Նոր հարկատեսակի պատճառով ներգնա տուրիզմի ոլորտը կկանգնի փլուզման եզրին. «Փաստ»

«Փաստ» օրաթերթը գրում է.

«Հայաստանի ներգնա տուրօպերատորների միության» տնօրեն Կարինե Դավոյանի կարծիքով՝ հայկական տուրիզմը մրցունակ չէ տարածաշրջանում, քանի որ հայկական ընկերությունների ներկայացրած տուրիստական փաթեթներում ամենամեծ բաժինն ընկնում է ավիատոմսերի գներին:
Ինչ վերաբերում է ոլորտի զարգացմանը, ապա, նրա կարծիքով, օրենսդրական բացերն են խոչընդոտում հայկական տուրօպերատորներին ավելի ճկուն գործելու և ոլորտը զարգացնելու համար:
«Եթե մենք համապատասխան օրենքներ ունենանք, որպեսզի լիցենզիաներ տրամադրվեն տուրիստական խմբերի ուղեկցորդներին, տրանսպորտային ընկերություններին, նրանց որակավորման աստիճաններ տրվեն և հստակեցվի, թե ով իրավունք ունի Հայաստանի տարածքում տուրիստական գործունեությամբ զբաղվել, ոլորտն ավելի կանոնակարգված կզարգանա և բացթողումներ չեն լինի»,– ասում է Կ. Դավոյանը:
Նրա ներկայացմամբ՝ Հայաստանում ով ցանկանում է կարողանում է տուրիզմով զբաղվել: Դա բավականին խանգարող հանգամանք է, քանի որ փորձ և գիտելիք չունեցող անձինք ինքնուրույն գործելով բացասական ազդեցություն են ունենում և ազդում են հայկական տուրօպերատորների իմիջի վրա: 
«Նման անձինք չպետք է նման ծառայություն մատուցելու իրավունք ունենան, քանի որ պատահում է, որ նույնիսկ այս կամ այն տեսարժան վայրի մասին տարբեր և իրարամերժ ինֆորմացիա են տրամադրում զբոսաշրջիկներին: Այս ամենը ճիշտ ուղու վրա դնելու համար պետք է վերականգնվի լիցենզավորման հարցը»,– համոզված է Կ. Դավոյանը:
Խոսելով հունվարի 1–ից ուժի մեջ մտնող նոր օրենքի մասին, համաձայն որի՝ տուրիստական ընկերությունները պետք է ավելացված արժեքի հարկ վճարեն, նա նշեց, որ դա լրացուցիչ բեռ է, որն էլ ավելի կբարդացնի մրցունակ տուրիստական բիզնես–գործունեություն ծավալելու հնարավորությունը: Կ. Դավոյանի կարծիքով՝ միակ լուծումն այն կլինի, որ ոլորտն ազատվի ավելացված արժեքի հարկ վճարելու պարտականությունից: 
«Քաղաքակիրթ երկրներում դա չկա և մինչ այդ մենք նույնպես ազատված ենք եղել այդ հարկատեսակը վճարելու պարտականությունից: Մեր փաթեթներն առանց այն էլ թանկ են ավիատոմսերի թանկ լինելու պատճառով: Մենք ուղիղ չվերթներ չունենք և հարց է ծագում, թե ինչո՞ւ պետք է զբոսաշրջիկը մեզ մոտ գա օդանավ փոխելով, եթե ուղիղ չվերթով և ավելի էժան փաթեթով կարող է գնալ Վրաստան»,– ասում է Կ. Դավոյանը:

Շարունակությունը` «Փաստ» օրաթերթի այսօրվա համարում: