոր խաղաքարտերը». այս մասին գրում է թուրքական diken.com.tr կայքը: 

Հիշեցնենք, որ նոյեմբերի 4-ին Դիարբեքիրում տեղի ունեցած ահաբեկչության պատասխանատվությունը պաշտոնապես ստանձնեց «Իսլամական պետություն» ահաբեկչական խմբավորումը: Մինչդեռ ահաբեկչության օրը՝ պայթյունից ժամեր անց, Դիարբեքիրի նահանգապետ Հուսեյն Աքսոյը շտապել էր հայտարարել, որ ահաբեկչության պատասխանատվությունը ստանձնել է «Քուրդիստանի աշխատավորական կուսակցություն» խմբավորումը: 

Քրդամետ կուսակցության մամուլի գրասենյակի տարածած հաղորդագրան տեքստում ընդդիմադիրները մեղադրել են Դիարբեքիրի քաղաքապետին սուտ լուրերի միջոցով հասարակությանն ապակողմնորոշելու և կուսակցության անդամներին որպես թիրախ ցույց տալու համար: 

Մամուլի գրասենյակից նաև հաղորդել են, որ գործի դրված պայթուցիկը պայթել է իր նպատակակետին չհասած, և որ իրական թիրախը իրենց կուսակցության անդամներն են եղել, որոնք հրաշքով են փրկվել: 

 

Հիշեցնենք, որ նոյեմբերի 4-ի առավոտյան Դիարբեքիր քաղաքի Բաղլար թաղամասում հզոր պայթյուն է տեղի ունեցել, ահաբեկչությունն իրականացվել է պայթուցիկներով լի մեքենայի պայթեցման միջոցով: 

Նշենք, որ նույն օրը Դիարբեքիրում և Անկարայում ձերբակալվել է քրդամետ Ժողովրդադեմոկրատական կուսակցության 13 անդամ, այդ թվում` կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը: 

Այժմ մի շարք պատգամավորների անձեռնմխելիության մասին օրենքը, որն ամրագրված էր Սահմանադրության 83-րդ հոդվածով և արգելում էր պատգամավորներին «կալանավորել, հարցաքննել, դատապարտել առանց խորհրդարանի թույլտվության», համարվում է անվավեր:

2015 թվականի դեկտեմբերին այն ժամանակվա Թուրքիայի վարչապետ Ահմեթ Դավութօղլուն քննադատել էր ԺԴԿ-ի քաղաքականությունը և նրա անդամներին մեղադրել ՔԱԿ-ի հետ կապերի համար։

ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն: Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թվականին հիմնադրել է Աբդուլլահ Օջալանը, ով ներկայում ցմահ ազատազրկում է կրում թուրքական Իմրալը կղզու բանտում, սակայն շարունակում է համարվել կազմակերպության ղեկավարը։