Ես ոչնչից չեմ փախչել, ծնողներիս շնորհիվ արժանավայել կյանք եմ ունեցել հայրենիքում. Մեգգի Գրիգորյան

Life.panorama.am-ը գրում է.

Life.panorama.am-ի զրուցակիցն է ամերիկաբնակ հաղորդավարուհի եւ դերասանուհի Մեգգի Գրիգորյանը:

Մեգգի, մեր զրույցն ուզում եմ սկսել Ձեր զբաղվածությունից. բավականին աշխատասերեք ու կարծես թե անընդհատ ակտիվորեն աշխատում եք:

- Նախ շնորհակալ եմ հաճոյախոսության համար: Իմ անվան կողքին, չգիտեմ ինչու, շատ է հնչում «աշխատասեր» բնորոշումը: Անկեղծ ասած` դա ինձ միայն հաճույք է պատճառում եւ ավելի մեծ պատասխանատվության առաջ կանգնեցնում: Աշխատանքն իմ կյանքի ամենակարեւոր գործընթացն է: Օրս չեմ պատկերացնում առանց աշխատանքի, նույնիսկ հանգստյան օրերին ինձ զբաղմունք եմ գտնում կրկին աշխատանքային ոլորտում: Ու սա ոչ թե այն պատճառով, որ գումարի կարիք ունեմ, այլ պարզապես ուզում եմ աշխատել: Զբաղվածությանս աստիճանն այնքան է, որ երբեմն չեմ հասցնում նկատել օրվա սկիզբն ու ավարտը:

Այժմ առավոտյան ծրագիր եք վարում և  մարդկանց  առավոտները բարձր տրանադրություն հաղորդելու որոշակի «պարտավորություն» ունեք. դժվա՞ր չէ արդյոք:

- Անչափ ուրախ եմ, որ համարվում եմ Միացյալ Նահանգների գործող ամենավարկանիշային եւ պահանջված PanArmenian հեռուստաընկերության ընտանիքի անդամներից մեկը, եւ իմ ուսերին կրում եմ ամեն աշխատանքային շաբաթ մեր ամերիկաբնակ հայրենակիցներին բարի լույս մաղթելու պարտականությունը: Իմ գործընկերների հետ միասին ուղիղ եթերում վարում եմ «Բարի լույս հայեր» հաղորդումը, որը եթերում է երկուշաբթիից ուրբաթ` 09:30-11:10-ին: Էությամբ ես գիշերային մարդ եմ, «կյանքս կտամ» առավոտյան քնելու համար: Երբ ստացա «Բարի լույս հայեր»-ը վարելու առաջարկը, առաջին դժգոհությունը, որ առաջացավ մտքումս, հենց շուտ արթնանալու հետ էր կապված, սակայն հավաքելով ուժերս եւ առաջ բերելով հաղորդավարուհու դերում հեռուստատեսություն վերադառնալու ցանկությունս, հեշտությամբ կարողացա հաղթահարել քնիս հետ կապված խնդիրները: Այժմ ամեն աշխատանքային առավոտ արթնանալով 06:00-ին` մեծագույն հաճույքով եւ եռանդով պատրաստվում եմ իմ եթերներին եւ փորձում եմ իմ դրական լիցքերն ու երանգները փոխանցել հեռուստադիտողին` նրանց օրն առավել գունեղ դարձնելու նպատակով: Հուսամ` դա ստացվում է ինձ մոտ: Հեռուստատեսությունում ամենաշատը կարեւորում եմ անկեղծությունն ու պարզությունը: Հատկապես ամերիկաբնակ հայրենակիցներին շատ դժվար է ստել. նրանք զգայուն են եւ բծախնդիր, իսկ երբ անկեղծ ես եթերից, ուրեմն նրանց սիրելին ես:

Մեգգի, հեռուստադիտողը Ձեզ ճանաչեց «Կտակով թագուհին» հեռուստասերիալով: Հետաքրքիր է` կրկին նկարահանվելու ծրագրեր չկա՞ն:

- «Կտակով թագուհին» բազմասերիանոց հեռուստաֆիլմը մեծ դեր ունեցավ իմ կյանքում: Այն հնարավորություն տվեց թե ինձ, թե հեռուստադիտողին ավելի լավ ճանաչել եւ առավել բացահայտումներ կատարել իմ անձի եւ հնարավորությունների մասին: Չեմ ուզում ասել իմ տաղանդի, քանզի այդ բառին հարկավոր է շատ զգուշորեն մոտենալ: Նկարահանվելու առաջարկներ շատ եմ ունեցել վերջին շրջանում, սակայն դեռեւս ինձ հոգեհարազատ դեր չգտնելու պատճառով մերժել եմ: Հուսամ, որ ապագայում կգտնեմ իմ հերոսուհուն եւ մեծ հաճույքով կմարմնավորեմ նրան: Կարծում եմ` «Կտակով թագուհուց» հետո փոքր-ինչ դադարը պարտադիր էր` հեռուստադիտողին անդադար ներկյաությամբս չձանձրացնելու համար:

Մեգգի, նաեւ ներկայացումո՞վ եք այս շրջանում զբաղված:

- ԱՄՆ-ում երկար տարիներ գործում է հումորային «Դեմք շոու»-ն, որի մասնակիցներն իմ վաղեմի ընկերներն են: Գործի բերումով շատ ենք հանդիպել, սակայն երբեւէ չենք մտածել միասին աշխատելու մասին: Բայց ամիսներ առաջ ռեժիսոր Գոռ Կիրակոսյանից առաջարկ ստացա իրենց հետ խաղալ մի մյուզիքլում, որտեղ միակ աղջիկ մասնակիցն եմ ութ երիտասարդների շրջապատում: Չնայած առաջին անգամն էի նման հումորային նախագծում, բայց ամեն դեպքում որոշեցի ռիսկել եւ ուժերս փորձել նաեւ այս ժանրում: Հիմա պատրաստվում ենք նոր ներկայացման, սակայն դրանից զատ գրեթե ամեն շաբաթ ստեղծում ենք հումորային սկեչներ` սոցիալական ցանցերում մեր հետեւորդների համար:

Գիտեմ, որ Ձեր բիզնեսն ունեիք, հիմա գործու՞մ է սրահն ու ինչպե՞ս եք հեռվից հեռուգլուխ բերում բիզնեսի գործերը:

- Մեկ տարի ապրելով ծնողներիս մոտ` Կալինինգրադում, հայրիկիցս անչափ շռայլ նվեր ստացա` Make-up studio, որտեղ էլ ի ցույց դրեցի իմ դիմահարադարական ունակությունները: Իսկ հետո այստեղ ունենալով աշխատանքներ` սրահը հանձնեցի նրանց ու վերադարձա ԱՄՆ: Ծնողներիս օգնությամբ` հեշտությամբ կարողանում եմ գլուխ բերել բիզնեսի հետ կապված հարցերը:

Մեգգի, ինչ խոսք, դուք գեղեցկուհի եք, ու վստահաբար երկրպագուները շատ-շատկլինեն: Նրանցից շատերին կհետաքրքիր` Մեգգիի սիրտ տանող ճանապարհը բա՞ց է, թեշարունակեն պայքարել:

- Շնորհակալ եմ անչափ: Գիտեք անձնականին վերաբերող բոլորը հարցերը միշտ թողնում եմ անպատասխան: Դա իմ գաղտնի անկյունն է, որն անձեռնմխելի է եւ մուտքը խստիվ արգելվում է:

Երկար ժամանակ է, ինչ ԱՄՆ-ում եք: Ինտեգրման հարցի շուրջ խոսելը կարծես թեանիմաստ է, իսկ կարոտի մասին միշտ կարելի է խոսել: Ու՞մ եւ ի՞նչն եք ամենաշատըկարոտել:

- Արդեն 9 տարի է, ինչ այստեղ եմ ապրում: Ես ոչնչից չեմ փախչել, ծնողներիս շնորհիվ արժանավայել կյանք եմ ունեցել հայրենիքում, սակայն եկավ մի տարիք, երբ սիրտս մի նոր բան ուզեց: Եվ ես իմ ցանկությամբ լքեցի հայրենիքս` նոր արկածներ փնտրելու ակնկալիքով: Ինչ խոսք, կարոտում եմ Երեւանս, այնտեղ ապրող իմ հարազատներին եւ ընկերներին, սակայն բախտի բերմամբ վերջին շրջանում հաճախ եմ լինում Երեւանում եւ հնարավորություն ունենում կարոտս առնել:

 Մեգգի, Ձեր ծրագրերում Հայաստան վերադառնալու մտքեր կա՞ն, ի դեպ` ոչ թե հյուրի,այլ մշտական բնակչի տեսքով:

- Անկեղծ կլինեմ, ինչպես միշտ` չկան նման մտքեր: Ես ինձ այստեղ լավ եմ զգում, ես իմ ափսեի մեջ եմ եւ հեռվից եմ սիրում ու կարոտում հայրենիքս: Կյանքի որակն այստեղ ուրիշ է եւ անընդհատ առաջ գնալու ցանկությունն է պարուրում: Ուր էլ որ լինեմ, անդավաճան կմնամ իմ արմատներին եւ մշակույթին, սակայն առաջիկայում դեռեւս մշտապես հայրենիք վերադառնալու միտք չունեմ: Ես դեռ այստեղ շատ անավարտ գործեր ունեմ: