Նոր հարկային բեռը կվտանգի ոլորտի զարգացմանը

Թեև տարիներ է, որ տուրիզմի զարգացումը համարվում է կառավարության գերակա ուղղություններից մեկը, այդուհանդերձ այն չի կարողանում դառնալ մրցունակ: Հայտնի է, որ զբոսաշրջությունը պահանջարկի վրա հիմնված բիզնես–ուղղություն է, սակայն «տուրապրանքը» ստեղծում են մասնավոր տուրիստական ընկերությունները: Եվ ինչքան էլ շահավետ ոլորտ համարվի, այնուամենայնիվ հայկական ընկերություններին չի հաջողվում եղած հնարավորություններով Հայաստան ժամանող զբոսաշրջիկի համար շահավետ առաջարկներ ներկայացնել: Ու եթե արտագնա տուրիզմի դեպքում հայկական զբոսաշրջային ընկերությունները սկսել են վրացական տուրիստական ընկերությունների միջոցով ճանապարհորդական մատչելի փաթեթներ առաջարկել, ապա ներգնա տուրիստական փաթեթները շարունակում են պահանջարկի շուկայից դուրս մնալ բարձր գների պատճառով:

 

Թերևս, այս և այլ խնդիրները լուծելու նպատակով և ոլորտի առաջխաղացման տեմպերն արագացնելու համար էլ վերջերս ձևավորվեց ՀՀ տնտեսական զարգացման և ներդրումների նախարարության զբոսաշրջության պետական կոմիտեն: Կոմիտեի նախագահի ժամանակավոր պաշտոնակատար Զարմինե Զեյթունցյանի կարծիքով թեև մինչ այս ոլորտում շատ գործ է արվել, սակայն քիչ չեն նաև այն մարտահրավերները, որոնք հրատապ լուծման կարիք ունեն.

 

«Առաջինը Հայաստանի ճանաչելիության հարցն է: Կան ոլորտներ, որտեղ Հայաստանը պետականորեն ըստ պատշաճի ներկայացված չէ միջազգային հարթակներում: Հարկավոր է փոխել շեշտադրումները, որպեսզի միջազգային ասպարեզում Հայաստանը ճանաչեն ոչ թե որպես ցեղասպանություն տեսած կամ պատերազմող երկիր, այլ՝ որպես բարեկեցիկ, ժամանակակից երկիր, որը նաև նպաստավոր պայմաններ է ստեղծում ներդրողների համար»,– ասում է Զ. Զեյթունցյանը:

 

Խոսելով հայաստանյան հյուրանոցային ցանցի բարձր գների մասին, կոմիտեի նախագահի պաշտոնակատարը նշեց, որ այլ երկրների գների համեմատ դրանք ավելի մատչելի են, քան օրինակ՝ Վրաստանի գներն են.

 

«Եթե համացանցում բլոգերների և ճանապարհորդական ժուռնալիստների կողմից ներկայացված կարծիքներն ենք համեմատում, ապա հարևան՝ Վրաստանի և Ադրբեջանի համեմատ Հայաստանի գներն ավելի մատչելի են»,– ասում է Զ. Զեյթունցյանը:

 

Հայաստանի ներգնա տուրօպերատորների միության տնօրեն Կարինե Դավոյանը Past.am-ի հետ զրույցում ասաց, որ հիմնական խնդիրը, որը խոչընդոտում է ներգնա տուրիզմով զբաղվող ընկերությունների զարգացմանը`ավիատոմսերի բարձր գներն են.

 

«Մեզ մոտ սնունդը և սպասարկման ոլորտի այլ ծառայությունների գները նորմալ են, սակայն ավիաընկերությունների գների բարձր լինելու պատճառով է, որ փաթեթների գները թանկ են: Դա է պատճառը, որ մեր տուրօպերատորները չեն կարողանում մրցել այլ երկրների համանման կազմակերպությունների հետ: Համապատասխան օրենքների պատճառով մենք նաև չունենք գիդերի, տրանսպորտային ընկերությունների որակավորման և լիցենզավորման ընթացակարգ: Եթե այդ հարցերը կանոնակարգվեն և հստակեցվեն, թե ով իրավունք ունի տուրիզմով զբաղվելու, առաջացած խնդիրներն ավելի հեշտ կլուծվեն»,– ասում է Կ. Դավոյանը:

 

Նրա խոսքով՝ Հայաստանում ցանկացած մարդ կարող է տուրիզմով զբաղվել, որը կարող է բացասաբար ազդել ընդհանուր զբոսաշրջության ոլորտի իմիջի վրա: Նրա տեղեկացմամբ բացի առկա խնդիրներից, 2017 թ.–ից տուրիստական ընկերությունների վրա նոր հարկային բեռ է ավելացվելու, որն է՛լ ավելի կդժվարացնի հայկական ընկերությունների աշխատանքը.

 

«Քաղաքակիրթ բոլոր երկրներում նման հարկատեսակ չկա և փաստորեն սա նոր բեռ է մեզ համար: Այդ հարկի պատճառով ընկերությունները ստիպված պետք է լինեն ավելի բարձրացնել փաթեթների գները: Բացի այդ, շատ կարևոր է ուղիղ չվերթների կազմակերպումը, որպեսզի զբոսաշրջիկը միանգամից մեր երկիր կարողանա գալ: Դրա բացակայության պատճառով է նաև, որ հայկական ընկերությունները չեն կարողանում մատչելի առաջարկներ ներկայացնել»,– ասում է Կ. Դավոյանը: