Դպրոցի տնօրենը սառնասրտորեն սպանել է. պնդում է սպանված բժիշկ Լեւոն Սահակյանի հայրը

Armtimes.com-ը գրում է.

Սպանված 22-ամյա բժիշկ Լեւոն Սահակյանի հայրը՝ Տիգրան Սահակյանը, կարծում է, «Պատանի լրագրողների» դպրոցի տնօրեն Վահան Ղազարյանը կանխամտածված է սպանել որդուն:

Այս մասին երեկ մեր հարցին ի պատասխան ասաց տուժողի իրավահաջորդի ներկայացուցիչ Վարդուհի Էլբակյանը: Լեւոն Սահակյանի հայրը գործով ներգրավվել է որպես իրավահաջորդ:

Հիշեցնենք, որ հոկտեմբերի 19-ի երեկոյան «Պատանի լրագրողների» դպրոցի տնօրեն Վահան Ղազարյանի եւ Լեւոն Սահակյանի միջեւ վիճաբանությունը սկսվել էր Լեւոնի նշանածի աշխատավարձը չվճարելու պատճառով: Դպրոցի տնօրեն, «Վան» հեռուստաստուդիայի ղեկավար Վահան Ղազարյանը նրան հանդիպման է կանչել, որից հետո Լեւոն Սահակյանը վնասվածքներով տեղափոխվել է հիվանդանոց: Հիվանդանոցում պարզվել է, որ վնասվել են երիտասարդի թոքն ու սիրտը: «Արմենիա» բժշկական կենտրոնում նրան անմիջապես վիրահատել են: Երկու օր անց, սակայն Սահակյանը հիվանդանոցում մահացել է: Վահան Ղազարյանը չի ընդունում մեղադրանքը՝ պնդելով, որ Լեւոնին սպանելու դիտավորություն չի ունեցել:

Սույն թեմայի վերաբերյալ մեր մի քանի հարցերին պատասխանել է տուժողի իրավահաջորդի ներկայացուցիչը:

- Վարդուհի, տուժողի հայրը՝ Տիգրան Սահակյանը, քրեական գործի շրջանակներումհարցաքննվե՞լ է:

- Սկզբնական շրջանում հարցաքննվել է, սակայն դրանից հետո չի հարցաքննվել: Նրա հարցաքննության ժամանակ ես դեռ ներգրված չեմ եղել: Հետագայում կհարցաքննվի եւ ավելի մանրամասն ցուցմունք կտա դեպքի հետ կապված: Ինքը, բնականաբար, ականատես չի եղել, տեղեկացված է այնքանով, որքանով որ պատմել է Լեւոնի ընկերը կամ նրա նշանածը:

- Դեպքից առաջ Լեւոն Սահակյանը հոր հետ խոսե՞լ է, տեղյակ պահե՞լ է, որ գնում է ՎահանՂազարյանի հետ հանդիպման:

- Հանդիպման մասին հայրը տեղյակ չի եղել: Դանակահարությունից անմիջապես հետո Լեւոնը զանգել է հորն ու ասել, որ վիրավոր է, քանի որ հայրն էլ մասնագիտությամբ բժիշկ է, ասել է՝ հասիր մոտակա հիվանդանոց, իսկ մոտական եղել է «Արմենիա» հանրապետական բժշկական կենտրոնը: Լեւոնն ինքն էլ եղել է մեքենայի ղեկին, հիվանդանոցը շատ մոտ է եղել, հասել է, վիրահատել են, կատարվել են համապատասխան հետազոտությունները, դրանից հետո արդեն տեղյակ եք՝ ուշքի չգալով, հաջորդ օրը մահացել է:

- Գործով մեղադրյալը չի ընդունում, որ Լեւոնին սպանելու դիտավորություն է ունեցել: Սրահետ կապված իրավահաջորդն ի՞նչ դիրքորոշում ունի:

- Պարոն Սահակյանն ունի իր դիրքորոշումը, ցուցմունք կտա, որից հետո, եթե ցանկանա, մամուլին կտեղեկացնենք: Բայց սպանելու հետ կապված՝ Տիգրան Սահակյանը կոնկրետ դիրքորոշում ունի: Նա ասում է, որ Վահան Ղազարյանը դիտավորյալ,  սառնասրտորեն, կանխամտածված արել է այդ գործողությունները:

- Մեր տեղեկություններով, մեղադրյալ Վահան Ղազարյանը Լեւոնին եւ ընկերոջըսպառնացել է նաեւ ատրճանակով: Տուժող կողմը նման տեղեկատվության տիրապետո՞ւմ է:

- Պարոն Սահակյանից տեղեկացել եմ նաեւ այդ հանգամանքի մասին: Ըստ նրա ունեցած տեղեկատվության՝ էդպես էլ եղել է, նաեւ սպառնացել է զենքով, դա եղել է դանակահարությունից հետո:

- Իսկ տեղյա՞կ եք, այդ զենքը խուզարկությամբ հայտնաբերվե՞լ է, թե՞ ոչ:

- Որքան գիտեմ, դեռ չի հայտնաբերվել:

- Դուք այս պահին գործի հետ կապված միջնորդություններ ներկայացրե՞լ եք:

- Դեռ ոչ, բայց հետագայում արդեն պլանավորած ունենք, որոշակի ցուցմունքներից հետո կարծում եմ, կլինեն միջնորդություններ, դրանք դեռ հրապարակման ենթակա չեն:

Նշենք, որ ըստ պաշտպանական կողմի՝ Վահան Ղազարյանը, երբ տեղեկացել է Լեւոն Սահակյանի մահվան մասին, ՁՊՎ-ում ինքնասպանության փորձ է կատարել՝ կոճգամ կուլ տալով: Ինքնասպանության փորձի հետ կապված սույն գործի շրջանակներում նյութեր են նախապատրաստվում: Երեկ ՀՀ քննչական կոմիտեից մեր հարցին ի պատասխան ասացին, որ քրեական գործի հարուցումը մերժվել է: Ինչ վերաբերում է կոնկրետ գործին, ապա ՔԿ-ից փոխանցեցին, որ բազմակողմանի քննություն է տարվում: Մեր տեղեկություններով, նախաքննական մարմինը քննում է նաեւ, թե տվյալ դպրոցում աշխատողներից ով է գրանցված աշխատել, որքան գումար է ստացել, կամ ստացել է, թե՝ ոչ:

Շարունակությունը՝ այստեղ: