«Գահերի խաղը» Սիրիայում շարունակվում է

Դեկտեմբերի 5–ին, փոխադարձ մեղադրանքների բուռն մթնոլորտում, ՄԱԿ–ի Անվտանգության խորհուրդը քննարկեց Հալեպում մարդասիրական իրավիճակի բարելավման նպատակով՝ 7–օրյա հրադադարի ռեժիմի սահմանման մասին բանաձևի նախագիծը, ինչն արժանացավ Ռուսաստանի շատ խիստ դիմադրությանը: Վերջինիս շոկի մեջ էր գցել հատկապես այն հանգամանքը, որ փաստաթուղթը պատրաստվել էր Իսպանիայի կողմից, որին միացել էր ավանդական դաշնակից Եգիպտոսը: Կրակին յուղ լցրեց նաև Հալեպի շարժական հոսպիտալի վրա ընկած ականներից զոհված երկու բուժքույրերի մահվան մասին լուրը, ինչի առիթով նախ՝ ՊՆ ներկայացուցիչը միջազգային կազմակերպություններից պահանջեց դատապարտել «Հալեպի խաղաղ բնակչությանն օգնություն ցուցաբերող ռուս բուժաշխատողների կանխամտածված սպանությունը», խոստանալով ամենայն մանրամասնությամբ հետաքննել հանցագործությունը, ապա նաև՝ ՄԱԿ–ում ՌԴ ներկայացուցիչ Վիտալի Չուրկինը ներկաներին կոչ արեց «չխաղալ, այսպես կոչված, սիրիական ընդդիմության, իսկ իրականում՝ մարդկային տեսք ունեցող գազանների խաղը»: Վերջինս նաև խստորեն քննադատեց բանաձևը` նշելով, թե այն ոչ միայն գրոհայիններին հնարավորություն կտա վերախմբավորվել՝ շարունակելով բռնությունը, այլև կխանգարի Լավրով–Քերի՝ վերջին պայմանավորվածությունների իրականացմանը: 

Իսկ պայմանավորվածություն ձեռք էր բերվել քննարկումից ընդամենը երեք օր առաջ՝ Հռոմում, որտեղ ամերիկյան պետքարտուղարը հավանություն էր տվել Սիրիայում խաղաղություն հաստատելու մասին՝ ռուսական քաղաքականությանը, ապա նաև խոստացել ռուս–ամերիկյան ռազմական մասնագետների հանդիպում կազմակերպել Ժնևում, որտեղ պիտի քննարկվեին հրվ. Հալեպից գրոհայինների դուրսբերման եղանակներն ու գործողությունների ծրագիրը:

ՄԱԿ–ի ԱԽ–ում, սակայն, ամերիկյան ներկայացուցիչն ու այլոք ոչ մի կերպ չցանկացան ընդունել Չուրկինի բացատրությունները, նախագիծը դրվեց քվեարկության, ինչին չնայած կողմ քվեարկեցին 11 անդամներ, Ռուսաստանին ու Չինաստանին հաջողվեց արգելափակել դրա ընդունումը:

Չինական դիրքորոշումն, ի դեպ, հունից հանեց բրիտանական դեսպան Մեթյու Ռայքրոֆթին, որը հայտարարեց, թե միայն բռնության նկատմամբ հավատարմությունն է այդ երկրի համար նման դիրքորոշման առիթ դարձել, ինչին ի պատասխան՝ ՄԱԿ–ում Չինաստանի դեսպան Լյու Ցզեյը հայտարարեց, թե Բրիտանիան միտումնավոր է թունավորում աշխատանքային մթնոլորտը՝ նենգափոխելով փաստերը, որի իրավունքը չունի: Ինչ վերաբերում է ամերիկյան ներկայացուցչին՝ Լյու Ցզեյը նրան էլ խորհուրդ տվեց իր դիրքորոշումը նախ և առաջ սեփական պետքարտուղարի հետ համաձայնեցնել, որն, ինչպես երևում է, բոլորովին այլ բանի մասին էր խոսում մի քանի օր առաջ: 

Դեսպանի հեգնանքն, իհարկե, հասկանալի է, բայց կարծես՝ ոչ տեղին, որովհետև քվեարկության օրը պարզվեց նաև, որ Քերին ինքն էլ հրաժարվել է ռուս–ամերիկյան շփումներից, ինչին նրա գործընկեր Լավրովը բավականին ըմբռնումով մոտեցավ՝ հայտարարելով, թե ամերիկյան կողմը ջանում է ժամանակ շահել, որպեսզի հրվ. Հալեպում բուն դրած գրոհայիններին անվնաս և մինչև ռուսների հետ պայմանավորվածության հանգելը դուրս հանի այնտեղից: 

Իսկ որ ամերիկյան կողմը հակված է ընդունել սիրիացի ընդդիմության պարտությունը, այդ մասին նաև հայտնի CNN–ի մեկնաբանը երեկ ակնարկեց` նշելով, թե, հնարավոր է, ռուս–ամերիկյան համագործակցությունը կարգի բերի Մերձավոր Արևելքը: Ճիշտ է և այն, որ Washington Post–ն էլ գրեց, թե գրոհայինները, հավանաբար, կմիանան Ալ–Քաիդային կամ էլի՛ մեկ այլ խմբավորման, ինչին ռուսական մեդիան արձագանքեց՝ «չէինք էլ կասկածում» համատեքստում: Մի բան, ինչն ավելորդ անգամ ապացուցում է, որ «Գահերի խաղը» Սիրիայում և առհասարակ միջազգային հարթության մեջ շարունակվում է: Իսկ թե ինչ կփոխի դրանում Թրամփի հայտնությունը՝ անհայտ է…

Գոհար Սիմոնյան