Գալուստ Սահակյանն ընդունել է Նիկոլայ Ռիժկովի գլխավորած պատվիրակությանը

 ՀՀ Ազգային ժողովի նախագահ Գալուստ Սահակյանը նոյեմբերի 10-ին ընդունել է ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովի համանախագահ Նիկոլայ Ռիժկովին եւ հանձնաժողովի անդամներին:

Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, ողջունելով հյուրերին՝ Գալուստ Սահակյանը կարեւորել է միջխորհրդարանական հանձնաժողովի 28-րդ նիստի անցկացումը, ինչը եւս մեկ անգամ ապացուցում է համագործակցության ամրապնդման ու զարգացման երկուստեք պատրաստակամությունը:

Խորհրդարանի ղեկավարը գոհունակությամբ ընդգծել է, որ հայ-ռուսական բարեկամական հարաբերություններն ունեն բազմադարյա եւ հարուստ պատմություն, որոնք ամուր հիմք են հանդիսանում երկու երկրների ռազմավարական փոխգործակցության համար:

Արժեւորելով միջխորհրդարանական կապերի դերը միջպետական հարաբերությունների զարգացման գործում՝ Գալուստ Սահակյանը նշել է, որ այդ հարցում նշանակալի ավանդ ունի Միջխորհրդարանական հանձնաժողովը, որն իր հերթին արդյունավետ համակարգում է ՀՀ Ազգային ժողովի եւ ՌԴ Դաշնային ժողովի փոխհարաբերությունները:

Խորհրդարանի ղեկավարը կարեւորել է Եվրասիական տնտեսական միությանը Հայաստանի անդամակցությունը, ինչը լայն հնարավորություններ է ստեղծել երկկողմ առեւտրատնտեսական հարաբերությունների զարգացման համար:

ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովի համանախագահ Նիկոլայ Ռիժկովը, շնորհակալություն հայտնելով ջերմ ընդունելության համար, բարձր է գնահատել Հայաստանի եւ Ռուսաստանի միջեւ գոյություն ունեցող բարեկամությունը, միջխորհրդարանական համագործակցությունը:

Գալուստ Սահակյանն ու Նիկոլայ Ռիժկովը համոզմունք են հայտնել, որ նիստի քննարկումները կլինեն արդյունավետ եւ կհամապատասխանեն այն դաշնակցային փոխգործակցությանը, որը գոյություն ունի Հայաստանի եւ Ռուսաստանի միջեւ:

Հանդիպման ավարտին ՀՀ ԱԺ նախագահ Գալուստ Սահակյանը ՀՀ անկախության 25-ամյակի կապակցությամբ հասարակական եւ քաղաքական կյանքում ունեցած ավանդի համար ՀՀ ԱԺ պատվո մեդալով պարգեւատրել է ՀՀ ԱԺ պատգամավոր, ՀՀ ԱԺ եւ ՌԴ Դաշնային ժողովի միջեւ համագործակցության միջխորհրդարանական հանձնաժողովի նախագահի տեղակալ Վոլոդյա Բադալյանին, ով երկար տարիներ նշված հանձնաժողովում արդյունավետ աշխատում է: