Կարինե Աճեմյանը Միջխորհրդարանական միության վեհաժողովում ներկայացրել է ապրիլին Արցախի դեմ ադրբեջանական ագրեսիան

Ազգային ժողովի ՀՀԿ խմբակցության պատգամավոր Կարինե Աճեմյանը կարևորում է Միջխորհրդարանական միության  վեհաժողովին հայկական պատվիրակության մասնակցությունը: Ազգային ժողովում լրագրողների հետ հանդիպմանը Միջխորհրդարանական միության վեհաժողովում հայաստանյան պատվիրակության անդամ Կարինե Աճեմյանը մանրամասներ ներկայացրեց հոկտեմբերի 22-28-ը Միության՝ Ժնևում կայացած 135-րդ վեհաժողովից, որին մասնակցել է նաև ՀՀ ԱԺ ՕԵԿ խմբակցության ղեկավար Հեղինե Բիշարյանը: «Երբեք չեմ հոգնի կրկնել, որ մենք շատ կարևորում ենք այս հարթակը, որովհետև սա միակ խորհրդարանական պլատֆորմն է, որտեղ ներկայացված են 170 երկրների պատվիրակներ ու միշտ՝ շատ ներկայացուցչական կազմով: Բոլոր այն հարցերը, որ այս հարթակում քննարկվում և քվեարկվում են, հրատապ են, առաջնային և արդիական: Ես ինքս կարևորում եմ ինչպես պաշտոնական, այնպես էլ ոչ պաշտոնական հանդիպումները, որովհետև պատգամավորները այդ հարթակներում է, որ կարողանում են բարեկամներ ձեռք բերել, ովքեր հետագայում իրենց կաջակցեն, ինչպես մենք ենք այս անգամ աջակցել որոշ խմբերի»,- «Արմենպրես»-ի հաղորդմամբ՝ նշեց Աճեմյանը:

Պատգամավորը կարևորում է վեհաժողովն այն առումով, որ դրա շրջանակում հայկական պատվիրակության ներկայացուցիչները հանդիպումներ են ունեցել տարբեր եվրոպական երկրների ներկայացուցիչների հետ: «Օրակարգում ընդգրկված էին հարցեր, որոնք վերաբերում էին Սիրիայում տիրող իրավիճակին: Իսկ բանավեճերը նվիրված էին խորհրդարանականներին, կոնֆլիկտների ժամանակ մարդու իրավունքների պաշտպանության խնդիրներին: Ես ինքս մոտ 140 երկրների պատվիրակների առջև ելույթ եմ ունեցել, ներկայացրել եմ մեր երկրում տեղի ունեցող վերջին քաղաքական իրադարձությունները՝ սահմ անադրական բարեփոխումները, Ընտրական օրենսգրքի ռեֆորմները և այն, թե ինչպես ենք մենք պատրաստվում 2017թ. խորհրդարանական ընտրություններին»,- մանրամասնեց պատգամավորը:

Աճեմյանն անդրադարձել է նաև Հայոց ցեղասպանության միջազգային ճանաչման անհրաժեշտությանը, ղարաբաղա-ադրբեջանական շփման գծում Ադրբեջանի կողմից հրադադարի ռեժիմի պարբերական խախտումներին, ներկայացրել է ուղիները, թե ինչպես կարող են պատգամավորները կանխել նման դեպքերը, որպեսզի հնարավոր լինի հասնել այն խաղաղությանը, որի մասին այդքան խոսվում է: «Ես ներկայացնում եմ նաև վեհաժողովի  խաղաղության և անվտանգության հարցերով բյուրոն: Բյուրոյի նիստի ժամանակ ներկայացրել եմ նաև ապրիլյան դեպքերը, երբ Ադրբեջանը լայնածավալ ռազմական գործողություններ սկսեց Արցախի դեմ»,- ընդգծեց Կարինե Աճեմյանը:

Վեհաժողովի շրջանակում նաև տեղի է ունեցել կանանց ֆորում, որին ևս մասնակցել է ՀՀ պատվիրակության անդամ Կարինե Աճեմյանը: Նա ընդգծեց, որ ֆորումի օրակարգում հիմնական թեմաներից մեկը քաղաքականության մեջ կանանց ներգրավվածությունն է եղել: Ֆորումի ընթացքում քննարկվել են տարբեր երկրներում կին պատգամավորների նկատմամբ բռնությունները: Կարինե Աճեմյանը ուրախությամբ ներկայացրել է, որ Հայաստանում նման դեպքեր չկան: «Նման երկրների ցուցակում առաջինը, հավանաբար, Թուրքիան է, որը շատ մեծ ցուցակ ունի պատգամավորների, ովքեր բռնությունների են ենթարկվել, սպանվել են, անհետ կորած են: Ես ծանոթացա տարբեր երկրների ցուցակներին և շատ զարմացա, որովհետև մեզ մոտ նման դեպքեր երբեք չեն գրանցվում»,-նշեց պատգամավորը: