ՀՀԿ-ն բոլոր քաղաքական ուժերին մրցակից է համարում և հարգանքով է վերաբերվում

 Հայաստանի իշխանություններին հարկավոր է անբիծ, մաքուր, մրցակցային և ժողովրդավարական ընտրություններ անցկացնել: Ազգային ժողովում լրագրողների հետ զրույցում այս մասին ասաց ՀՀ ԱԺ փոխնախագահ Էդուարդ Շարմազանովը: «Հենց դրա համար ենք մենք գնացել այդքան փոխզիջումների, իսկ մենք շատ զիջումների ենք գնացել,- «Արմենպրես»-ի հաղորդմամբ՝ ասաց Շարմազանովը:

Նա հավելեց, որ լավ ընտրություններ ունենալու համար պայքարը երկկողմանի է: Շարմազանովն ընդգծեց, որ ընդդիմության մոտ էլ է նման ցանկություն նկատում: «Ոչ բոլորի մոտ եմ նկատում, սակայն հիմնական պետականամետ ընդդիմադիր գործիչների մոտ ես նկատում եմ այդ ցանկությունը, նրանք էլ են ցանկանում, որպեսզի մեր երկրում լինեն նորմալ ժողովրդավարական ընտրություններ»,- ասաց նա:

ԱԺ փոխնախագահի խոսքով՝ նորմալ ժողովրդավարական ընտրություններ չի նշանակում, որ իշխող Հանրապետականն անպայման պետք է պարտվի, իսկ ընդդիմությունը՝ հաղթի: «Ընդդիմությունը հիմա բազմաշերտ է: Նրանք դեռ չգիտեն, թե ինչ են անելու, ինչ ձևաչափով են մասնակցելու: Եթե մեր դեպքում ամեն ինչ պարզ է, քանի որ մենք արդեն մեր վարչապետի թեկնածուին ենք հայտարարել, ապա ընդդիմության դեպքում ամեն ինչ այնքան էլ հստակ չէ: Հիմա դուք կարո՞ղ եք հստակ ասել «Քաղաքացիական պայմանագիր»-ը և «Լուսավոր Հայաստան»-ը միասին են մասնակցելո՞ւ, թե ոչ, «Ժառանգություն»-ն առհասարակ մասնակցելո՞ւ է ընտրություններին, թե ոչ, «Բարգավաճ Հայաստան»-ը կմասնակցի՞, թե սպասում է վերադարձի»,- մանրամասնեց Շարմազանովը:

Նա չհամաձայնեց դիտարկման հետ, թե ՀՀԿ-ն մյուս քաղաքական ուժերին իրեն մրցակից չի համարում: «Մենք բոլորին մեզ մրցակից ենք համարում: Քաղաքականության մեջ գոռոզությունը քո տունը կքանդի: Դու պետք է հարգանքով վերաբերվես քո բոլոր մրցակիցներին: Սեփական ուժերի գերագնահատումը կհանգեցնի ֆիասկոյի: Դրա համար մենք բոլոր քաղաքական ուժերին հարգանքով ենք վերաբերվում: Մենք ակնկալում ենք ազատ, թափանցիկ, ժողովրդավարական ընտրապայքար: Սակայն այս պահին տեսնո՞ւմ եմ ես ընդդիմադիր քաղաքական ուժ, որը կարող է հաջողության հասնել, եթե հենց վաղը ընտրությու ններ լինեն. չեմ տեսնում: Հնարավո՞ր է, ապրիլի 2-ից հետո կտեսնենք, կյանքում ամեն ինչ հնարավոր է»,- ասաց ԱԺ փոխնախագահը:

Անդրադառնալով հարցին, թե ինչպե՞ս է ստացվել, որ մեկ օրում ՀՀԿ-ին անդամակցել է 7 հազար մարդ, Շարմազանովն ընդգծեց, որ ՀՀԿ-ում դա պարբերական գործընթաց է և խորհուրդ տվեց չզարմանալ: «Ես ցանկանում եմ բոլորին, որ իրենք էլ կարողանան 7 հազար չէ՝ 20 հազար, 30 հազար, 50 հազար մարդ անդամագրել: Մեր բանջարը իրենց հանճարին վնաս չէ, թող իրենք էլ անեն»,- եզրափակեց ԱԺ փոխնախագահը: