«Երևանտրանսին» կազատեն 26 միլիոն դրամ շահութաբաժնի վճարումից

«Երևանտրանս» փակ բաժնետիրական ընկերությունը կազատվի 2015 թ. տնտեսա­կան գործունեության արդյունքներով զուտ շահույթից հաշվարկված և Երևանի բյուջե վճարման ենթակա շահութաբաժնի վճարու­մից՝ 26 միլիոն 875 հազար դրամի չափով: Այս մասին որոշում է կայացրել Երևանի քա­ղաքապետ Տարոն Մարգարյանը: Եվ նոյեմ­բերի 29–ին գումարվող Երևան քաղաքի ավագանու հերթական նիստին կներկայաց­վի այս մասին որոշման նախագիծը:

Որոշման մեջ մասնավորապես գրված է, որ ղեկավարվելով «Երևանտրանս» փակ բաժնետիրական ընկերության ֆինանսական առողջացման նպատակով՝ Երևանի ավագա­նին որոշում է «Երևանտրանս» փակ բաժնե­ տիրական ընկերությանը մասնակի ազատել 2015 թ. տնտեսական գործունեության ար­դյունքներով զուտ շահույթից հաշվարկ­ված և Երևանի բյուջե վճարման ենթակա շա­հութաբաժնի վճարումից՝ 26 միլիոն 875 հա­զար դրամի չափով:

«Երևանտրանս» փակ բաժնետիրական ըն­կերությունը 2015 թ. տարեկան գործունեության արդյունքներով առաջացած 87 միլիոն 189 հազար դրամի զուտ շահույթից 2016 թ. Երևանի բյուջե պետք է վճարեր 34 միլիոն 875 հազար դրամի շահութաբաժին, սակայն վճա­րել էր ընդամենը 8 միլիոն դրամ և պարտքն այս տարվա հունվարի 1–ի դրությամբ կազ­մում է 26 միլիոն 875 հազար դրամ:

Ընկերության 2015 թ. ցուցանիշներով, շա­հույթը կազմել է 115 միլիոն 700 հազար դրամ՝ նախահաշվով նախատեսված 85 միլի­ ոն 400 հազար դրամի դիմաց: Շահույթի գերակատարումը պայմանավորված է նրանով, որ համաձայն «Երևանտրանս» և «Երևանի ավտոբուս» ՓԲԸ–ների միջև կնքված պայ­մանագրի՝ երթուղիների սպասարկման ծա­ռայության վճարները ժամկետում չկատարե­լու դեպքում հաշվարկվել են տույժեր, որն էլ հաշվեգրման սկզբունքին համաձայն ձևա­կերպվել է որպես եկամուտ և առաջացրել լրացուցիչ շահույթ: Շահույթի գերակատար­ման պայմաններում ընկերությունն ունի ազատ դրամական միջոցների խիստ անբա­վարարություն: Դեբիտորական պարտքերի մեծ մասի գծով ընթանում են դատական գործընթացներ կամ ընդգրկված են դատա­րանի վճիռներով լուծարման գործընթացում (սնանկ ճանաչելու հիմքով) գտնվող կազմա­կերպությունների պարտատերերի ցուցակ­ներում:

Եվ ներկայում դրամական միջոցների ան­բավարարության հետևանքով «Երևանտ­րանս» ընկերությունը հնարավորություն չու­նի վճարել շահութաբաժնի գումարը: Այդ իսկ պատճառով էլ քաղաքապետը առաջարկել է ընկերության ֆինանսատնտեսական ցուցանիշները կարգավորելու համար, ընկերությա­նը ազատել 2015 թ. տնտեսական գործունե­ության արդյունքներով զուտ շահույթից հաշ­վարկված և Երևանի բյուջե վճարման ենթա­կա շահութաբաժնի վճարումից։

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ