Կոռուպցիայի հետքերով

ՀՀ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում կաշառք ստանալու կասկածանքով ձերբակալվել է Երևանի քաղաքապետարանի աշխատակազմի քաղաքաշինության և հողի վերահսկողության վարչության տարածքային բաժնի պետը։

Այս ինֆորմացիան բավականին լայն տարածում և արձագանք գտավ օրերս։ Բնական էր, որ այս ամենին չէր կարող չարձագանքնել քաղաքապետը։ Նա այսօր ընդլայնված խորհրդակցություն էր հրավիրել, որին մասնակցում էին աշխատակազմի քաղաքաշինության և հողի վերահսկողության վարչության, ինչպես նաև հասարակական կարգի պահպանության ծառայության աշխատակիցները։ Հանդիպման ընթացքում եղել են բավականին ուշագրավ դիտարկումներ, որոնցից մի քանիսին կանդրադառնանք ստորև։ Կոռուպցիան նոր չէ, որ արմատացել է հայկական միջավայրում և բավականին վտանգավոր թափ է հավաքել։ Սա բնորոշ է մեր տնտեսական կացութաձևն ու սոցիալական միջավայրն ունեցող գրեթե բոլոր երկրներին։ Սակայն բոլորը չէ, որ կոռումպացված են։

Հենց այս հանգամանքն ի նկատ ունի քաղաքապետը, երբ նշում է. «մեկ աշխատակցի անազնիվ քայլը ստվերում է բոլորիդ աշխատանքը»։ Բոլոր ոլորտներում էլ կան այդ մեկ կամ մի քանի անազնիվները, այստեղ խնդիրը պետք է լինի նրանց շատ արագ բացահայտել և հեռացնել համակարգից, իհարկե, ենթարկելով քրեական համապատասխան պատասխանատվության։ Երկրորդ դիտարկումը, որ անում է քաղաքապետը, բավականին ուշագրավ է։ Պարզվում է, միայ այս տարվա ընթացքում, քաղաքապետարանի 15 աշխատակիցներ արդեն հեռացվել են աշխատանքից։ Կարծում եմ, յուրաքանչյուր նման դեպքի համար, քաղաքապետարանը կարող է հանդես գալ համապատասխան հայտարարությամբ։ Սա կնպաստի նաև հասարակության հետ կապերի ամրապնդմանը և աշխատանքաին ոճի թափանցիկությանը։

Իհարկե, լավ է որ քաղաքապետն արդեն բաց տեքստով ու առանց ենթատողերի, խոսում է նման երևույթների մասին ու տալիս համապատասխան հանձնարարականներ։ Քաղաքապետի երրորդ կարևոր դիտարկումը ոչ թե մեսսիջ էր, այլ բաց տեքստով զգուշացում իր աշխատակիցներին։ Կարծում ենք, ոչ հրապարակային խոսակցություններում, հենց այդ նույն բաժնի պետերի հետ, եղել են որոշակի քննարկումներ և պայմանավորվածություններ, որոնք քաղաքապետն իր խոսքում անվանում է սկզբունքներ։ Նա բաց տեքստով զգուշացնում է, որ այդ սկզբունքները պետք է պահպանվեն, այլապես կգործի նույն մոտեցում՝ հեռացում աշխատանքից։ Սակայն հարկ է արձագանքել, որ հասարակության վստահությունը վերականգնվելու մասով, խիստ խախտումներ արածները կարող են ենթարկվել նաև քրեական պատասխանատվության ` փոխհատուցման սկզբունքի կիրառումով։

Կարևոր էր նաև քաղաքապետի հաջորդ հանձնարարականը, որում ի մասնավորի ասվում էր. «Մշակեք վերահսկողության կանխարգելիչ այնպիսի մեխանիզմներ, որոնք առավելագույնս կբացառեն կոռուպցիոն բոլոր ռիսկերը: Կարճ ժամանակահատվածում ակնկալում եմ այնպիսի արդյունքներ, որոնք արմատապես կլուծեն ոլորտում առկա խնդիրները»։ Սա խոսում է հետևողականության և գործողություններ կատարելու կամքի մասին։ Այս ամենը կարող է իրավմամբ իրացվել և կյանքի կոչվել, եթե քաղաքապետի թիմն աշխատի այս նույն սկզբունքներով և չխախտի այն պայմանավորվածությունները, որոնք ունեն։ Կարծում ենք, քաղաքապետն ունի այնքան լծակներ և հետևողականություն, որի արդյունքում իրականություն կդառնան այս մոտեցումները և հանձնարարությունները։

Վահրամ Թոքմաջյան

Past.am վերլուծաբան