Israel rules կամ ՑԱԽԱԼ-ը հարվածում է Ասադին

Սիրիական պատերազմի լուսաբանման ընթացքում միջազգային մամուլը, ասես հատուկ, զանց է առնում իսրայելական գործոնը և բացարձակ չի հրապարակում մեծամասամբ արաբական մեդիայով տիրաժավորվող այն տեղեկատվությունը, որ ՑԱԽԱԼ–ն այստեղ հաճախ է գործողություններ ծավալում: Ընդ որում, ոչ այնքան «Իսլամական պետության» գրոհայիններին, որքան Ասադի կառավարական ուժերին թիրախավորելով:

 

Երեկ, օրինակ, արաբական մամուլը գրել է, թե Իսրայելի օդուժը նույն օրը ռմբակոծել է Սիրիայի կառավարական ուժերի հենակետերը Դամասկոսում, ինչպես նաև՝ շարքից հանել նույն ուժերին պատկանող ավտոշարասյունը: Արդյունքում ահռելի վնաս է հասցվել բանակի 38–րդ բրիգադին, իսկ ահա ավտոշարասյան ու դրանում եղած, հավանաբար, ռազմամթերքի կամ զոհերի մասին արաբական կողմն էլ հավելյալ մանրամասներ չի հաղորդում:

 

ՑԱԽԱԼ–ի լրատվական կենտրոնը որևէ բացատրություն չի տվել կատարվածի առիթով, իսկ կառավարական ներկայացուցիչը փորձել է տպավորություն ստեղծել, թե, հնարավոր է, սիրիական ավտոշարասյունը դեպի Լիբանան էր ուղևորվում՝ զենք ու զինամթերք հասցնելով Հըզբոլլահի գրոհայիններին:

 

Թե՛ Լիբանանում, թե՛ Սիրիայում վրդովված են այս առիթով: Նախ՝ ենթադրությունների հիման վրա որևէ երկիր իրավունք չունի ռազմական ագրեսիա դրսևորել սուվերեն երկրի նկատմամբ: Բացի այդ՝ պատերազմի ամբողջ ընթացքում հավաքագրված փաստերը վկայում են, որ Իսրայելն այս ամբողջ ընթացքում ոչ թե Հըզբոլլահի կամ նույնիսկ ԴԱԻՇ–ի դեմ է գործողություններ ձեռնարկում Սիրիայում, այլ իրականում հենց կառավարական ուժերին է հարվածի տակ առնում: Անգամ իսրայելական մամուլը, մասնավորապես՝ newsRU.co.il–ը, երեկ ժամ առ ժամ ներկայացրել է այն բոլոր գործողությունները, որոնք տարիներ շարունակ իրականացվել են ՑԱԽԱԼ–ի կողմից:

 

Միայն ընթացիկ ամսում, օրինակ, ՑԱԽԱԼ–ն առնվազն չորս հաստատված հարված է ուղղել Սիրիային: Մասնավորապես՝ խոստովանվում է, որ նոյեմբերի 30–ին պատահել է հենց այն, ինչ վերևում է նկարագրվել: Նոյեմբերի 28–ին իսրայելական օդուժը ռմբակոծել է Դամասկոսում ՄԱԿ–ի նախկին նստավայրը, որտեղ, իբր, ԴԱԻՇ գրոհայիններ են եղել, իսկ արաբական կողմի վկայությամբ՝ կառավարական ուժեր, որոնց մեծ վնաս է հասցվել: Նոյեմբերի 27–ին ՑԱԽԱԼ–ը հարվածել է Գոլանի բարձունքներում հերթապահություն իրականացնող պարեկապահակային ծառայություններին, ընդ որում՝ առանց որևէ բացատրություն ներկայացնելու: Իսկ ահա նոյեմբերի 9–ին թիրախավորվել է սիրիական օդուժը, ինչի մասին ռուսական աղբյուրներն էլ վկայեցին:

 

Այս հանգամանքը հերթական անգամ փորձագիտական հանրության և քաղաքական էլիտաների առջև պաղեստինա–իսրայելական հակամարտության լուծման անհրաժեշտությունն է վեր հանել, ինչն, իհարկե, մեծապես կլիցքաթափի լարված իրավիճակն առհասարակ Մերձավոր Արևելքում: Ընդ որում, քննարկումների առիթը նաև ՄԱԿ–ի կողմից պաշտոնապես հաստատված՝ Պաղեստինի հետ միջազգային համերաշխության օրն էր, որ մի շարք միջոցառումների ուղեկցությամբ նշվում է նոյեմբերի 29–ին, և որի առիթով ամենատարբեր ուղերձներ հղվեցին թե՛ ՄԱԿ–ի ղեկավարության, թե՛ քաղաքական էլիտաների կողմից:

 

ՖԱԹՀ–ի՝ նույն օրը կայացած համագումարը և Պաղեստինի փաստացի ղեկավար Մահմուդ Աբասի՝ շարժման առաջնորդի պաշտոնում վերընտրությունը նույնպես բարենպաստ հանգամանք է դիտարկվում բոլորի կողմից: Ի վերջո, Աբասի փոխարեն կարող էր ընտրվել ՖԱԹՀ–ի այսպես ասած՝ ռազմական թևի ներկայացուցիչը, և իրավիճակն այդ դեպքում ավելի կլարվեր: Իսկ այսպես, ինչպես Չինաստանի կոմկուսի ներկայացուցիչն է նշել ՄԱԿ–ին ուղղված իր շնորհավորական հեռագրում, հույս կա, որ կողմերը հաշտության կգան, և Պաղեստինի անկախությունը վերջապես կճանաչվի այն սահմաններում, որում դեռ 1967–ին էին մտադիր ճանաչել ...