Հրանտ Բագրատյանի՝ լիդեր դառնալու ձգտումները և ՀՀԿ պատգամավորի արձագանքը

ИНТЕРВЬЮ 25 Ноябрь, 2016 20:28

ՀՀ նախկին վարչապետ, ԱԺ ՀԱԿ խմբակցության պատգամավոր Հրանտ Բագրատյանը մեծ թափով պատրաստվում է 2017 թվականին կայանալիք խորհրդարանական ընտրություններին: Նա իր հարցազրույցներից մեկում նշել էր, որ այս պահին քաղաքական հինգ կուսակցությունների միջև բանակցություններ են գնում՝ միասնական հարթակում հանդես գալու համար, որի առաջնորդը կլինի հենց ինքը:

Ընդդիմադիր պատգամավորի հայտարարության և ընդդիմադիր դաշտում տեղի ունեցող զարգացումների շուրջ Past.am-ը զրուցեց ԱԺ ՀՀԿ խմբակցության պատգամավոր Սուքիաս Ավետիսյանի հետ:

– Դուք՝ որպես իշխող կուսակցության պատգամավոր, ի՞նչ գնահատական կտաք այսօրվա ընդդիմադիր գործիչներին, և արդյոք Հրանտ Բագրատյանին հնարավորություն կընձեռվի՞ լինել լիդերի դերում:

– Կարծում եմ, որ դեռ ժամանակ կա հասկանալու համար, թե ընդդիմադիր դաշտում ինչ քաղաքական ուժեր կլինեն: Ցանկացած մարդ հայտարարություն անելու իրավունք ունի, իսկ այսօր էլ բոլորը փորձում են իրենց շուրջը համախմբել ընդդիմադիր ինչ–որ հատվածի:

Հրանտ Բագրատյանը եզակի չէ: Այսօր շատերն են հայտարարում, որ համախմբվում են և այլն, սակայն ամեն ինչ ժամանակը ցույց կտա: Բագրատյանը փորձառություն ունեցող քաղաքական գործիչ է, բայց թե ինչ ծրագրով հանդես կգա, որ իր շուրջ այլ ուժերի ու մարդկանց համախմբի, դա արդեն ժամանակը ցույց կտա:

– Ի՞նչ վիճակում է այսօր գտնվում ընդդիմադիր դաշտը, ի՞նչ ցույց տվեցին, օրինակ, Վանաձորի ընտրությունները:

– Եթե ընդդիմությունն ուզում է կոնկրետ հաջողություններ գրանցել իր մասով, ապա առաջին հերթին պետք է մտածի համախմբվելու մասին, հետո նոր պետք է մտածեն ինչ ծրագրով հանդես պետք է գալ:

– Ունե՞նք այսօր քաղաքական դաշտում այնպիսի ընդդիմադիր ուժ, որը կարող է առանց համախմբման հանդես գալ գալիք խորհրդարանական ընտրություններին ու լուրջ հաջողություններ գրանցել:

– Անկեղծ ասած, ես այսօր չեմ տեսնում ընդդիմադիր այն հզոր ուժը, որը կարող է լուրջ հաջողություններ ունենալ:

Սոսե Չանդոյան