Փաստաբան Նիկոլայ Բաղդասարյանը վստահ է, որ իր դեմ բողոք ներկայացրած անձին ուղղորդում են՝ ծառայեցնելով իրենց նպատակներին

Փաստաբան Նիկոլայ Բաղդասարյանը, ում նկատմամբ քրեական հետապնդում է սկսվել, վստահ է, որ իր դեմ բողոք ներկայացրած անձի գործողություններն ուղղորդված են:

Հիշեցնենք, որ Բաղդասարյանի մասնակցությամբ քրեական գործերից մեկով անցնող քաղաքացու բողոքի հիման վրա քրեական գործ է հարուցվել ՀՀ քրեական օրենսգրքի 144-րդ հոդվածով, որի շրջանակում Բաղդասարյանին մեղադրանք է առաջադրել:

Ըստ նախաքննական մարմնի՝ Բաղդասարյանը քրեական գործով անցնող վկայի վերաբերյալ անձնական կամ ընտանեկան կյանքի մասին ապօրինի տեղեկություններ է հավաքել և տարածել, մինչդեռ Բաղդասարյանն ու վերջինիս ներկայացուցիչները պնդում են, որ Բաղդասարյանը կատարել է իր պարտականությունները, իսկ դրանք չկատարելու դեպքում գործած կլիներ իր վստահորդի դեմ:

Խնդիրն այն է, որ քրեական գործի դատաքննության ընթացքում փաստաբանը դատարանին միջնորդել է իր պաշտպանյալի դեմ ցուցմունք տված վկայի հոգեկան առողջության վերաբերյալ փաստաթուղթ պահանջել համապատասխան հաստատությունից, դատարանը բավարարել է միջնորդությունը:

Փաստաբանի համապատասխան միջնորդության նպատակը եղել է վերը նշված վկայի՝ իր պաշտպանյալի մեղադրանքի հիմքում դրված ցուցմունքի արժանահավատությունն ու թույլատրելիությունը վիճարկելը, և պարզվել է, որ վկան հոգեկան հիվանդությամբ է տառապում:

Բաղդասարյանը Past.am-ի հետ զրույցում նշեց, որ կինը, ով իր դեմ բողոք է ներկայացրել, առաջին անգամ չէ, որ իր դեմ ուղղված գործողությունների է դիմում: Վերջինս այն նույն անձն է, ով տևական ժամանակ է՝ փաստաբանին մեղադրում է իր մահացած թոռանը «հավի ճուտ» անվանելու մեջ:

Բաղդասարյանը, սակայն, նկատում է, որ կնոջ մեղադրանքների հիման վրա իրավական պրոցեսներn սկսվել են այն բանից հետո, երբ տեղի է ունեցել դերասան Վարդան Պետրսյանի մասնակցությամբ վթարը, որի քննության ընթացքում ինքը բարձրաձայնել է այն բազմաթիվ խախտումների մասին, որոնք թույլ են տրվել քննությունն իրականացնող մարմինների կողմից: Նշենք, որ շուրջ 3 տարի առաջ ողբերգական դեպք է տեղի ունեցել. երթուղային տաքսու վարորդը վրաերթի է ենթարկել փոքր երեխայի և վերջինիս տատի հետ դատաքննության փուլում՝ դատական նիստերից մեկի ընդմիջման ժամանակ, տեղի ունեցած միջադեպը, ըստ Նիկոլայ Բաղդասայանի, սխալ մեկնաբանությամբ տարածվել է լրատվամիջոցներով:

«Մամուլի կողմից անվերջ շրջանառվում է, իբր ես վիրավորանք եմ հասցրել տուժողի տատին՝ ասելով, թե «քո երեխան հավի ճուտ է»: Իրականում դատական նիստի ընդմիջման ժամանակ գործով ամբստանյալի մյուս փաստաբան Նազելի Վարանյանի և տուժողի իրավահաջորդի մեջ խոսակցություն էր, նրանք իրավական հարցեր էին քննարկում՝կապված գործի հետ:

Այդ պահին անհասկանալի տրամաբանությամբ այդ կինը մոտեցավ Նազելի Վարդանյանին՝ ասելով ու պնդելով, որ եթե վրաերթ է տեղի ունեցել, ապա վարորդը միանշանակ մեղավոր է: Նա որպես իր խոսքերի փաստարկ ներկայացրեց այն հանգամանքը, թե «հո իմ թոռը հավի ճուտ չէ՞ր, որ ընկներ մեքենայի տակ»:

Ես այդ պահին միջամտեցի և ասացի, որ փաստաբանի գործառույթը մարդու իրավունքերը պաշտպանելն է՝ անկախ նրանից՝ նա հավի ճուտ է գցում մեքենայի տակ, թե մարդ: Այդ պահին այդ կինը շրջվեց և ասաց, որ չհամարձակվեմ իր երեխային վիրավորել»,- պատմեց Բաղդասարյանը՝ հավելելով, որ ինքն ամեն կերպ փորձել է այդ կնոջը բացատրել, որ ինքը երեխային չի վիրավորել, այլ պարզապես բացատրում է, թե որն է փաստաբանի առաքելությունը:

«Բայց այդ կինը չէր կարողանում ըմբռնել, նա շարունակ բղավում էր՝«ինչո՞ւ ես վիրավորում, ինչո՞ւ ես վիրավորում»:

Այս միջադեպից հետո այդ կինը մի շարք լրատվամիջոցների հայտնել է, իբր ես իր թոռանը «հավի ճուտ» եմ անվանել, ու ես անընդհատ ստիպված եմ պարզաբանել, որ նման բան չեմ ասել, որ իմ լեքսիկոնում նման բառ չկա, որ մենք իրենց երեխայի դեմ չենք, այլ ուղղակի ես և Նազելի Վարդանյանն իրականացնում ենք գործով ամբաստանյալի պաշտպանությունը»,- ասաց փաստաբանը՝ վստահություն հայտնելով, որ որոշ մարդիկ օգտվում են այդ կնոջ վիճակից՝ նրան ծառայեցնելով իրենց նպատակներին:

«Ես վստահ եմ, որ այդ կնոջն ուղղորդում են. Եթե այս ամենն ուղղորդված չլիներ, ապա այս բոլոր գործընթացները հենց դեպքերից հետո էլ կսկսվեին, այլ ոչ թե այսքան ժամանակ անց, երբ այդ քրեական գործն ավարտվել էր, երբ այլևս բողոքելու պատճառ չկար, գործը համաներմամբ կարճվել էր:

Բացի այդ՝ ես և Նազելի Վարդանյանը եղել ենք դատական նիստերին և գիտենք, որ այդ կնոջ գիտելիքները չեն բավարարում՝ այնպիսի իրավաբանական փաստաթղթեր ներկայացնելու համար, ինչպիսին ներկայացվել են՝ ստորագրված նրա անունով: Դրանք իրավաբանների կողմից խորը մշակված փաստաթղթեր են, որոնց տակ պարզապես ինքն է ստորագրում։ Ակնհայտ երևում է, որ նրան ուղղորդում են, և ես ունեմ տեղեկություն, թե դա ով կարող է լինել, բայց դեռ համբերում եմ, այդ մասին չեմ խոսում: Այս պատմության մեջ կարևորն այն է, որ փաստաբանական ինստիտուտը չտուժի»,- խոսքը եզրափակեց Բաղդասարյանը:

Արաքս Մամուլյան