Հայաստանում բացվել է տարածաշրջանում եզակի արյունաբանական կենտրոնը

Հայաստանն արդեն ունի գերժամանակակից բժշկական սարքավորումներով հագեցած արյունաբանական կենտրոն, որը, մասնագետների վկայությամբ, տարածաշրջանում եզակի է:

Նոյեմբերի 8-ին տեղի ունեցավ ՀՀ ԱՆ պրոֆեսոր Ռ. Յոլյանի անվան արյունաբանական կենտրոնի նորակառույց մասնաշենքի բացման արարողությունը, որին մասնակցում էր նաև ՀՀ նախագահ Սերժ Սարգսյանը, ով շրջայց կատարեց նորակառույց կենտրոնում:

ՀՀ ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը լրագրողների հետ զրույցում ընդգծեց, որ 85 տարի բնակչությանը ծառայություններ մատուցած արյունաբանական կենտրոնը վերածնունդ է ապրում: «Մենք շատ լավ տեսնում ենք, որ ժամանակները, չափանիշներն ու պահանջները փոխվում են: Եթե մենք այս ամենը չփոխեինք, մենք դոփելու էինք նույն տեղում, ունենալու էինք մեծ կորուստներ: Բարեբախտաբար, այս ծրագրի սկսվելուն մեծ ուշադրություն դարձրեց Առաջին տիկինը՝ Ռիտա Սարգսյանը: Ստեղծելով «Նվիրիր կյանք» հÕ �սարակական կազմակերպությունը՝ նա սկսեց դեղամիջոցներով օգնել հիվանդ երեխաներին, իսկ եթե Հայաստանում այդ երեխաների բուժումը հնարավոր չէ, ապա՝ արտասահմանյան կլինիկաներում: Բայց, ինչ խոսք, դա ժամանակավոր մոտեցում էր, որովհետև հիմնական նպատակն էր ստեղծել մի հաստատություն, որտեղ կբուժվեն շատ ավելի մեծ քանակությամբ հիվանդներ,և ոչ միայն երեխաներ, այլ նաև մեծահասակներ: Այդ առումով կազմվեց պետական ծրագիր՝ վերակառուցվել արյունաբանական կենտրոնի շենքը: Այստեղ ներդրվել են բոլոր անհրաժեշտ և գերժամանակակից  սարքավորումները»,- «Արմենպրես»-ի հաղորդմամբ՝ ասաց Բաբլոյանը:

Նա հավելեց, որ այսուհետև հիվանդներին բուժման համար արտերկիր ուղարկելու կարիք չի լինի, որովհետև այն, ինչ նրանք կարող էին ստանալ արտերկրում, արդեն կարող են ստանալ Հայաստանում: «Մինչ շենքի վերակառուցումը տնօրենը քայլեր է ձեռնարկել եվրոպական լավագույն կլինիկաներում մասնագետների վերապատրաստելու ուղղությամբ: Ամեն մասնագետ արդեն տիրապետում է իր մասնագիտական կարողություններին և  գործունեությանը»,- եզրափակեց Բաբլոյանը:

Ռ. Յոլյանի անվան արյունաբանական կենտրոնի տնօրեն Սմբատ Դաղբաշյանն ընդգծեց, որ կենտրոնը վերանորոգման կարիք ուներ: «Հիվանդների բուժման համար պայմանները բավարար չէին: Եվ այդ պատճառով մենք բազմաթիվ անգամ քննարկել ենք ժամանակակից արյունաբական կենտրոն ունենալու հարցը: «Նվիրիր կյանք» հիմնադրամի նախագահ տիկին Ռիտա Սարգսյանն այցելեց մեր կենտրոն, երեխաներին նվերներ բերեց, և, տեսնելով հիվանդասենյակների վիճակը, խոստացավ, որ մենք երկու տարի հետո կունենանք լավագույն սարքավորումներով կահավորված կենտրոն: Եվ դուք հիմա տեսնում եք կենտ րոնը, այն դարձավ իրականություն: Եվ մենք ունենք արյունաբանական գերժամանակակից կենտրոն: Այսօր պատմական օր է արյունաբանական բժշկության համար, որովհետև արյունաբանության կենտրոնն արդեն պատրաստ է ընդունել հիվանդներին: Դա  նշանակում է, որ շուրջ 6 հազար հիվանդ, այդ թվում՝ 1000 երեխա կարող են բուժօգնություն ստանալ այնպիսի պայմաններում, որոնց մասին կերազեին աշխարհի շատ արյունաբանական կենտրոններ»,- ընդգծեց Դաղբաշյանը:

Նա հավելեց, որ կենտրոնը տարածաշրջանում եզակի է: «Տարածաշրջանում նմանատիպ արյունաբանական կենտրոն չկա: Տարբեր երկրներում տարբեր բաժանմունքներ կան, բայց մենք կարողացանք պահպանել այս արյունաբանական կենտրոնը իր բոլոր բաժանմունքներով: Խոսքը մանկական, մեծահասակների բաժանմունքների, լաբորատորիաների մասին է: Այսօր այդ ամենին ավելացել է նաև ոսկրածուծի փոխպատվաստման բաժանմունքը: Այդ բաժանմունքը կարող է խթան հանդիսանալ առողջապահության ողջ համակարգի համար: Այստեղ մենք տարեկան շուրջ 60 փոխպատվաստում կկատարենք, ինչի համար ընտանիքներով արտերկիր մեկնելու անհրաժեշտություն այլևս չի լինի: Այդ փոխպատվաստումները պետք է իրականացվեն ինչպես «Նվիրիր կյանք» բարեգործական հիմնադրամի, այնպես էլ կառավարության միջոցների հաշվին, և մենք հիմա հաշվարկներ ենք ներկայացնելու Առողջապահության նախարարություն, որպեսզի հասկանանք, թե որքան քվոտաներ կարող են ունենալ երեխաներն այդ փոխպատվաստումը իրականացնելու համար»,- մանրամասնեց Դաղբաշյանը:

Նրա խոսքով՝ կենտրոնի բոլոր մասնագետները վերապատրաստվել են աշխարհի լավագույն կլինիկաներում: Կենտրոնը մոտակա ամիսներին կսկսի իրականացնել առաջին փոխպատվաստումները: Կենտրոնի հին մասնաշենքը կծառայի որպես արյան բանկ: Սմբատ Դաղբաշյանն ընդգծեց, որ կենտրոնը նաև արյուն հավաքելու խնդիր ունի, իսկ հավաքված արյունը տեղակայվելու է հենց արյան բանկում: Առաջիկա երկու շաբաթում էլ հին մասնաշենքում բուժվող հիվանդներն արդեն կտեղափոխվեն նորակառույց մասնաշենք:

Արյունաբանական կենտրոնում լրագրողների համար նաև շրջայց կազմակերպվեց: Շրջայցի ընթացքում լրագրողներին ուղեկցում էին Առաջին տիկին Ռիտա Սարգսյանը և կենտրոնի տնօրեն Սմբատ Դաղբաշյանը: